ދިވެހި ފިލްމު އިންޑަސްޓްރީ ދުށް އެންމެ މޮޅު ކުޅަދާނަ އެކްޓަރުންގެ ތެރޭގައި ހިމެނޭ އަލީ ސީޒަން ރައްޔިތުންގެ މަޖިލީހަށް ކުރިމަތިލާން މިދިޔަ އޮކްޓޯބަރު މަހު އިއުލާންކުރިނަމަވެސް، އެ ނިންމުން ބަދަލުކޮށް މަޖިލީހަށް ކުރިމަތިނުލާން އޭނާ ނިންމައިފިއެވެ.
އެކްޓަރު ސީޒަން "ދަ ޕްރެސް" އަށް މައުލޫމާތު ދެމުން ބުނީ ތުލުސްދޫ ދާއިރާގެ ގޮނޑިއަށް ވާދަކުރަން ކުރިން ނިންމި ނަމަވެސް މިހާރު އެ ނިންމުން ބަދަލުކޮށް މަޖިލީހަށް ކުރިމަތިނުލާނެ ކަމަށެވެ. އޭގެ ސަބަބު ކައިރި ތާރީހެއްގައި ހާމަކުރާނެ ކަމަށް އެކްޓަރު ބުންޏެވެ. ސީޒަން ވަނީ މަޖިލީހަށް ކުރިމަތިލާނެ ކަމަށް އިއުލާންކުރުމަށްފަހު ކެމްޕޭނުވެސް ކޮށްފައެވެ. އަދި ނިމިދިޔަ އިންތިހާބުގައި ސީޒަން ވަނީ ރައީސް ޑރ މުއިއްޒުގެ ކެމްޕޭނު ހަރަކާތްތަކުގައި ވަރަށް ފޯރިއާއެކު ހަރަކާތްތެރިވެފައެވެ. ތުލުސްދޫ ދާއިރާގެ ގޮނޑިއަށް ކުރިމަތިނުލާކަން ހާމަކުރަމުން ސީޒަން ބުނީ ތުލުސްދޫ ދާއިރާ ހިމެނޭ ތުލުސްދު އާއި ދިއްފުށިން ދިން ސަޕޯޓަށް ޝުކުރު އަދާކުރާ ކަމަށާއި އެ ގޮނޑިއަށް ވާދަނުކުރަން ނިންމަން ޖެހުނީތީ އެ ދެރަށުގެ ރައްޔިތުންގެ ކިބައިން މައާފަށް އެދޭކަމަށެވެ.
އެކްޓަރުގެ ތިން ފިލްމެއް މިއަހަރު އޮލިމްޕަސް ސްކްރީނުން ބަލާލެވުނެވެ. އެއީ މިއަހަރު ކުރީކޮޅު ސީޒަން ޑައިރެކްޓްކުރި ފިލްމު "ލޯބިވެވިއްޖެ"، ސީޒަންގެ އެސްޕްރޮޑަކްޝަންގެ ބޮޑު ހިއްސާއަކާ އެކު ސިންގަޅަ ތަރިންނާއެކު ގެނެސްދިން ބިރުވެރި ފިލްމު "ކައުޝީ" އަދި ކުޅަދާނަ ބަތަލާ ނިއުމާ މުހައްމަދު ޕްރޮޑިއުސްކޮށްފައިވާ "ކަޅަކި" އެވެ.
