އިޒްރޭލުން ގާޒާގެ މެދުތެރޭގެ އަވަށެއް ކަމަށްވާ އަލް ޒައިތޫން އަވަށުގައި ހުންނަ ބެޕްޓިސްޓް ހޮސްޕިޓަލް، (އަލް އަހްލީ އަރަބް ހޮސްޕިޓަލް) ގޮއްވާލައިފިއެވެ.
ފަލަސްތީނުގެ ހެލްތް އޮތޯރިޓީން ބުނީ، އިޒްރޭލުން ގާޒާގެ ހޮސްޕިޓަލަށް ވައިގެ ހަމަލާއެއް ދީ ގޮއްވާލާފައި ވާ ކަމަށާއި، އެ ހޮސްޕިޓަލްގެ ކޮމްޕައުންޑްގެ ގާކުނޑިތަކުގެ ދަށުގައި އެތައް ސަތޭކަ ބަޔަކު ތިބި ކަމަށެވެ. އަލްއަހްލީ އަރަބި ހޮސްޕިޓަލަށް ދިން ހަމަލާގައި މިހާތަނަށް 500 މީހުން ޝަހީދު ވެފައިވާ ކަމަށް ހެލްތް އޮތޯރިޓީން ބުނެއެވެ.
ދޯހާ އިންސްޓިޓިއުޓް އޮފް ގްރެޖުއޭޓް ސްޓަޑީޒްގެ ރިސާޗަރެއް ކަމަށްވާ އިބްރާހިމް ފްރެއިހަތު ވިދާޅުވި ގޮތުގައި އިޒްރޭލުން ހިންގަމުންދާ ހަނގުރާމައިގެ ޖަރީމާތަކަށް އެމެރިކާ ސަރުކާރާއި ބައިނަލްއަގުވާމީ ކްރިމިނަލް ކޯޓުން ހައްލު ހޯދަން ޖެހެއެވެ. އެ ހޮސްޕިޓަލަކީ "ހަމާސްގެ ޓާގެޓަކަށް" ވާނީ ކިހިނެއް ތޯ ވިދާޅުވެ ފްރެއިހަތު ސުވާލު އުފެއްދެވިއެވެ. މިއީ އިޒްރޭލު ސަރުކާރުން ޖަވާބު ދޭން ޖެހޭ ސުވާލެއް ކަމަށާއި އެކަމާ ހަވާލުވެ ތިއްބެވި ބޭފުޅުންނާއި ސިޔާސަތުތައް ބައްޓަން ކުރައްވާ އެންމެން ވެސް ޒިންމާވާން ޖެހޭނެ ކަމަށް އޭނާ ވިދާޅުވިއެވެ.
"އިޒްރޭލުގެ ބޮމުގެ ހަމަލާތަކުން މި އާ ޖަރީމާ، އެއީ ހައިރާންވާން ޖެހޭ ކަމެއް ނޫން. ގާޒާގެ ކޮންމެ ސެންޓިމީޓަރަކަށް ބޮން އަޅަނީ، ރައްކާތެރި ސަރަހައްދެއް ނެތް." އިބްރާހިމް ފްރެއިހަތު ވިދާޅުވިއެވެ.
މި ބޮމުގެ ހަމަލާއާ ގުޅިގެން ފަލަސްތީނުގެ އިންސާނީ ހައްގުތަކަށް މަސައްކަތްކުރާ ޖަމާއަތަކުން ބުނީ، އިޒްރޭލުން ދިން ބޮމުގެ ހަމަލާއަކީ ހަނގުރާމައިގެ ޖަރީމާއެއް ކަމަށެވެ.
މި ބޮމުގެ ހަމަލާ ދިނުމުގެ ކުރިން އޮތް ހާލަތު ބަޔާންކޮށް ހެލްތް މިނިސްޓްރީން ބުނެފައި ވަނީ އިޒްރޭލުން ގާޒާއަށް ދިން ހަމަލާތަކުގައި ޝަހީދުވި މީހުންގެ އަދަދު 3000 އަށް އަރާފައިވާ ކަަމަށެވެ. އަދި ޒަހަމްވި މީހުންގެ އަދަދު ވަނީ 12500 އަށް އަރާފައިވާ ކަމަށެވެ. ހޮސްޕިޓަލް ބޮމުގެ ހަމަލާއާއެކު ޝަހީދުވެ މީހުންގެ އަދަދު 4000 އާ ގާތްކުރާނެ ކަމަށް ބެލެވެއެވެ.
