އިޒްރޭލުން ގާޒާއަށް ދެމުންދާ ހަމަލާތަކުގައި ޝަހީދު ވި މީހުންގެ އަދަދު 3000 އަށް އަރާފައިވާ ކަމަށް ފަލަސްތީނުގެ ސިއްހަތާބެހޭ ވުޒާރާއިން ބުނެފިއެވެ.
އެ ވުޒާރާއިން ބުނީ، އިޒްރޭލުން ގާޒާއަށް ދިން ހަމަލާތަކުގައި ޝަހީދުވި މީހުންގެ އަދަދު 3000 އަށް އަރާފައިވާ އިރު، ޒަހަމްވި މީހުންގެ އަދަދު ވަނީ 12500 އަށް އަރާފައެވެ. އަދި ހުޅަނގު އައްސޭރީގައި މިހާތަނަށް 61 މީހުން މަރުވެ، 1250 މީހުން ވަނީ ޒަހަމްވެފައެވެ.
ޝަހީދު ވި މީހުންގެ ތެރޭގައި ގިނައީ ކުޑަކުދިންނާއި އަންހެނުން ކަމަށް ރިޕޯޓްތަކުން ބުނެއެވެ. އެގޮތުން މިހާތަނަށް 1200 އެއްހާ ކުޑަކުދިން ވަނީ ޝަހީދުވެފައެވެ.
މިއަދު ފަތިހުގެ ވަގުތެއްގައި އިޒްރޭލުން ވަނީ ހާން ޔޫނިސްގެ ހުޅަނގާއި އިރުދެކުނުފަރާތާއި ރަފާހުގެ ހުޅަނގުގެ ގެތަކަށް ހަމަލާތައް ދީފައެވެ. އެ ހަމަލާތަކުގައި ފަލަސްތީނުގެ 70 އަށް ވުރެ ގިނަ މީހުން ވަނީ ޝަހީދުވެފައެވެ.
މި މަހުގެ 9 ވަނަ ދުވަހު އިޒްރޭލުން ހަނގުރާމަ އިއުލާން ކޮށްފައިވާ އިރު ވޭތުވެ ދިޔަ 8 ދުވަހުގެ ތެރޭގައި ފަލަސްތީނުގެ އެއް މިލިއަން މީހުން ގެދޮރު ގެއްލިފައިވާ ކަމަށް އދ. އިން ބުނެފައި ވެއެވެ.
ގާޒާގެ ރައްޔިތުން، ރައްކާތެރިކަމަށްޓަކައި ހޮސްޕިޓަލްތަކަށާއި އދ.ގެ ސްކޫލްތަކަށް ޖަމާވެފައި ވަނީ އިޒްރޭލުން ބައިނަލްއަގްވާމީ ގާނޫނުތަކަށް ބޯލަނބާނެ ކަމަށާއި އެ ތަންތަނަށް ހަމަލާ ނުދޭނެ ކަމުގެ އުއްމީދުގައެވެ. ނަމަވެސް އެ ތަންތަނަށް ވެސް އިޒްރޭލުން ވަނީ ހަމަލާދީފައެވެ.
މިދިޔަ ހަފްތާގެ ހޮނިހިރު ދުވަހުން ފެށިގެން ގާޒާގައި ހަލާކުވެފައިވާ ނުވަތަ ބަންދުކޮށްފައިވާ އުމްރާނީ ވަސީލަތްތަކަށް ބަލާ އިރު، ތައުލީމް ފޯރުކޮށްދޭ 90 ތަނަކާއި 18 މިސްކިތަކަށް ގެއްލުން ވެފައިވާ އިރު، 11 މިސްކިތެއް ވަނީ އެކީ ހަލާކު ވެފައެވެ. 11 ފެން އުފައްދާ ތަންތަނާއި 20 އެމްބިއުލާންސް ވަނީ ސުންނާފަތިވެފައެވެ. ހަމައެއާއެކު 64،000 އަށް ވުރެ ގިނަ ގެތަކަށް ގެއްލުން ވެފައިވާ އިރު، އޭގެތެރެއިން 5540 ގެ ވަނީ އެކީ ސުންނާފަތި ވެފައެވެ.
2.3 މިލިއަން މީހުންގެ އާބަދީއެއް އޮތް ގާޒާގެ 47 ޕަސެންޓަކީ ކުޑަކުދިންނެވެ. އަދި އޭގެތެރެއިން 1.7 މީހުން ދިރިއުޅެމުން އަންނަނީ ރެފިއުޖީ ކޭމްޕް ތަކުގައެވެ.
