ފަލަސްތީނުގެ ޑޮކްޓަރަކަށް އޭނާގެ ދަރިފުޅު ޝަހީދުވި ކަން އެނގުނީ އޭނާ ހޮސްޕިޓަލުގައި މަސައްކަތް ކުރަމުން ދިޔަ ވަގުތު އެ ހޮސްޕިޓަލަށް ގެނައި މީހުންގެ ތެރެއިން އެ ކުއްޖާގެ ހަށިގަނޑު ފެނިގެން ކަމަށް އަލް އަރަބިއްޔާ ނޫހުން ރިޕޯޓް ކޮށްފިއެވެ.
އެ ނޫހުން އާންމު ކުރި ވީޑިއޯގައި އޭނާގެ ދަރިފުޅު ވަކިވެގެން ދިޔަ ހިތާމައިގައި އޭނާގެ އާއިލާއާ އެކު ވަގުތު ހޭދަކުރަމުން ދިޔަ މަންޒަރު ފެނެއެވެ. އަންހެނެއްގެ ގައިގާ އޭނާ ބައްދާލާ މަންޒަރު ފެންނަ އިރު، ކުޑަކުއްޖަކު އުރައިގެން ހުންނަ ފިރިހެނަކު ވެސް އެމީހުންގެ ކައިރީގައި ހުރެއެވެ. އުރުގައި އިން ކުއްޖާ އޭރު އެ ޑޮކްޓަރާ ދިމާއަށް އަތް ދިއްކޮށް އޭނާގެ ހެދުމުގައި ހިފާ ދަމައި، ރޮމުންދާ މަންޒަރު ފެނެއެވެ. އެ އަންހެންމީހާގެ ގައިން ދޫކޮށްލުމަށް ފަހު އެ ޑޮކްޓަރު އެ ކުއްޖާގެ ގައިގާ ފިރުމާލައެވެ.
ޝަހީދުވެފައިވާ އޭނާގެ ދަރިފުޅުގެ މޫނު ބެލުމަށްފަހު އޭނާ އެތަނުން ދާ މަންޒަރު ވެސް އެ ވީޑިއޯއިން ފެނެއެވެ. މޫނުގައި އަތް އަޅައިގެން ހުރެ އެތަނުން ނިކުމެގެން އޭނާ ދާ އިރު އިތުރު މީހަކު އެ ޑޮކްޓަރު ގާތަށް ޖެހޭ ތަން ވެސް ފެނެއެވެ.
އިޒްރޭލުން ދެމުންދާ ހަމަލާގައި އަނިޔާވި މީހުންނަށް ފަރުވާ ދިނުމަށް ގާޒާގެ ހޮސްޕިޓަލްތައް ވަނީ ފުރިފައެވެ. ޒަހަމްތަކުގައި ބޭސް އެޅުމަށްފަހު އަވަސް އަރުވާލައި، މީހުން ހޮސްޕިޓަލުން ދޫކޮށްލާ އިރު، މި ވަގުތު ވެސް ހޮސްޕިޓަލްތަކުގައި ވެންޓިލޭޓަރުގައި ފަރުވާ ދެމުންދާ އެތައް ކުދިންނެއް އެބަ ތިއްބެވެ.
ޑޮކްޓަރެއް ޑިއުޓީ އަދާ ކުރަމުން ދަނިކޮށް އޭނާގެ ދަރިފުޅު ޝަހީދުވި ހަބަރު ލިބިފައިވާ އިރު، މީގެ ފަސް ދުވަސް ކުރިން ފަލަސްތީނުގެ ނަރުހަކަށް އޭނާގެ ފިރިމީހާ ޝަހީދުވި ކަމުގެ ހަބަރު ލިބުނީ ގާޒާގެ ޖަބާލިއާ މާރުކޭޓަށް އިސްރާއީލުން ދިން އަނިޔާވެރި ވައިގެ ހަމަލާތަކާ ގުޅިގެން އަލްޝިފާ ހޮސްޕިޓަލުގައި ޑިއުޓީގައި އުޅެނިކޮށެވެ.
އެ ހަލަބޮލިކަމުގެ ތެރޭގައި، ނަރުހަށް އިހުސާސްވި ހިތާމަވެރި ވަގުތުތައް ދައްކުވައިދޭ ވީޑިއޯއެއް ސޯޝަލް މީޑިއާގައި ވަނީ ވައިރަލް ވެފައެވެ. އެ ވީޑިއޯއިން ފެންނަނީ، ޑިއުޓީ އަދާކުރާ ހެދުމުގައި އޭނާ ހުރެ، އޭނާގެ ފިރިމީހާ ބަލި މީހުންނަށް ފަރުވާ ދެމުން ދަނިކޮށް ޝަހީދަކަށް ވެއްޖެ ކަމަށް ބުނެ އޭނާ އަޑު އުފުލާ މަންޒަރެވެ. އަދި އޭނާގެ އަންހެން ދަރިފުޅު ފެނުމުން، ކަރުނަ އަޅާ ރޮމުން "ބައްޕަ ޝަހީދު ވެއްޖެ" ކަމަށް އޭނާ ބުނެއެވެ.
ދެ އަންހެނުން އައިސް އެ ނަރުސް ގައިގާ ބައްދާލައިގެން ތިބެ ރޮމުން ދިޔަ އިރު މާ ގިނަ އިރެއް ނުވެ އެ ނަރުސް މީހާ ހަބަރު ހުސްވެގެން އެތަނަށް ވެއްޓެއެވެ.
