މިއަދު ބޭއްވި ރިޔާސީ އިންތިހާބުގައި ބެހެއްޓި 586 ފޮޓީގެ ތެރެއިން 293 ފޮށި ގުނައިފިއެވެ.
އެ ފޮށިތަކުގެ ނަތީޖާ ދައްކާ ގޮތުގައި 51،350 ވޯޓާއެކު ކުރި ހޯއްދަވާފައިވަނީ ޕީއެންސީގެ ރިޔާސީ ކެންޑިޑޭޓް، ޑރ. މުހައްމަދު މުއިއްޒެވެ. އަދި އެއީ 54 ޕަސެންޓަށްވާއިރު މި އިންތިހާބުގައި ވާދަކުރެއްވި ރައީސް އިބްރާހިމް މުހައްމަދު ސޯލިހަށް 293 ފޮށިން ލިބިވަޑައިގެންފައިވަނީ 43،897 ވޯޓެވެ.
މި މަހުގެ 9 ވަނަ ދުވަހު ރިޔާސީ އިންތިހާބުގެ ފުރަތަމަ ބުރު ބާއްވާފައިވަނީ އަށް ކެންޑިޑޭޓުންނާއެކުއެވެ. އެއްވެސް ކެންޑިޑޭޓަކަށް އެ ބުރުގައި 50 ޕަސެންޓް ލިބިވަޑައިގެންފައިނުވާއިރު ދެވަނަ ބުރުގައި މި ވާދަކުރެއްވީ އެ ބުރުގައި އެންމެ ގިނަ ވޯޓު ލިބިވަޑައިގެން ދެ ކެންޑިޑޭޓުންނެވެ.
ފުރަތަމަ ބުރުގައި 46.06 ޕަސެންޓާއެކު މުއިއްޒަށް 101،635 ވޯޓު ލިބިވަޑައިގެންނެވިއިރު ރައީސް ސޯލިހަށް ލިބިވަޑައިގެންފައިވަނީ 39.05 ޕަސެންޓާއެކު 86،161 ވޯޓެވެ.
ރިޔާސީ އިންތިހާބުގެ ފުރަތަމަ ބުރުގައި ވޯޓުލުމުގެ ހައްގު 282,394 މީހުންނަށް ލިބުނުއިރު ދެވަނަ ބުރުގައި އަލަށް ވޯޓުލެވޭ 409 މީހުންނާއެކު ޖުމްލަ 282,804 މީހުންނަށް ވޯޓުލުމުގެ ހައްގު ލިބިގެންވެއެވެ. ދެވަނަ ބުރުގައި ރާއްޖޭގެ އެކި ކަންކޮޅުތަކުގައި 586 ވޯޓު ފޮށި ބަހައްޓާފައިވެއެވެ. އޭގެ ތެރެއިން މާލެ ސަރަހައްދުގައި 187 ފޮށި ބަހައްޓާއިރު އަތޮޅުތަކުގައި 3119 ފޮށީ އަދި ރިސޯޓުތަކުގައި 5 ފޮށި ވަނީ ބަހައްޓާފައެވެ.
އަނިޔާވެރި ނުކިޔަވާ ޖާހިލު ކޮރަޕްޓް ޑިކްޓޭޓަރުގެ ދައުރު އިންޝާﷲ ނިމުނީ. އަލްޙަމްދު ލިﷲ.