ކުރީގެ އެމްޑީޕީގެ އެކްޓިވިސްޓް އަދި ދަ ޑިމޮކްރެޓްސްގެ ހަރުގޭގެ ވެރިޔާ، ޝަފިއްޔާ ޒުބައިރު އިދިކޮޅު ޕީއެންސީގެ ރިޔާސީ ކެންޑިޑޭޓް، ޑރ. މުހައްމަދު މުއިއްޒުގެ ކެމްޕެއިނަށް ނިކުމެއްޖެއެވެ.
ޝަފިއްޔާއަކީ އެމްޑީޕީގައި ގިނަ ދުވަސްތަކެއް ވަންދެން އިސްކޮށް އުޅުނު މީހަކަށް ވާއިރު މީގެ ކުރިން އެމްޑީޕީގެ ހަރުގެ ވެސް ހިންގަމުން ދިޔައީ އޭނާގެ ގޭގައެެވެ. އެހެންނަމަވެސް އެމްޑީޕީ ބައިބައިވެ، އުފެއްދި ދަ ޑިމޮކްރެޓްސްގެ މެންބަރެއްގެ ގޮތުގައި އެ ޕާޓީގައި ޝަފިއްޔާ އަންނަނީ އިސްކޮށް މަސައްކަތް ކުރަމުންނެވެ. އަދި އެމްޑީޕީ ހަރުގެ ހިންގަމުން ދިޔަ ތަނުގައި މިހާރު ހިންގަމުންދަނީ ޑިމޮކްރެޓްސްގެ ހަރުގެއެވެ.
އެ ހަރުގެ އެމްޑީޕީ އަތުން ހޯދުމަށް މީގެ ކުރިން ޝަފިއްޔާ ސިވިލް ކޯޓަށްވެސް ގޮސްފައި ވަނިކޮށް ޑިމޮކްރެޓުން އެތަނަށް ވަނީ ތަޅު ހަލާކުކޮށްލައި ގެންނެވެ.
މި މަހުގެ 9 ވަނަ ދުވަހު ބޭއްވި ރިޔާސީ އިންތިހާބުގެ ފުރަތަމަ ބުރުގައި 8 ކެންޑިޑޭޓަކު ކުރިމަތިލެއްވިއިރު ޝަފިއްޔާ އޭރު ތާއީދުކުރެއްވި އިލްޔާސް ލަބީބް ތިން ވަނައަށް ގޮސްފައިވަނީ 15,789 ވޯޓާއެކުގައެވެ. އެ ބުރުގައި އިލްޔާސްގެ ކެމްޕެއިނުގައި އިސްކޮށް ޝަފިއްޔާ ހަރަކާތްތެރި ވިއެވެ.
މި އަންނަ ހޮނިހިރު ދުވަހު ބާއްވާ އެ އިންތިހާބުގެ ދެވަނަ ބުރުގައި ރައީސް އިބްރާހިމް މުހައްމަދު ސޯލިހާއި މުއިއްޒު ވާދަކުރައްވާއިރު ޑިމޮކްރެޓްސްއިން އެއްވެސް ކެންޑިޑޭޓަކަށް ތާއީދު ނުކުރަން ވަނީ ނިންމާފައެވެ. އެއާއެކު ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވެސް ވަނީ ވަކި ކެންޑިޑޭޓަކަށް ތާއީދު ނުކުރައްވަން ނިންމަވާފައެވެ. އެހެންނަމަވެސް އެ ޕާޓީގެ ގިނަ މެންބަރުންތަކެއް ގެންދަނީ މުއިއްޒަށް ތާއީދު ކުރަމުންނެވެ.
