ރިޔާސީ އިންތިހާބުގެ ފުރަތަމަ ބުރުގައި މެޖޯރިޓީ ނުލިބުނު ރަށްތަކުންވެސް ކުރިއަށްވުރެ ރަނގަޅުވާނެ ކަަމަށް އިދިކޮޅު ޕީއެންސީގެ ރިޔާސީ ކެންޑިޑޭޓް، ޑރ. މުހައްމަދު މުއިއްޒު ވިދާޅުވެއްޖެއެވެ.
މި މަހުގެ 30 ވަނަ ދުވަހު ބާއްވާ ރިޔާސީ އިންތިހާބުގެ ދެވަނަ ބުރުގެ ކެމްޕެއިނަށް ނ، ރ، ބ، ޅ އަތޮޅާއި ކުޅުދުއްފުށި ސިޓީއަށް ކުރެއްވި ދަތުރު ނިންމަވާލެއްވުމަށް ފަހު ދެއްވި އިންޓަވިއުއެއްގައި މުއިއްޒު ވިދާޅުވީ ފުރަތަމަ ބުރުގައި މެޖޯރިޓީ ނުލިބުނީ އއ އަތޮޅާއި ޅ އަތޮޅު އަދި އައްޑޫ ސިޓީއިން ކަމަށާއި އެ ސިޓީގައިވެސް މަސައްކަތްތަކެއް ކުރެވެމުންދާ ކަމަށެވެ.
އއ އަތޮޅަށާއި ޅ އަތޮޅަށްވެސް ވަޑައިގެންނެވިއްޖެކަން ފާހަގަ ކުރައްވާ މުއިއްޒު ވިދާޅުވީ ކުރިއަށްވުރެ ރަނގަޅުވާނެކަމަށް ގަބޫލުކުރައްވާ ކަމަށާއި މެޖޯރިޓީއާ ހަމައަށްދާނެތޯ ނުވަތަ ނޫންތޯ ދަންނަވަން އެނގިވަޑައި ނުގަންނަވާ ކަމަށެވެ.
މުއިއްޒު ވިދާޅުވީ ދެވަނަ ބުރުގެ ކެމްޕެއިން ފެށުނީންސުރެ ގާތްގަނޑަކަށް 50 ވަރަކަށް ރަށަށް ވަޑައިގަނެވިއްޖެ ކަމަށާއި ފާހަގަވެގެން ދިޔައީ ފުރަތަމަ ބުރުގައި ފާހަގަވި ކަންތައްތައް ކަމަށެވެ. އެއީ ރައްޔިތުން ތިބީ މާޔޫސް ކަމުގައި ކަމަށާއި ރައްޔިތުން އެދޭ ކަންތައްތަކެއް ނުވެފައި ހުރިތަން ފެނިވަޑައިގެންނެވި ކަމަށް މުއިއްޒު ވިދާޅުވިއެވެ. އަދި މުއިއްޒު ވެރިކަމެއްގައި ކަންތައްތަކަކަށް ރައްޔިތުން އުންމީދު ކުރާ ކަމަށް އޭނާ ފާހަގަ ކުރެއްވިއެވެ.
މުއިއްޒު ވިދާޅުވީ ޕަސެންޓޭޖުން ދަންނަވަން އެނގިވަޑައި ނުގެންނެވި ނަމަވެސް ދެވަނަ ބުރުގައި ކާމިޔާބު ލިބިވަަޑައިގަންނަވާނެ ކަމަށް ގަބޫލުކުރެއްވޭ ކަމަށެވެ.
މިދިޔަ ބުރުގައި މެޖޯރިޓީ ގެއްލުނު ތިން އަތޮޅުންވެސް މެޖޯރިޓީ ގެއްލުމުގައި މާ ބޮޑު ފަރަގެއް ނެތެވެ. އައްޑޫ ސިޓީއިން މުއިއްޒަށް ލިބިވަޑައިގެންފައި ވަނީ 42.79 ޕަސެންޓް ކަމަށް ވާއިރު އއ އަތޮޅުން ލިބިވަޑައިގެންފައި ވަނީ 40.18 ޕަސެންޓެވެ. އައްޑޫ އަދި އއ އަތޮޅުން އެމްޑީޕީގެ ރިޔާސީ ކެންޑިޑޭޓް، ރައީސް އިބްރާހިމް މުހައްމަދު ސޯލިހު މެޖޯރިޓީ ނަންގަވާފައި ވަނީ 5 ޕަސެންޓްގެ ތަފާތަކުންނެވެ.
ޅ އަތޮޅުން މުއިއްޒަށް 44 ޕަސެންޓް ލިބިވަޑައިގެންނެވި އިރު އެ އަތޮޅުން ރައީސް ސޯލިހު މެޖޯރިޓީ ނަންގަވާފައި ވަނީ 2 ޕަސެންޓުގެ ފަރަގަކުންނެވެ.
