ވޯޓު ހޯދަން [އެމްޑީޕީ] އައުމުން ރައްޔިތުންގެ ނަމުގައި ދަރަނި ނަގައިގެން މި ސަރުކާރުން ކުރީ ކީއްތޯ އަހާ އެމީހުންނާ ސުވާލުކުރުމަށް އިދިކޮޅު ޕީއެންސީގެ ރިޔާސީ ކެންޑިޑޭޓް، ޑރ. މުހައްމަދު މުއިއްޒު ގޮވާލައްވައިފިއެވެ.
މުއިއްޒު މިހެން ވިދާޅުވީ މި މަހުގެ 30 ވަނަ ދުވަހު ބާއްވާ ރިޔާސީ އިންތިހާބުގެ ދެވަނަ ބުރުގެ ކެމްޕެއިނަށް މިހާރު ރ އަތޮޅަށް ކުރައްވަމުން ގެންދަވާ ދަތުރުގައި އެ އަތޮޅު ހުޅުދުއްފާރަށް ވަޑައިގެން އެ ރަށުގައި މިރޭ ބޭއްވި ޖަލްސާގައި ވާހަަކަ ދައްކަވަމުންނެވެ.
މި ސަރުކާރުގެ ކޮރަޕްޝަންގެ މިސާލެއްގެ ގޮތުގައި މުއިއްޒު ވަނީ ކޮވިޑްގެ ތެރޭގައި 30 އެތައް މިލިއަން ރުފިޔާއެއް ދީގެން ވެންޓިލޭޓަރުތައް ގެންނަން އުޅެ އުޅެ ނުގެނެވުނު ކަމަށް ވިދާޅުވެފައެވެ. އަދި އެ ސުވާލަށް ޖަބާވު ނުދީ އަނެއްކާވެސް ވޯޓު ހޯދަން އައުމުގެ މޯރަލް އޮތޯރިޓީވެސް ނެތް ކަމަށާއި 30 މިލިއަނާއި އެއިން ނުލިބުނު ވެންޓިލޭޓަރުތައް ވީތަނެއް ކޮބައިތޯ ރައްޔިތުން ސުވާލުކުރަން ޖެހޭ ކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ މާލެއާއި ތިލަމާލެ އާ ދެމެދު އަޅާ ބްރިޖަކީ 700 މިލިއަން ޑޮލަރު ލޯނެއް ނަގައިގެން ކުރާ މަސައްކަތެއް ކަމަށާއި އޭގެ ތެރެއިން ގާތްގަނޑަކަށް 190 މިލިއަން ޑޮލަރު ބޭނުންކޮށް ނިންމާފައި ވާއިރު ބްރިޖްގެ ތަނބެއްވެސް ފެންނަން ނެތް ކަމަށެވެ.
ފެންނަން އޮތީ ކޯއްޗެއްތޯ ސުވާލު އުފައްދަވާ އޭނާ އަޅާ ކިޔުއްވީ ރައީސް އަބްދުﷲ ޔާމީންގެ ވެރިކަމުގައި މާލެއާއި ހުޅުލެއާ ދެމެދު އެޅި ބްރިޖާއެވެ. ވިދާޅުވީ އެއީވެސް 190 މިލިއަން ޑޮލަރުގެ ބްރިޖެެއް ކަމަށާއި ހަރަދު ކޮށްގެން ބްރިޖް ފެންނަން އެބައޮތް ކަމަށެވެ.
މުއިއްޒު އިތުރަށް ވިދާޅުވީ މިހާރު އެކުރާ ހަރަދުން ތިލަމާލެ ބްރިޖު ފެންނަން ނެތް އިރު ރައްޔިތުންގެ ސުވާލުތަކަށް ޖަވާބު ނުދީ ރައްޔިތުންގެ ކައިރިއަށް އައުމުން ސުވާލުކުރަން ޖެހޭނެ ކަމަށެވެ. ތިލަމާލެ ބްރިޖާ ގުޅޭ ގޮތުން ޖޯކު ޖައްސަވަމުން މުއިއްޒު ވިދާޅުވީ ޖުލައި މަހުގެ ތެރޭގައި އެ ބްރިޖުން ދަތުރުކުރެވޭނެ ކަމަށް ކުރިން ބުނި ނަމަވެސް ދުއްވެނީ ފެރީގައި ކަމަށެވެ.
މުއިއްޒު ވިދާޅުވީ ގައުމުގެ ކަންކަން ހުރި ގޮތަށް ބަލާއިރު ގައުމުގައި މި ސަރުކާރަށް އަމިއްލަ ބަހެއް ނުބުނެވޭ ކަމަށާއި ސަރުކާރުގެ މިނިވަންކަން ނެތް ކަމަށެވެ. އަދި "ދިވެހިންގެ ރާއްޖެއަކީ" މާ ރީތި ނަމަކަށް ވެގެން ހިޔާރުކުރެއްވި ޝީއާރެއް ނޫން ކަމަށާއި އެއީ ކޮންމެ ފަހަރަ ދިވެހިންގެ އަތުން ދިވެހިންގެ ރާއްޖެ ބީވެގެން ދިޔައިމައި މި ގައުމު ސަލާމަތް ކުރެއްވި އަބުތާލުންގެ ޖިހާދުގެ ނަތީޖާ ކަމަށް މުއިއްޒު ވިދާޅުވިއެވެ.
މުއިއްޒު އިތުރަށް ވިދާޅުވީ މިހާރު ވަނީ އެއްވެސް ކަނޑިއެއް ބަޑިއެއް ބޭނުންނުކޮށް ދިވެހިންގެ އަތުން ދިވެހިންގެ ރާއްޖެ ގެންގޮސްފައި ކަމަށާއި ދެން ޖެހެނީ ގައުމީ މަސައްކަތެއް ކުރައްވަން ކަމަށެވެ.
އޭނާ އެވާހަކަ އިޝާރާތް ކުރެއްވީ ރާއްޖޭގެ މައްޗަށް އޮތް އިންޑިއާގެ ނުފޫޒަށް އިޝާރާތް ކުރައްވައެވެ.
