ޕީއެންސީގެ ރިޔާސީ ކެންޑިޑޭޓް، މާލެ ސިޓީގެ މޭޔަރު ޑރ. މުހައްމަދު މުއިއްޒުގެ ކެމްޕެއިން ހަރަކާތުގައި ކުރީގެ ރައީސް އަބްދުﷲ ޔާމީންގެ އަނބިކަނބަލުން، ކުރީގެ ފަސްޓް ލޭޑީ ފާތިމަތު އިބްރާހިމް މިރޭ ރަސްމީކޮށް ބައިވެރިވެވަޑައިގަންނަވަން ނިންމަވައިފިއެވެ.
ޕީޕީއެމް އެކްޓިވުސްޓުން ބުނާ ގޮތުގައި، މިރޭ 8:30 ގައި ބޮޑުތަކުރުފާނު މަގުގައި ހުންނަ ދިވެހީންގެ ޖަގަހައަށް މެޑަމް ފާތުން ވަޑައިގަތުމަށް ވަނީ ހަމަޖެހިފައެވެ. އެހެން ކަމުން އެ ގަޖަހައަށް ޕީޕީއެމްގެ މެންބަރުން ދިޔުމަށް ވެސް ވަނީ އެދިފައެވެ.
މިއީ ރިޔާސީ ކެމްޕެއިންގައި މުއިއްޒު ވާދަ ކުރައްވަން ނިންމެވި ފަހުން މެޑަމް ފާތުން މުއިއްޒުގެ ކެމްޕެއިން ހަރަކާތެއްގައި ބައިވެރިވެވަޑައިގަންނަވާ ފުރަތަމަ ފަހަރެވެ. މިދިޔަ ރިޔާސީ ކެމްޕެއިންގައި ރައީސް ޔާމީންއާއެކު މެޑަމް ފާތުން ވަރަށް އިސްކޮށް ހަރަކާތްތެރި ވެވަޑައިގެންފައި ވާއިރު، މިއީ މުއިއްޒުއަށް ބޮޑު ތާއީދެއް ލިބޭނެ ކަމެއްގެ ގޮތުގައި ގިނަ ބަޔަކު އަންނަނީ ފާހަގަ ކުރަމުންނެވެ.
ރައީސް ޔާމީނަށް ވެރިކަމުގެ ދެ ވަނަ ދައުރެއް ހޯއްދަވައި ދެއްވަން އެންމެ ބުރަކޮށް މަސައްކަތްޕުޅު ކުރެއްވީ ފަސްޓް ލޭޑީ ފާތުން ކަމަށް ރައީސް ޔާމީންވެސް ވިދާޅުވެފައި ވެއެވެ. ނަމަވެސް އެ އިންތިހާބުގެ ނަތީޖާ އިއުލާން ކުރި ފަހުން އެކަމަނާ އާއްމުންގެ ތެރެއަށް ނުކުމެވަޑައިގެންފައެއް ނުވެއެވެ. އޭގެ ފަހުން ސިޔާސީ މަސައްކަތަކުން ވެސް ނުފެނެއެވެ.
