ޕީޕީއެމްއިން އިންތިހާބު ބޮއިކޮޓް ކުރުމަކީ ރައީސް އިބްރާހިމް މުހައްމދު ސޯލިހަށް އިންތިހާބު ކާމިޔާބު ކުރެއްވުމަށް އެންމެ ފުރުސަތު ބޮޑުވާނެ ގޮތް ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު މިފަދައިން ވިދާޅުވެފައި ވަނީ އަންނަ ރިޔާސީ އިންތިހާބު ބޮއިކޮޓު ކުރަން އިރުޝާދު ދެއްވައި އެކަމުގައި ޕީޕީއެމް އަދި ޕީއެންސީގެ ޖޮއިންޓް ސެނޭޓްގެ ލަފާ ހޯއްދަވަން ކުރީގެ ރައީސް އަބްދުﷲ ޔާމީން ހުށަހަޅުއްވާފައި ވާތީއެވެ. މިފަދަ ހުށަހެޅުމެއް ޔާމީން ހުށަހަޅުއްވާފައި ވަނީ ރިޔާސީ އިންތިހާބުގައި އެމަނިކުފާނަށް ވާދަ ނުކުރެއްވޭނެ ކަމަށް ސުޕްރީމް ކޯޓުން މިއަދު ހުކުމް ކުރުމާ ގުޅިގެންނެވެ.
އިންތިހާބު ބޮއިކޮޓް ކޮށްފިނަމަ ވާނެ ގޮތާމެދު އަދިވެސް ވިސްނުމަށް އިރުޝާދު ދެއްވާ ނަޝީދު ވަނީ އިންތިހާބު ބޮއިކޮތް ކުރުމުގެ ބަދަލުގައި ޑިމޮކްރެޓްސް އާ ގުޅިގެން ރިޔާސީ އިންތިހާބުގައި ވާދަ ކުރުމަށް ގޮވާލައްވާފައެވެ. އަދި މާތް ﷲގެ އިރާދަފުޅާއެކު ކާމިޔާބުވާނެ ކަމަށް ނަޝީދު ވަނީ ވިދާޅުވެފައެވެ.
ކުރީގެ ރައީސް ޔާމީނަށް ރިޔާސީ އިންތިހާބުގައި ވާދަ ނުކުރެއްވޭނެ ކަމަށް ސުޕްރީމް ކޯޓުން މިއަދު ހުކުމް ކުރުމާ ގުޅިގެން އިންތިހާބު ބޮއިކޮޓް ކުރުމަށް ރައީސް ޔާމީން ލަފާ ދެއްވައި އެކަމުގައި ސެނޭޓުން ދެކޭގޮތް އެންގެވުމަށް ޔާމީން އަންގަވާފައި ވާ ކަމަށް ނައިފަރު ދާއިރާގެ މެންބަރު އަހުމަދު ޝިޔާމް ވަނީ "ދަ ޕްރެސް" އަށް ޔަގީން ކޮށްދެއްވާފައެވެ.
ޝިޔާމް ވިދާޅުވީ އެކަމުގައި ޕީޕީއެމްގެ ސެނެޓުގެ މެންބަރުން ދެކޭ ގޮތް އެނގިވަޑައިގަންނަވަން ރައީސް ޔާމީން އެދިވަޑައިގަންނަވާ ކަމަށެވެ. އެކަމާ ގުޅިގެން ސެނޭޓުގެ ބައްދަލުވުމެއް އޮތް އިރު ސެނޭޓުގެ ނިންމުން އަދި ސާފެއް ނުވެއެވެ. އިންތިހާބު ބޮއިކޮޓް ކުރުމާމެދު ޕީޕީއެމް ސެނެޓުގެ މެންބަރުން ދެކޭ ގޮތް ރައީސް ޔާމީން ބައްލަވަން ބޭނުންފުޅުވެގެން ހުށަހަޅުއްވާފައި ވާއިރު ދެން ރައީސް ޔާމީން އަށް މިއަހަރުގެ ރިޔާސީ އިންތިހާބުގައި ވާދައެއް ނުކުރެއްވޭނެއެވެ.
ރައީސް ޔާމީންގެ ކެންޑިޑެސީ ބަލައި ނުގަތް މައްސަލައިގައި މިއަދު ހުކުމް ކުރުމަށް ބޭއްވި އަޑުއެހުމުގައި ފުރަތަމަ ރައުޔު އިއްވެވި ފަނޑިޔާރު ހުސްނުއް ސުއޫދު ވިދާޅުވީ ކްރިމިނަލް ކޯޓުން ރައީސް ޔާމީން 6 މަސް ދުވަހުގެ ތެރޭގައި ދައްކަން ހުކުމް ކޮށްފައިވާ 5 މިލިއަން ޑޮލަރު ނުދައްކާހާ ހިނދަކު އެއީ ސާބިތު ދަރަންޏެއް ކަމަށާއި ޖޫރިމަނާގެ ފައިސާ ދައްކަން ދިން މުއްދަތު ހަމަވިއިރު ނުދައްކާކަން މީރާގެ ނޯޓިސް އިން އެނގިވަޑައިގަންނަވާ ކަމަށާއި އެހެންކަމުން ޔާމީނުގެ ޝަރުތު ފުރިހަމަނުވާ ކަމަށް ކަނޑައެޅީ ގާނޫނާ އެއްގޮތަށް ކަމަށެވެ.
މިއާއެކު ފަނޑިޔާރު އަހުމަދު މުއުތަސިމް އަދުނާނާއި ފަނޑިޔާރު އަޒްމިރާލްދާ ޒާހިރާއި ފަނޑިޔާރު އާއިޝާ ޝުޖޫން މުހައްމަދާއި ފަނޑިޔާރު މަހާޒު އަލީ ޒާހިރާއި ފަނޑިޔާރު އަލީ ރަޝީދު ހުސައިންގެ އިތުރުން ފަނޑިޔާރު މުހައްމަދު އިބްރާހީމް ވަނީ ހުސްނުއް ސުއޫދުގެ ރައުޔުއަށް ތާއީދު ކުރައްވާފައެވެ.
ވ. އާރަށް ކުއްޔަށް ދިން މައްސަލައިގައި ރިޝްވަތު ހިފުމާއި މަނީ ލޯންޑަރިންގެ ކުށް ސާބިތުވެ 11 އަހަރުގެ ޖަލު ހުކުމެއްގައި ހުންނެވުމުގެ ސަބަބުން ޔާމީން އަށް ރިޔާސީ އިންތިހާބުގައި ވާދަ ނުކުރެއްވޭނެ ކަމަށް އިލެކްޝަން ކޮމިޝަން އިން ނިންމީ މިދިޔަ އަންގާރަ ދުވަހު އެވެ. އެ ކޮމިޝަނުން އެހެން ނިންމާފައި ވަނީ، ރައީސް ޔާމީންގެ މައްޗަށް ޖަލު ހުކުމެއް އޮތުމާއެކު ގާނޫނުއަސާސީގެ 109 ވަނަ މާއްދާ އަށް ރިއާޔަތް ކުރުމަށް ފަހުއެވެ. އެ މާއްދާގައިވާ ގޮތުން، ރައީސް ކަމަށް ކުރިމަތިލެވޭ މީހަކީ 12 މަސް ދުވަހަށް ވުރެ ދިގު މުއްދަތެއްގެ ހުކުމެއް ތަންފީޒު ކުރަމުންދާ މީހަކަށް ވެގެނެއް ނުވާނެއެވެ.
