އިދިކޮޅު ޕްރޮގްރެސިވް ކޮންގްރެސް ކޯލިޝަނުން ވެރިކަމަށް ކޮންމެ ބޭފުޅަކު އިންތިހާބު ވިޔަސް އެ ކޯލިޝަނުން ތަންފީޒުކުރާނީ އެ ކޯލިޝަންގެ ސިޔާސަތު ކަމަށާއި، އެ ސިޔާސަތަކީ "ރާއްޖޭގެ މުޅި ސިފަ ނައްތާލުން" ކަމަށް، ރައީސް އިބްރާހީމް މުހައްމަދު ސޯލިހު ސިފަކުރައްވައިފިއެވެ.
ހދ. އަތޮޅުގެ ރަށްރަށަށް ކުރައްވާ ކެމްޕެއިން ދަތުރުފުޅުގެ ތެރެއިން އެންމެ ފަހު ރަށަކަށް ހަނިމާދު އަށް ވަޑައިގެން ދެއްކެވި ވާހަކަފުޅުގައި ރައީސް ވިދާޅުވީ، ވޭތުވެދިޔަ ފަސް އަހަރު މި ސަރުކާރުން ކުރި ކަމަކީ ސިޔާސީ ހަލަބޮލިކަމާއި ހަމަނުޖެހުންތައް ނައްތާލުން ކަމަށާއި، ތަރައްގީގެ މަޝްރޫއުތައް ހަލުވި ދުވެއްޔެއްގައި ކުރިއަށް ދަނީ އެހެންވެ ކަމަށެވެ.
ހަނިމާދޫގައި ބޭއްވި ކެމްޕެއިން ޖަލްސާ އަށް ހާޒިރުވި އެމްޑީޕީގެ ސަޕޯޓަރުންގެ ކިބައިން އެމަނިކުފާނު އެދިވަޑައިގަތީ އެމަނިކުފާނުގެ މި ސަރުކާރާއި ކުރީގެ ރައީސް އަބްދުﷲ ޔާމީންގެ ސަރުކާރުގެ ސިޔާސަތުތަކުގެ ތަފާތު އަޅާ ކިޔައި، އަންނަ މަހު އޮންނަ ރިޔާސީ އިންތިހާބުގައި ވޯޓު ދިނުމަށެވެ. އެގޮތުން، ޔާމީންގެ ސަރުކާރުގައި މުޅި ހދ. އަތޮޅުގައި ހިންގުނީ 79 މަޝްރޫއު ކަމަށާއި، އެކަމަކު މި ސަރުކާރުން އޭގެ ގާތްގަނޑަކަށް ތިން ގުނަ މަޝްރޫއު ހިންގާފައިވާ ކަމަށް ވިދާޅުވިއެވެ.
ރާއްޖެ އަކީ ތަރައްގީކުރެވެން އޮތް، އަދި ތަރައްގީގެ މަންފާ ހޯދޭނެ ގައުމެއްކަން ފާހަގަކުރައްވައި ރައީސް ވިދާޅުވި ގޮތުގައި، މިހާރު ފަށާފައިވާ މަޝްރޫއުތައް ނިންމުމަށާއި އިތުރު މަޝްރޫއުތައް ފެށުމަށް ދެވަނަ ދައުރެއް މި ސަރުކާރަށް ބޭނުންވެއެވެ. އެމަނިކުފާނު ވިދާޅުވި ގޮތުގައި، މި ސަރުކާރުން ވެފައިވާ ވައުދުތައް ފުއްދަމުންދާ ކަމަށް ރައްޔިތުން ގަބޫލުކުރެއެވެ.
"އެއްވެސް ކަމެއް ސަރުކާރަކަށް އެ ދުވަހު ނުކުރެވޭ، ހިޔާލު ތަފާތުވާ މީހަކު ޖަލުގައި ބައިތިއްބައިގެން ނޫނިއްޔަކާ އެއް، ބިރުވެރިކަމެއްގަ ރައްޔިތުން ތިބެން ޖެހުނީ، އަނގައިން ބުނާ ކޮންމެ މީހަކު ކޮންމެ ނޫސްވެރިޔަކު، ކޮންމެ ޓީވީ ޗެނަލެއް ޖޫރިމަނާކުރަމުން ގެންދިޔައީ،" މިހާރުގެ އިދިކޮޅު ފަރާތްތަކަށް ފާޑުވިދާޅުވެ އެމަނިކުފާނު ވިދާޅުވިއެވެ.
އެމްޑީޕީގެ ގުޅިފައިވާ ކޯލިޝަން ނޫން އެހެން ބަޔަކު ވެރިކަމާ ހަވާލުވެއްޖެ ނަމަ، މިހާރު ފަށާފައިވާ މަޝްރޫއުތައް ހުއްޓޭނެ ކަމަށް ވިދާޅުވާ ވިދާޅުވުން ރައީސް ރޭ ވެސް ތަކުރާރުކުރެއްވިއެވެ.
ރައީސް ވިދާޅުވީ، އިދިކޮޅުގެ ސިޔާސަތަކީ ރައްޔިތުންނާއި ވެރިކަމުގެ ބާރުތައް އެއްތަނަކަށް ޖަމާކުރުން ކަމަށެވެ. އެމަނިކުފާނު ސިފަކުރެއްވީ މިއީ "މުޅި ރާއްޖޭގެ ސިފަ ނައްތާލުން" ކަމަށެވެ.
އެ މޭރުމުން ވާހަކަފުޅު ދައްކަވަމުން އެމަނިކުފާނު ވިދާޅުވީ، ބޮޑުތިލަދުންމަތި ސަރަހައްދަށް ތަރައްގީ އަދިވެސް ގެނެވޭނީ މި ސަރުކާރަށް ކަމަށެވެ.
"އެ ވިޝަނެއް އެ މިޝަނެއް އެ ބޭފުޅުންގެ (އިދިކޮޅުގެ) ނެތް، އެހެން ނަމަ މިއަދު މި ހުރިހާ ކަމެއް މިތާކު އެއްފަހަރާ ކުރާކަށް އަޅުގަނޑުމެންނަށް ނުޖެހުނީސް،" ރައީސް ވިދާޅުވިއެވެ.
