ރާއްޖޭން މިހާތަނަށް ނަގާފައިވާ ލޯނުތައް އަނބުރާ ދެއްކޭ ވަރަށް މީގެ ތިން އަހަރު ފަހުން ފައިސާ ހުންނާނެ ކަމަށާއި، ދެވަނަ ދައުރަކަށް އިންތިހާބު ވެވަޑައިގެންފި ނަމަ، ސަރުކާރުން ހުރިހާ ލޯނުތަކެއް އަދާކޮށް ނިންމަވާނެ ކަމަށް ރައީސް އިބްރާހީމް މުހައްމަދު ސޯލިހު ވައުދު ވެވަޑައިގެންފިއެވެ.
ކުރިއަށް އޮތް ރިޔާސީ އިންތިހާބުގައި ވެރިކަމުގެ ދެވަނަ ދައުރެއް ހޯއްދެވުމަށް ކުރިމަތިލައްވާފައިވާ މިހާރުގެ ރައީސް އިންތިހާބަށް ކެމްޕެއިން ކުރެއްވުމަށް ށ. މިލަންދު އަށް ވަޑައިގެން ދެއްކެވި ވާހަކަފުޅުގައި ވިދާޅުވީ، އެމްޑީޕީ އާއި ގުޅިފައިވާ ޕާޓީތަކުގެ ކޯލިޝަނުން އާންމުންނަށް ހޯދައިދޭން ބޭނުންވާ "އުފާވެރި އަމާން ރާއްޖޭ"ގެ މަލަމަތި ފެނިވަޑައިގަންނަވާ ކަމަށާއި، މިފަދަ ބޮޑު ބަދަލެއް ގެނެވުނީ ހަމަޖެހުމާއި ސުލްހަވެރިކަން ގާއިމް ކުރެވުމުގެ ސަބަބުން ކަމަށެވެ.
މިގޮތުން، މި ފަސް އަހަރުގެ ދައުރުގެ ތެރޭގައި އެއްވެސް މީހަކު ސިޔާސީ ބޭނުމެއްގައި ހައްޔަރު ނުކުރާ ކަމަށާއި، ނޫސްވެރިން ޖަލަށް ނުލާ ކަމަށާއި، ކޮވިޑް-19 ގެ ހާލަތު ފިޔަވައި ކުއްލި ހާލަތު އިއުލާނު ކޮށްފައި ނުވާ ކަމަށް އެމަނިކުފާނު ވިދާޅުވިއެވެ.
ތަރައްގީގެ މަޝްރޫއުތައް ކުރިއަށް ދާ ކަމަށް ވިދާޅުވެ، ރައީސް އާންމުކުރެއްވީ ހިސާބު އަދަދުތަކެކެވެ. އެގޮތުން:
- ކުރީގެ ރައީސް މުހައްމަދު ނަޝީދުގެ ވެރިކަމުގައި 19 މަޝްރޫއު ހިންގާފައިވޭ
- ކުރީގެ ރައީސް އަބްދުﷲ ޔާމީންގެ ވެރިކަމުގައި 56 މަޝްރޫއު ހިންގާފައިވޭ
- މި ވެރިކަމުގައި މިހާތަނަށް 159 މަޝްރޫއު ހިންގާފައިވޭ
ދެވަނަ ދައުރަކަށް ކުރިމަތިލެއްވި އެއް ސަބަބަކީ ރައީސް ވިދާޅުވި ގޮތުގައި، މިހާރު ފަށާފައިވާ ހުރިހާ މަޝްރޫއެއް ނިންމުމުގެ ބޭނުމުގައެވެ. ނަތީޖާއެއްގެ ގޮތުން ރާއްޖެ އަށް ހެޔޮ ބަދަލުތަކެއް އައިސް، ރާއްޖޭގެ އިގްތިސޯދު ދެ ގުނަ އަށް އިތުރުވެގެން ދާނެ ކަމަށް ވިދާޅުވާ ވިދާޅުވުން އެމަނިކުފާނު ތަކުރާރުކުރެއްވިއެވެ.
ރައީސް ވިދާޅުވީ، ކުރިއަށް އޮތް ފަސް އަހަރުގެ ދައުރެއްގައި އެމަނިކުފާނުގެ ތަސައްވުރަކީ އާންމުންނަށް އުފާވެރި ދިރިއުޅުމެއް ހޯދައިދީ އަމާން މުޖުތަމައެއް ގާއިމްކޮށް، ޒުވާނުންނަށް ފުރުސަތުތައް ފަހިކޮށްދީ ހެޔޮ ވެރިކަމެއް ގާއިމްކޮށްދިނުން ކަމަށެވެ.
ރޭގެ އިތުރުން، އެހެން ރަށްރަށަށް ވަޑައިގެން ވެސް މީގެ ކުރިން އެމަނިކުފާނު ދެއްކެވި ވާހަކަފުޅު ކަމަށްވާ ރާއްޖޭގެ އިގްތިސޯދު ދެ ގުނަ ވެގެން ދާނެ ކަމަށް ވިދާޅުވި ވާހަކަފުޅު ކޮންމެވެސް ވަރަކަށް ރޭ ތަފްސީލުކޮށްދެއްވިއެވެ. ރައީސް ވިދާޅުވީ:
- އިގްތިސޯދު ފުޅާވެގެން ދިއުމަށްޓަކައި ރަނގަޅު ދަތުރުފަތުރުގެ ނިޒާމަކާއި އެއް ތަނުން އަނެއް ތަނަށް ފަސޭހައިން މުދާތައް ބަދަލުކުރެވޭނެ ނިޒާމެއް އޮތުން މުހިންމުކަމަށް
- ވެލާނާ އެއާޕޯޓުގެ އާ ޓާމިނަލްގެ މަސައްކަތްތައް 2025 ގައި ނިމުމުން އަހަރަކު އެވަރެޖްކޮށް ހަތް މިލިއަން ފަތުރުވެރިންނަށް ހިދުމަތްތައް ދެވޭނެ ކަމަށް
- ހަނިމާދޫ އެއާޕޯޓު އިންޓަނޭޝަނަލްކޮށް، އެ އެއާޕޯޓާއި އައްޑޫ އެއާޕޯޓުގެ ޓާމިނަލްގެ މަސައްކަތްތައް 2025 ގައި ނިމި، ދެ އެއާޕޯޓު އެއްކޮށްލައިގެން އެވަރެޖްކޮށް އަހަރަކު ތިން މިލިއަން ފަތުރުވެރިންނަށް ހިދުމަތްތައް ދެވޭނެ ކަމަށް
ފަތުރުވެރިކަމަކީ ރާއްޖޭގެ އިގްތިސޯދުގެ މުހިންމު އެއް ތަނބުކަން ފާހަގަކުރައްވައި، ސަރުކާރުގެ އަމާޒަކީ ރާއްޖެ އަށް މިހާރު އަންނަ ވަރަށް ވުރެ ފަތުރުވެރިންގެ އަދަދުތައް އިތުރުކޮށް ކުރިއެރުވުން ކަމަށާއި، ފަތުރުވެރިކަން މިހާރަށް ވުރެ ބޮޑަށް ކުރިއަރުވަން މަސައްކަތްކުރުމުގެ ސަބަބުން ދަތުރުފަތުރުކުރުމަށާއި ދަނޑުވެރިކަމުގެ ސިނާއަތްތައް ކުރިއަރައި، ފަންނުވެރިންނަށް ފައިސާ ލިބޭ މިންވަރު އިތުރުވެގެން ދާނެ ކަމަށް ރައީސް ވިދާޅުވިއެވެ.
އޭގެ ނަތީޖާ އަކަށް ވާނީ ރާއްޖޭގެ އިގްތިސޯދު މިހާރަށް ވުރެ ދެގުނަވެ، ރަނގަޅުވެގެން ދިއުން ކަމަށާއި، މި ބަދަލަކީ ރާއްޖޭގެ އިގްތިސޯދު ވަށާ ޖެހޭ ގޮތަށް ގެންނަ ބަދަލެއް ކަމަށް އެމަނިކުފާނު ވިދާޅުވިއެވެ. މިފަދައިން ވިދާޅުވެ، އެމަނިކުފާނު ވިދާޅުވި ބައެއް ހިސާބުތަކުގައިވާ ގޮތުން:
- 2018 ގައި ރާއްޖޭގެ އިގްތިސޯދަކީ 81 ބިލިއަން ރުފިޔާ، އެ އަހަރު 1.4 މިލިއަން ފަތުރުވެރިން ރާއްޖެ އަށް އައި، އަދި ދައުލަތުގެ އާމްދަނީ އަކީ 22 ބިލިއަން ރުފިޔާ
- މި އަހަރު ނިމުމުގެ ކުރިން އިގްތިސޯދު 108 ބިލިއަން ރުފިޔާ އަށް އަރައި، ދައުލަތުގެ އާމްދަނީ 34 ބިލިއަން ރުފިޔާ އަށް އިތުރުވާނެ ކަމަށް ލަފާކުރެއްވި
- 2025 ގައި 2.5 މިލިއަނެއްހާ ފަތުރުވެރިން ރާއްޖެ އަށް އަންނާނެ ކަމަށާއި، އިގްތިސޯދު 130 ބިލިއަން ރުފިޔާ އަށް އިތުރުވެ، ދައުލަތުގެ އާމްދަނީ 44 ބިލިއަން ރުފިޔާ އަށް އިތުރުވާނެ ކަމަށް އަންދާޒާކުރެއްވި
- 2028 ގައި ރާއްޖޭގެ މުޅި އިގްތިސޯދު ދެގުނަވެ 177 ބިލިއަންގެ އިގްތިސޯދަކަށް ބަދަލުވެގެން ދާނެ ކަމަށް ލަފާކުރެއްވި
"އަޅުގަނޑުމެން އިރާދަކުރެއްވިއްޔާ އަޅުގަނޑުގެ ދެވަނަ ދައުރު އިރާދަކުރެއްވިއްޔާ ނިމިގެން ދާނީ މި ދެންނެވި ލޯނު ދައްކަން އޮތް ބުރަ ދެން އޮންނަ ސަރުކާރަކަށް ނުޖައްސާ، އެކަން ވެސް އިރާދަކުރެއްވިއްޔާ ހަމައަކަށް އަޅުވާނަން،" ރައީސް ވިދާޅުވިއެވެ.
ބަލަ އިބުރާހިމާ އެމްޑީޕީގަ ބަގުޑި ބައްދާއިރު އެމްޑީޕީ އިން ވަކާލާތު ކުރި އެއްކަމެއްވެސް ވެރިކަން ނިމުނުއިރު ނުވި