ރ. އަތޮޅު ދުވާފަރުގައި ދޯންޏެއްގައި ރޯވެ ތިން މީހަކު ފިހިގެން ފަރުވާ ދޭން ފަށައިފިއެވެ.
މައުލޫމާތު ލިބިފައިވާ ގޮތުގައި އެ ހާދިސާ ހިނގީ އެރަށުގައި ހުއިފިލަނޑާ ނެގުމުގެ މަސައްކަތް ކުރަމުން އަންނަ ދޯންޏެއްގައެވެ. އެހާދިސާ ހިނގަން މެދުވެރިވީ ދޯނި ސާފު ކުރުމުގެ ތެރޭގައި ބޭނުންކުރި ކެމިކަލްތަކެއްގެ ސަބަބުން ކަމަށް މައުލޫމާތު ލިބިފައިވެއެވެ.
އެ ހާދިސާގައި ތިން މީހަކު ފިހިފައިވާއިރު ފިހުނު ތިން މީހުންނަށް އެންމެ ފުރަތަމަ ފަރުވާ ދިނީ ދުވާފަރު ސިއްހީ މަރުކަޒުގައެވެ. ނަމަވެސް އިތުރު ފަރުވާއަށް އެމީހުން މިހާރު ވަނީ އުނގޫރުފާރު ރީޖަނަލް ހޮސްޕިޓަލަށް ގެންގޮސްފައެވެ.
މައުލޫމާތު ލިބިފައިވާ ގޮތުގައި އެ ހާދިސާގައި ފިހުނު ތިން މީހުންގެ ތެރެއިން އެކެއްގެ ހާލު ކްރިޓިކަލްއެވެ. މިގޮތުން އޭނާގެ ހަށިގަނޑުގެ 25 ޕަސަންޓް ފިހިފައިވާ ކަމަށް މައުލޫމާތު ލިބެއެވެ.
މި ހާދިސާގައި ފިހިފައި ވަނީ އެ ރަށު ދެ މީހަކާއި އެ ދޯނީގައި މަސައްކަތް ކުރާ އެހެން ރަށެއްގެ މީހެކެވެ.
އެހާދިސާއާ ގުޅިގެން އެމްއެންޑީއެފްގެ ބަހެއް އަދި ނުލިބެއެވެ.
