2018ގައި ލިބުނު ފަދަ ތާއިދެއް ށ. ނޫމަރާއިން މިފަހަރުވެސް ލިބޭނެކަމުގެ ޔަގީންކަމާއި ހިތްހަމަޖެހުން ލިބިވަޑައިގަންނަވާ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރައީސް ކުރެއްވި ޓްވީޓެއްގައި ވިދާޅުވީ، ރާއްޖެއަށް މިހާރު ލިބިފައިވާ ހަމަޖެހުން ހޯދުމަށް ނޫމަރާ ރައްޔިތުންގެ 74 ޕަސަންޓުގެ ބޮޑުތާއީދެއް 2018ގައި ދީފައިވާ ކަމަށެވެ. އަދި ހޯދިފައިވާ ގިނަ ކާމިޔާބީތަކާއެކު ކުރިއަށްގޮސް 2023ގައި މިއެދޭ އުފާވެރި އަމާން ރާއްޖެ ހޯދުމުގައި ނޫމަރާގެ ބޮޑު ހިއްސާއެއް އޮންނާނެކަމުގެ ހިތްހަމަޖެހުން ލިބިވަޑައިގަންނަވާ ކަމަށް ރައީސް ވިދާޅުވިއެވެ.
ރައީސް މިފަދައިން ޓްވީޓުކުރައްވާފައިވާއިރު ރިޔާސީ އިންތިހާބުގެ ކެމްޕެއިން ފެއްޓެވުމުގެ ގޮތުން ށ އަތޮޅަށް ކުރައްވަމުންގެންދަވާ ދަތުރުފުޅުގައި ނޫމަރާ ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަމުން ރައީސް ވަނީ 2018ގައި ނޫމަރާއަކީ އެންމެ އެކަހެރިކޮށް، ބާކީކޮށްފައި އޮތް އެއް ރަށް ކަމަށް ވިދާޅުވެފައެވެ.
މި ރަށަށް އަރާ ފުރުމުގެ ދަތިކަން ފެށުނީއްސުރެ، މި ރަށަށް އަރާ ފޭބޭނެ ގޮތެއް ހޯދުނީ އެމްޑީޕީގެ ފުރަތަމަ ސަރުކާރުން ކަމަށާއި ނޫމަރާ ބަނދަރަށް އަދިވެސް ބޮޑެތި ބަދަލުތަކެއް ގެންނަން ޖެހޭ ކަމަށް ވެސް ރައީސް ފާހަގަކުރެއްވިއެވެ. އަދި އެކަން ފުރިހަމަކޮށް ދެއްވާނެ ކަމުގެ ޔަގީންކަން ރައީސް ވަނީ ދެއްވާފައެވެ.
ރައީސް ވިދާޅުވީ އެމްޑީޕީގެ ކޯލިޝަން ސަރުކާރުން ވެރިކަމަށް އައިސް ކުރި އެއް ކަމަކީ ގާނޫނީ ހަމަތަކުގެ މައްޗަށް ރުޖޫއަވެ، ޝަރުއީ ދާއިރާ އަށް ނުފޫޒު ނުފޯރުވައި މިނިވަންކަމާއެކު ފަނޑިޔާރުން ހުކުމް ކުރުމުގެ މިނިވަން ކަން ކޯޓުތަކަށް ދިނުން ކަމަށެވެ. އަދި ރައްޔިތުންނަށް އަސާސީ ހިދުމަތްތައް ފޯރުކޮށްދިނުމަކީ މި ސަރުކާރުން އެންމެ އިސްކަމެއް ދިން އެއް ކަންތައް ކަމުގައި ވެސް ރައީސް ވިދާޅުވިއެވެ.
