ރަޝިއާގެ ރައީސް ވްލަޑިމިއާ ޕުޓިން އަވަހާރަ ކޮށްލަން އަމާޒުކޮށް ރޭ ޑްރޯން ހަމަލާއެއް ދީފި ކަމަށްބުނެ އެގައުމުގެ އޮފިޝަލުން ވީޑީއޯއެއް އާންމުކޮށްފިއެވެ. އެ ވީޑިއޯއިން ފެންނަނީ، ކްރެމްލިންގެ ސެނޭޓް އިމާތް (ގާނޫނު ހަޑާ މަޖިލީސް) ގެ މަތީގައި ހުންނަ ގުއްބުގައި ޖެހި އެއްޗެއް ގޮވާތަނެވެ.
އެ ހާދިސާ ހިނގި އިރު އެތާނގައި އެވަގުތު ޕުޓިން ވަޑައިގެން ނޫޅުއްވި ނަމަވެސް އެ ހަމަލާގެ އަމާޒަކީ ޕުޓިން ކަމަށް އެގައުމުން ވަނީ ބުނެފައެވެ. އަދި އެފަދަ އިތުރު 2 ހަމަލާ ރޭ ދޭން އުޅުނު ކަމަށާއި އެ 2 ޑްރޯން ވައްޓާލެވިފައި ވާކަމަށް ވެސް ބުނެފައި ވެއެވެ.
ރޭގެ ހަމަލާއަކީ ރަޝިއާގެ ފަސްގަނޑުގައި އަދި ވެރިރަށުގެ އެހާ އެތެރެއަށް ދިން މިބާވަތުގެ ފުރަތަމަ ހަމަލާއެވެ. ހަމަލާގެ ޒިންމާ ރަޝިއާއިން ޔޫކްރައިންގެ ބޮލުގައި އަޅުވާފައި ވާ އިރު ޔޫކްރައިންގެ ރައީސް ވްލަޑިމިއާ ޒެލޮންސްކީ ވަނީ އެކަމަށް އިންކާރު ކުރައްވައި އެއީ ޔޫކްރައިންގެ ބައިވެރިވުމެއް އޮތް ކަމެއް ނޫން ކަމަށް ވިދާޅުވެފައެވެ.
މިކަމާ ގުޅިގެން ޔޫކްރައިންގެ އޮފިޝަލުން ވިދާޅުވެފައި ވަނީ އެ ހަމަލާއަކީ ރަޝިއާގެ ތެރެއިން ވަކިވެގަންނަން މަސައްކަތް ކުރާ ގްރޫޕަކުން ނުވަތަ ބަޔަކު ދިން ހަމަލާއަކަށް ވެދާނެ ކަމަށާއި ހަމަލާގެ ތުހުމަތު ޔޫކްރައިންގެ ބޮލުގައި އަލުވަނީ ރަޝިއާއިން ރޫކްރައިން އަށް ދޭން ރާވަމުން ގެންދާ "ޓެރަރިސްޓް" ހަމަލާއަކަށް މަގުފަހި ކުރުމަށް ކަމަށެވެ.
ހަބަރުތައް ބުނާގޮތުން، ހުޅަނގުގެ ޓޭންކުގެ ތަކުގެ އެހީގައި ޔޫކްރައިން އިން ވަރުގަދަ ކުއްލި ހަމަލާއަކަށް ތައްޔާރުވަމުން އަންނަ އިރު ރަޝިއާއިން ވެސް ގެންދަނީ އެފަދަ ހަމަލާއަކަށް ތައްޔާރު ވަމުންނެވެ. އަލަށް އުފެއްދި ޒަމާނީ ކްރޫޒް މިސައިލްތަކާއި ރިމޯޓުން އޮޕަރޭޓް ކުރާ އަސްކަރީ ޓޭންކްތައް ހިދުމަތަށް ނެރެފައި ވާ އިރު، ފައުޖުތައްވެސް އިތުރަށް ރުކުރުވާލަމުން ގެންދާ ކަމަށް ހަބަރުތައް ބުނެއެވެ.
މި ހާދިސާ ރޭ ހިނގާފައި ވާ އިރު ހުސްވި ހަފްތާގައި ވަނީ ކްރިމިއާގައި ތެޔޮ ރައްކާ ކުރާ ތަނަކަށް އަމާޒުކޮށްވެސް ޑްރޯން ހަމަލާއެއް ދީފައެވެ. އެ ހަމަލާގައި 1000 މީޓަރުގެ ސަރަހައްދެއްގައި ރޯވެ ބޯކަޅު ދުމާއެކު އަލިފާންގަނޑު އަރަމުން ދިޔަ މަންޒަރުތައްވެސް ޓީވީތަކުން ވަނީ ދައްކާފައެވެ.
