ކީރިތި ގުރްއާން ކިޔެވުމާއި ހިތުދަސްކުރުމަކީ، ހަމައެކަނި ރަން ވަނައެއް ހޯދުމަށް ކުރާ ކަމަކަށް ނުހެދުމަށް ރައީސް އިބްރާހިމް މުހައްމަދު ސޯލިހު އިލްތިމާސް ކުރައްވައިފިއެވެ.
ރައީސް މިފަދައިން އިލްތިމާސްކުރައްވާފައިވަނީ ރަން ތާޖު ގުރްއާން މުބާރާތުގެ ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ، ފުރިހަމަ މާނައިގައި ގުރްއާން އުނގެނުމަކީ، ގުރްއާނުގެ އިލްމާއި، ގުރްއާނުގެ ތަފްސީރު ވެސް އުނގެނި ދަސްކުރުން ކަމަށެވެ. ގުރުއާނުން ދުނިޔަވީ ޙަޔާތަށް ލިބެންވާ އާރޯކަމާއި ތާޒާކަން އެންމެ ފުރިހަމަގޮތުގައި ލިބޭނީ، އެ ދެބައި ވެސް އުނގެނި ދަސްކޮށްގެން ކަމަށް ރައީސް ފާހަގަކުރެއްވިއެވެ. އެހެންކަމުން، އެ ދެ ދާއިރާގެ އިލްމު ފުޅާކުރުމަށް، ރާއްޖޭގައި ހިންގާ ޔުނިވާސިޓީތަކާއި ކޮލެޖުތަކުން ވެސް ވަރަށް މުހިންމު ދައުރެއް އަދާކުރެވޭނެ ކަމަށް ރައީސް އެދިވަޑައިގެންނެވިއެވެ.
މީގެ އިތުރުން ގުރްއާން ކިޔެވުމާއި ހިތުދަސްކުރުމަކީ، ހަމައެކަނި މުބާރާތެއްގައި ވާދަކުރުމަށް، ނުވަތަ ރަން ވަނައެއް ހޯދުމަށް ކުރާ ކަމަކަށް ނުހެދުމަށާއި އެއީ އެއަށްވުރެ މާ މަތިވެރި، މާ މުގައްދަސް އަޅުކަމެއް ކަމުގައި ރައީސް ވިދާޅުވިއެވެ.
ރައީސް ވިދާޅުވީ، ގުރްއާން މުބާރާތްތަކުން އެމަނިކުފާނަށް ފާހަގަކުރެވޭ އެންމެ އުފާވެރި އަނެއް ކަމަކީ، ގުރްއާން ކިޔެވުމާއި، ގުރްއާން ހިތުދަސްކުރުމަށް ޝައުޤުވެރިވާ ކުޑަކުދިންނާއި ޒުވާނުންގެ އަދަދު، އަހަރުން އަހަރަށް އިތުރުވަމުން އަންނަކަން ކަމަށެވެ. އަދި ބޮޑެތި މީހުންގެ ތެރޭގައި ވެސް އެ ޝައުޤުވެރިކަން އިތުރުވަމުންދާ ކަން ރައީސް ފާހަގަކުރެއްވިއެވެ.
މިއީ، އިސްލާމްދީނުގެ ސައްހަ އަގީދާގެ މަތީގައި ދަރިން ތަރުބިއްޔަތު ކުރުމަށް، ސަރުކާރުން ކަނޑައަޅާފައިވާ ސިޔާސަތު ތަންފީޒު ކުރުމަށް ވެސް ލިބޭ ވަރަށް ބޮޑު ބާރެއް ކަމަށް ދެކެވަޑައިގަންނަވާ ކަމަށް ރައީސް ވިދާޅުވިއެވެ.
