އެންމެ ކުޑަކޮށް ތަރައްގިވެފައިވާ ގައުމަކުން މެދުފަންތީގެ އާމްދަނީ ލިބޭ ގައުމުތަކުގެ ފަންތިއަށް ހިޖުރަކުރާ ގައުމުތަކަށް ފުޅާ ދާއިރާއެއްގައި އެއްބާރުލުމާއި އެހީތެރިކަން ލިބިދޭންޖެހޭ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރައީސް މިހެން ވިދާޅުވީ، ގަތަރުގެ ވެރިރަށް ދޯހާގައި ކުރިޔަށްދާ އދ ގެ އެންމެ ކުޑަކޮށް ތަރައްގީވެފައިވާ ގައުމުތަކުގެ ފަސްވަނަ ކޮންފަރެންސްގެ ޖެނެރަލް ޑިބޭޓްގައި ތަގްރީރު ކުރައްވަމުންނެވެ.
ރައީސް ދެއްކެވި ވާހަކަފުޅުގައި، މިގޮތަށް ހިޖުރަކުރުމުގެ މަރުހަލާގައި ސްމޯލް އައިލެންޑް ޑިވެލޮޕިން ސްޓޭޓްސް (ސިޑްސް)ގައި ހިމެނޭ ގައުމުތަކުގެ އިސްތިސާދީ ހާލަތު ކުރިއެރުވުމަށް ޖުމްލަގޮތެއްގައި މަސައްކަތްކުރި ނަމަވެސް އިގްތިސާދު ނުރައްކަލަށް ހުށަހެޅިދާނެ ކަންކަމަށް އެހާބޮޑު ސަމާލުކަމެއް ނުދެވި އޮންނަކަން ފާހަގަ ކުރެއްވިއެވެ.
މީގެ އިތުރުން ރާއްޖެ، މެދުފަންތީގެ ޢާމްދަނީ ލިބޭ ގައުމަކަށް ހިޖުރަ ކުރުމާއެކު އޭގެ ކުރިން ހަމަޖެހިފައި ހުރި ބައެއް ހާއްސަ އިންތިޒާމުތަކާއި ލިބެމުންއައި ބައެއް އިނާޔަތްތައް މެދުކެނޑިގެން ނުދާނެކަން ކަށަވަރުކުރުމަށް ގިނަގުނަ މަސައްކަތްތަކެއް ކުރަންޖެހުނުކަން ރައިސް ވިދާޅުވިއެވެ. އަދި ގައުމު ގުދުރަތީގޮތުން އުފެދިފައި އޮންނަ ގޮތުންނާއި ބޮޑުކުޑަމިނާއި ރަށްތައް ފެތުރިފައިވާ ގޮތާއި މޫސުމަށް އަންނަ ނޭދެވޭ ބަދަލުތަކާއި، އިގްތިސާދު ސިންދަފާތުވެފައި ނެތުމާއި ޑިވެލޮޕްމަންޓް ފައިނޭންސް އެކަށީގެންވާގޮތެއްގައި ލިބޭނެގޮތްތައް ހަމަޖެހިފައި ނެތުމާއި ޖިއޮޕޮލިޓިކަލް ޝޮކްތަކުގެ ސަބަބުން ކުރިމަތިލާންޖެހޭ ނާޒުކުކަން ފަދަ ކަންކަމަށް ވެސް ރައީސްގެ ވާހަކަފުޅުގައި އަލިއަޅުވާލެއްވިއެވެ.
ރައީސްގެ ވާހަކަފުޅުގައި، އެންމެ ކުޑަކޮށް ތަރައްޤީވެފައިވާ ގައުމުތަކާއި ސިޑްސްގައި ހިމެނޭ ޤައުމުތަކަށް، މޫސުމަށް އަންނަ ބަދަލުތަކުގެ ސަބަބުން ކުރާ ނޭދޭވޭ އަސަރުތައް ފާހަގަކުރެއްވިއެވެ. އަދި މޫސުމަށް އަންނަ ބަދަލުތަކަށް ފިޔަވަޅުތައް އެޅުމަށް، ޖައްވަށް ބޭރުކުރާ ވިހަ ގޭސްތައް މަދުކުރުމާއި، މޫސުމަށް އަންނަ ބަދަލުތަކުން ލިބޭ ގެއްލުންތަކަށް ހޭނުމާއި ވިލުންވެރިކަން އިތުރުކުރުންފަދަ ކަންކަމަށް ބޭނުންވާނެ ކަމަށް އަންދާޒާ ކުރެވިފައިވާ މިންވަރަށް ފައިސާ ހަމަޖެހިގެން ނުދާކަން ރައީސް ފާހަގަކުރެއްވިއެވެ.
މީގެ އިތުރުން ކޮޕް27ގެ ސަމިޓުގައި ކުރިއަރާފައިވާ ގައުމުތަކުން އެއްބަސްވި ގޮތަށް އެޤައުމުތަކުގެ ޒިންމާ އަދާކޮށް، "ލޮސް އެންޑް ޑެމޭޖް" ފަންޑު ގާއިމުކުރުމުގެ މަސައްކަތް އަވަސްކޮށް، އަހަރަކު 100 ބިލިއަން ޑޮލަރުގެ ފައިނޭންސް ހަމަޖެއްސުމުގެ އަމާޒަށް ވާސީލުވުމަށް އެ ގައުމުތަކަށް ރައީސް ވަނީ ގޮވާލައްވާފައެވެ.
ރައީސް ވަނީ އެންމެ ކުޑަކޮށް ތަރައްގީވެފައިވާ ގައުމުތަކުން، ވިލުންވެރިކަން އިތުރުކުރުމަށް މަސައްކަތްކުރާއިރު ގުޑް ގަވަނަންސްގެ ބޭނުން ހިފުމަށާއި ދެމެހެއްޓެނިވި ތަރައްގީހޯދުމުގައި ދިރިއުޅުމުގެ ހުރިހާ ކަމެއްގައި ވެސް ހަމަހަމަ ގޮތެއްގައި އަދި މާނަހުރި ގޮތުގައި އަންހެނުންނާއި އަންހެން ކުދިންގެ ބައިވެރިވުން އިތުރުކުރުމަށް ގޮވާލައްވާފައެވެ.
އ.ދ.ގެ އެންމެ ކުޑަކޮށް ތަރައްގީވެފައިވާ ގައުމުތަކުގެ 5 ވަނަ ކޮންފަރެންސް ކުރިޔަށްދަނީ މާޗު މަހުގެ 5 އިން 9 ދުވަހަށް ގަތަރުގެ ވެރިރަށް ދޯހާގެ ގަތަރު ނެޝަނަލް ކޮންވެންޝަން ސެންޓަރުގައެވެ. ކޮންމެ ދިހަ އަހަރަކުން އެއްފަހަރު ބާއްވާ މިކޮންފަރެންސް 2021 ވަނަ އަހަރު ފެށިގެން ކޮވިޑްގެ ބަލިމަޑުކަމާހުރެ ދެ ފަހަރެއްގެ މަތިން ފަސްކޮށްފައިވެއެވެ.
