ރައްޔިތުންގެ މަޖިލީހުގެ އިދާރާގެ ޖިމް ރަސްމީކޮށް މިއަދު ހުޅުވައިފިއެވެ.
މަޖިލީހުގެ ޖިމް ރަސްމީކޮށް ހުޅުވާފައި ވަނީ އެކަމަށްޓަކައި ބޭއްވި ރަސްމިއްޔާތެއްގައި، މަޖިލީހުގެ ރައީސް މުހައްމަދު ނަޝީދެވެ.
މަޖިލީހުގެ އިދާރާ އިން ބުނީ، ޖިމް ގާއިމްކޮށްފައި ވަނީ އާ އިމާރާތުގެ 12 ވަނަ ފަންގިފިލާގައި ކަމަށެވެ.
މިއަދު ހުޅުވި ޖިމަށް އަދި ވަދެވޭނީ:
- ރައްޔިތުންގެ މަޖިލީހުގެ މެންބަރުންނށް
- މަޖިލީހުގެ އިދާރީ މުވައްޒަފުންނަށް
މުސްތަގްބަލުގައި މަޖިލީހުގެ މެންބަރުންނާއި އިދާރީ މުވައްޒަފުންގެ އާއިލާ މެންބަރުންނަށް ވަދެވޭނެ ކަމަށާއި، އެފަދަ ވިސްނުމެއް ގެންގުޅެމުންދާ ކަމަށް، މަޖިލީހުގެ އިދާރާ އިން ބުންޏެވެ.
އެ އިދާރާ އިން ބުނި ގޮތުގައި، މަޖިލީހުގައި ޖިމް ގާއިމްކޮށްފައި ވަނީ ޕާކިސްތާނު ސަރުކާރުން ދީފައިވާ ހިލޭ އެހީގެ ދަށުންނެވެ.
މަޖިލީހުގެ އިދާރާގައި ޖިމެއް ހެދުމަށް ހުޅުވާލާފައި ވަނީ 2020 ގައެވެ. އޭރު ފިހާރައަކާއި ރެސްޓޯރަންޓެއް ވެސް މަޖިލީހުގައި ގާއިމްކުރަން ނިންމައި އިއުލާނުކޮށްފައިވެއެވެ.
