މި ސަރުކާރުން ހުޅުމާލޭގައި އިމާރާތްކުރި އޮފީސް އިމާރާތް ބޭނުންކުރަން ފަށައިފިއެވެ.
ހުޅުމާލޭގައި ސަރުކާރުގެ އޮފީސް އިމާރާތެއް އެޅުމަށް 2019 ވަނަ އަހަރު ރައީސް އިބްރާހީމް މުހައްމަދު ސޯލިހް ނިންމެވީ ސަރުކާރުގެ ވަރަށް ގިނަ އޮފީސްތަކެއް ބޮޑު ހޭދައެއްކޮށް އަމިއްލަ ތަންތަން ވަކި މުއްދަތެއްނެތި ކުއްޔަށް ހިފައިގެން އުޅެންޖެހިފައި ވުމުން އެކަމަށް ހައްލެއް ގެނައުމަށްޓަކައެވެ.
ޗައިނާ ކުންފުންޏަކާ ހަވާލުކޮށްގެން ކުރިއަށް ގެންދިޔަ މި މަޝްރޫއަށް ދައުލަތުގެ ބަޖެޓުން 185 މިލިއަން ރުފިޔާ ހަރަދުކޮށްފައި ވާއިރު މި އިމާރާތުގެ ކޮންމެ ފަންގިފިލާއެއްގައި 25،000 އަކަފޫޓު ހުރެއެވެ.
އަލަށް ރާއްޖޭގައި ގާއިމް ކުރާ އެމެރިކާ އެމްބަސީ އާއި ބައެއް މިނިސްޓްރީތައް މި އިމާރާތައް ބަދަލުކޮށްފައި ވާއިރު މި އިމާރާތުގެ ފަންގިފިލާތައް ބެހިގެންވަނީ؛
- ގްރައުންޑް ފްލޯ އަދި ފުރަތަމަ ފަންގިފިލާ - ޕާކިން އަށް ހާއްސަ
- ދެވަނަ ފަންގިފިލާ - ޖެންޑާ މިނިސްޓްރީ
- ތިންވަނަ ފަންގިފިލާ - ޓްރާންސްޕޯޓް މިނިސްޓްރީ
- ހަތަރުވަނަ ފަންގިފިލާ - އެމެރިކާ އެމްބަސީ
- ފަސްވަނަ ފަންގިފިލާ - ހަޔާ އެޑިއުކޭޝަން މިނިސްޓްރީ
- ހަވަނަ ފަންގިފިލާ - މީޓިން ރޫމާއި ސެމިނާ ރޫމް އަދި ޓެރަސް
މި އިމާރާތަށް މިހާރު ސަރުކާރުގެ ބައެއް މިނިސްޓްރީތައް ބަދަލުކޮށްފައިވާއިރު އަދި ރަސްމީކޮށް މި އިމާރާތް ހުޅުވާފައެއް ނުވެއެވެ.
