ހުޅުމާލޭގައި ހުންނަ އެޗްޑީސީ ހެޑް އޮފީހާއި ފުލުހުންގެ އިދާރާ ހުންނަ ސަރަހައްދުގައި އޮތް ފުލުހުންގެ ވެހިކަލެއްގައި ރޭ ރޯކޮށްލައިފިއެވެ.
ފުލުހުން ބުނީ އެ ވެހިކަލްގައި ރޯކޮށްލާފައި ވަނީ ރޭ 7:40 ހާއިރު ކަމަށެވެ.
އެ ވެހިކަލްގައި ރޯވި އަލިފާންގަނޑު މާގިނަ އިރުތަކެއް ނުވަނީސް ނިއްވާލި ކަމަށް ފުލުހުން ބުނި ނަމަވެސް އެކަމާ ގުޅިގެން ލިބުނު ގެއްލުމެއް ހާމަ ކޮށްފައެއް ނުވެއެވެ. އަދި އެކަން ހިނގަން ދިމާވި ސަބަބެއްވެސް ބުނެފައެއް ނުވެއެވެ.
ހުޅުމާލޭގައި ހުންނަ އެޗްޑީސީގެ އޮފީސް އިމާރާތް ހުންނަނީ ބޮޑު މަގަށް ވާ ގޮތަށެވެ. ވަށައިގެން ކެމެރާ ހަރުކޮށްފައި ހުންނަ ސަރަހައްދަކަށް ވާއިރު، މާލެއިން ހުޅުމާލެއަށް ގޮސް ހެޗްޑީސީ އޮފީހާ ހަމައަށް ދިޔުމުގެ ކުރިން ހުޅަނގަށް އޮންނަ މަގަކީ ފުލުހުންގެ އިމާރާތް ހުންނަ މަގެއެވެ. އެއީ އެއް ކޮއްޓެއް ކަމުން އެ ސަރަހައްދުގައި ފުލުހުންގެ ވެހިކަލްތައް ޕާކު ކޮށްފައި އޮވެއެވެ.
މީގެ ކުރިން ޒުވާނުންގެ ބަޔަކު ވެހިކަލްތަކެއްގައި ހުޅުމާލެ ޕޮލިސް ސްޓޭޝަން ކުރިމައްޗަށް އެއްވި ހާދިސާއެއްވެސް ހިނގާފައި ވެއެވެ.
ފުލުހުން ބުނީ ރޭ ރޯކޮށްލި އެ ހާދިސާއާ ގުޅޭގޮތުން ބަލަން ޖެހޭ ކަންކަން ބަލަމުންދާ ކަމަށެވެ.
ފުލުހުންގެ ވެހިކަލްތަކަކީ ރައްޔިތުންގެ ހައްޤު މުދަލެވެ. ރައްޔިތުންގެ މުދަލަށް ގެއްލުން ދިނުމަކީ ވަރަށް ދެރަ ނާތަހުޒީބު އަމަލެކެވެ. ތިޔަ ގެއްލުން ދެވުނީ ފުލުހުންނަކަށް ނޫނެވެ. ގެއްލުން ތިޔަދެވުނީ ރައްޔިތުން ނަށެވެ.