މުޅި ދެކުނު ޗައިނާ ކަނޑަކީ ޗައިނާގެ ބާރު ހިނގާ ތަނެއް ކަމަށް ދައުވާ ކުރަމުން ދަނިކޮށް އެސަރަހައްދުން އުދުހުނު އެމެރިކާގެ ޖާސޫސީ މަތިންދާބޯޓަކާ ޗައިނާގެ ފައިޓާ ޖެޓަކުން ކުރިމަތިލައިފިއެވެ.
ހަބަރުތައް ބުނާ ގޮތުން، މި ދެބޯޓު އެއްބޯޓު އަނެއް ބޯޓާ 20 އަކަށް ފޫޓަށް ކައިރިވިއެވެ. އަދި ޖެހިދާނެ ކަމުގެ ބިރަށް ދީލައިލި ނަމަވެސް މިއީ ވައިގެ ދަތުރުފަތުގެ ހަމަތަކުން ބަލާއިރު ނުރައްކާތެރި ކަމެއް ކަމަށް ބުނެއެވެ.
މި މައްސަލައިގައި އެމެރިކާއިން ބުނަނީ، އެެމެރިކާގެ ބޯޓާ ގާތް ކުރީ ޗައިނާގެ ފައިޓަރު ޖެޓް ކަމަށާއި އެމެރިކަގެ ބޯޓު އުދުހުނީ، އެސަހައްދު ބެލެހެއްޓުމަށް ގަވައިދުން ކުރަމުން ދާ ދަތުރެއްގައި ކަމަށެވެ. ނަމަވެސް ޗައިނާއިން ބުނީ، އެމެރިކާގެ ބޮޓަކީ ޖާސޫސީ ބޯޓެއް ކަމަށާއި ކަން ހިނގާ ދިޔަ ގޮތުގެ ހަގީގަތް އެމެރިކާއިން އޮޅުވާލަނީ ކަމަށެވެ. އަދި އެ ޒާތަށް ދޮގު ހަދާ ޗައިނާގެ ބޮލުގައި އިލްޒާމް އެޅުވުން ރަނގަޅު ނުވާނެ ކަމަށާއި، ޗައިނާގެ ކޮންޓްރޯލްގެ ދަށުގައި އޮންނަ ސަރަހައްދުތަކަށް އެގޮތަށް ވަދެގެން ސުލްހަ ނުދެމެހެއްޓޭނެ ކަމަށެވެ.
ދެކުނު ޗައިނާގެ ކަނޑުގެ އިންޓަނޭޝަނަލް ވޯޓާ އަކީ ވަކި ބައެއްގެ ބާރު ހިނގާ ތަނަކަށް ނުވާ އިރު ޗައިނާއިން ދަނީ އެ ކަނޑަށް އަތްގަދަކުރަމުންނެވެ. އެ ކަނޑަކީ، ވިއެޓްނާމް، ޕިލިޕީންސް، މެލޭޝިއާ، ޓައިވާން އަދި ބްރޫނާއި ހިއްސާ ކުރާ ކަނޑެކެވެ. ކޮންމެ އަހަރަކު އެތައް ޓްރިލިއަން ޑޮލަރެއްގެ ވިޔަފާރީގެ މުއާމަލާތްތަކަށް މުދާ ހިފައިގެން އެ ކަނޑުން ބޯޓު ފަހަރު ދަތުރު ކުރާ އިރު އެ ކަނޑަކީ މަސްވެރިކަމާއި އަދި ގުދުރަތީ ގޭސް ހުރި ސަރަހައްދުތައްވެސް ހިމެނޭ ކަނޑެކެވެ.
"ބައިނަލްއަގުވާމީ ފަރާތްތަކަށް ގަސްދުގައި އޮޅުވާލުމަށް އެމެރިކާއިން ދޮގު ހަދަނީ، ބައިނަލްއަގުވާނީ ގާނޫނުތަކާއި ގަވއިދުތަކަށް ހުރުމަތްތެރިކޮށް ހިތާ، ކަނޑާއި ވައިގެ މަގުން ކުރިމަތި ނުލާން އެދެން"
މި ހާދިސާއާ ގުޅިގެން ދެފަރާތުން ދެ ވާހަކައެއް ދައްކަމުން ދެފަރާތުން ވަނީ ވައިގެ އެ ކުރިމަތި ލުމާ ގުޅޭ ފްޓޭޖް ވެސް އާންމުކޮށްފައެވެ. އެމެރިކާއިން އާންމު ކުރި ފޮޓޯއިން ފެންނަނީ ޗައިނާގެ ފައިޓާ ޖެޓް އެމެރިކާގެ ބޯޓާ ދާދި ގާތުގައި އޮއްވައެވެ. ޗައިނާއިން އާންމު ކުރި ވީޑިއޯ އިން ފެންނަނީ އެމެރިކާގެ ޖާސޫސީ ބޯޓު އުދުހެނުން ދަމުން ގޮސް ކުއްލިއަކަށް ސްޕީޑް ދަށްކޮށްލާ އިރު ޗައިނާގެ ބޯޓުގެ ވާއަތް ފަރާތުން ކުޑަކޮށް ކުރިއަށް އަރިއަކަށް ދާތަނެވެ. އެއީ ދެބޯޓު ދެބޯޓް 20 އަކަށް ފޫޓަށް ގާތްވި ވަގުތު ކަމަށާއި ނުޖެހެނީސް އަނބުރާލި ވަގުތު ކަމަށް ބުނެއެވެ.
