އާ އަހަރު ފެށުން ފާހަގަކުރުމަށް ހުޅުމާލޭގައި މިއުޒިކް ޝޯއަކާއެކު ހަވާއެރުވުމަށް ނިންމައިފިއެވެ.
ޔޫތު މިނިސްޓްރީއިން އިންތިޒާމުކުރާ އެ ޝޯ ފެށުމަށް ހަމަޖެހިފައިވަނީ އަންނަ ހޮނިހިރު ދުވަހުގެ ރޭ 8:30 ގައެވެ. އެ ޝޯ ބާއްވާނީ ހުޅުމާލޭގެ ސިންތެޓީކް ޓްރެކްގައި ކަމަށް އެ މިނިސްޓްރީއިން ބުނެއެވެ.
2017 ވަނަ އަހަރު ނެރުނު ޝާހްރުކް ހާންގެ ފިލްމް "ރައީސް" ގެ "ލައިލާ މެ ލައިލާ" އިން މަގްބޫލުކަން ހޯދާފައިވާ ބޮލީވުޑްގެ ލަވަކިޔުންތެރިޔާ ޕަވްނީ ޕާންޑޭގެ ހުށަހެޅުންތަކެއް ފެންނާނެ ކަމަށް ޔޫތު މިނިސްޓްރީއިން ބުނެއެވެ.
މީގެ އިތުރުން ރާއްޖޭގެ ބޮޑުބެރު ގްރޫޕްތަކާއި މިއުޒިކް ބޭންޑްތައްވެސް ފެންނާނެ ކަމަށް ޔޫތު މިނިސްޓްރީއިން ބުނެއެވެ.
އެ ރޭ ހުޅުމާލޭގައި ހަވާއެރުވުމުގެ ހަރަކާތްތައްވެސް ވަނީ ކުރިއަށް ގެންދަން ނިންމާފައެވެ.
