ފަލަސްތީނުގެ ޖެނީންގެ ގެއެއްގެ ފުރާޅުމަތީގައި ހުރި އުމުރުން 16 އަހަރުގެ ކުއްޖެއްގެ ބޮަލަށް ބަޑިޖަހާ، ޔަހޫދީ އިޒްރޭލުން އޭނާ ޝަހީދު ކޮށްލައިފިއެވެ.
އުމުރުން 16 އަހަރުގެ ޖަނާ މަޖްދީ ޒަކާނާ ނަމަކަށް ކިޔާ އެ ކުއްޖާ ޝަހީދު ކޮށްލި ހާދިސާ އަކީ، އިޒްރޭލުން ހިފާފައި ވާ ހުޅަނގު އައްސޭރީގެ ރަށެއް ކަމަށް ވާ ޖެނީން އަށް އަރާ ބަލައި ފާސްކުރުމުގެ ތެރޭގައި ހިންގި އުދުވާނެކެވެ.
ފަލަސްތީނު ސިއްހީ ވުޒާރާގެ އޮފިޝަލުން ވިދާޅުވީ، އިޒްރޭލު ސިފައިން ބަޑިޖަހާފައި ވަނީ ސީދާ އެޖުއްޖާގެ ބޮލަށް ކަމަށެވެ.
މިކަމާ ގުޅިގެން އިޒްރޭލުން ބުނީ، އިޒްރޭލު ސިފައިން ކުޑަކުއްޖަކު ޝަހީދު ކޮށްލިކަމަށް ބުނެ ދައްކާ ވާހަކަ އިވިފައި ވާ ކަމަށާއި އެ މައްސަލަ ބަލާނެ ކަމަށެވެ.
އިޒްރޭލުން ޖެނިން އަށް އަރާ ހިންގި އުދުވާނުގައި އިތުރު 2 މީހަކު ޒަހަމްވެފައި ވެސް ވެއެވެ.
ހަބަރުތައް ބުނާ ގޮތުން ޔަހޫދީ ސިފައިން ޖެނިން އާއި ޖެނިންގައި ހުންނަ ރެފިއުޖީ ކޭމްޕްތަކަށް އަރާ ބަލައި ފާސްކުރުން ކުރިއަށް ގެންދިޔައީ އާދިއްތަ ދުވަހުގެ ރެއެވެ. އެ އުދުވާނުގެ ތެރޭގައި ގިނަ ބަޔަކު ހައްޔަރު ކުރި އިރު ފަލަސްތީނުގެ ދިފާއުގައި ޖިހާދުކުރާ ޖަމާއަތްތަކުން އިޒްެރޭލް ސިފައިންނާ ކުރިމަތިވެސް ލިޔެވެ.
ޒަކާނާ ގެ މަރާއެކު ޖެހިގެން އައި ހޯމަ ދުވަހު ޖެނިންގައި ވަނީ ޔަހޫދީ ދައުލަތާ ދެކޮޅަށް ނުރުހުން ފާޅު ކުރުމުގެ ގޮތުން ބޮޑު އިހިތިޖާޖެއް ވެސް ކޮށްފައެވެ.
މިއަހަރުގެ ތެރޭގައި އިޒްރޭލުން 50 އަށް ވުރެ ގިނަ ކުޑަކުދިން ޝަހީދު ކޮށްލި އިރު ޒަކާނާގެ ނަން އެ ލިސްޓަށް މި ވަނީ އިތުރު ވެފައެވެ.
މިއަހަރުގެ ތެރޭގައި އިޒްރޭލުން ފަލަސްތީނުގެ 215 މީހަކު ވަނީ ޝަހީދު ކޮށްލާފައެވެ. އޭގެ ތެރެއިން 17 މީހުންނަކީ އަންހެނުންނެވެ.
2006 އަށް ފަހު ނިމެމުން މިދާ 2022 އަކީ ޔަހޫދީންގެ އުދުވާން ގައި އެންމެ ގިނަ ބަޔަކު ޝަހީދުވެގެން ދާ އަހަރު ކަމަށް އދ އިން ބުނެއެވެ.
