3 ރޫޓަކުން ޅ އަތޮޅު އާރްޓީއެލް ދަތުރުތައް ފަށައިފިއެވެ.
ޕްލޭނިން މިނިސްޓްރީ އިން ބުނީ އާރްޓީއެލް ފެރީގެ ހިދުމަތް އިއްޔެ ޅ. އަތޮޅުގައި ފަށާފައިވާ ކަމަށާއި ތިން ރޫޓަކުން އަހުލުވެރި ކުރުމުގެ ދަތުރުތައް ކުރިއަށް ދާއިރު މި ދަތުރުތަކަށް އެއްވެސް އަގެއް ނުނަގާނެ ކަމަށެވެ.
ޅ އަތޮޅުގެ ދަތުރުތަކަށް ދެ ލޯންޗު އެ އަތޮޅަށް ގެންގޮސްފައި ވާއިރު ފުރަތަމަ ހަފްތާ އަކީ ހިލޭ ދަތުރު ކުރެވޭ ހަފްތާއެކެވެ.
ޅ. އަތޮޅުގެ ދަތުރުތައް ފުރަތަމަ ހަފްތާގައި ކުރަނީ ކައުންސިލްތަކުގައި ނަން ނޯޓު ކޮށްގެންނެވެ. އަދި އެ އަތޮޅު މަޑިވަރު އެއާޕޯޓަށް ވެސް އެ ފެރީ ދަތުރު ކުރުމަށް ވަނީ ހަމަޖެހިފައެވެ.
އާރްޓީއެލް ފެރީގެ ހިދުމަތް ރަސްމީކޮށް ޖޫން 12 ގައި ފެށި އިރު ފުރަތަމަ ފެށީ ޒޯން 1 ގައި ހިމެނޭ އަތޮޅުތަކުގެ ތެރެއިން ހއ، ހދ އަދި ށ. އަތޮޅަށެވެ. މި އަތޮޅުތަކުގެ ހުރިހާ ރަށެއްގައި ގަޑިން ގަޑިއަށް ފެރީ ދަތުރު ކުރާ އިރު، 1200ރ، 1500ރ އަށް ކުރި ދަތުރު މިހާރު 100ރ، 150ރ އަށް ކުރެވެއެވެ.
ޅ. އަތޮޅުގައި ފެރީގެ ހިދުމަތް ދޭނީ ކޮޅަކަށް 35 ރުފިޔާއިން ފެށިގެން 125 ރުފިޔާއާ ދެމެދުގެ އަގެއްގައެވެ.
ސަރުކާރުން އާރުޓީއެލް ފެރީގެ ހިދުމަތް ފެށިފަހުން މިހާތަނަށް 85 ވަޒީފާ ވަނީ އުފައްދާފައެވެ. އާރުޓީއެލްގެ ފެރީ އާއި ބަހުގެ ހިދުމަތް އެއްކޮށްލުމުން މިހާތަނަށް 308 ވަޒީފާ ވަނީ އުފައްދާފައެވެ.
