ޔުޓިލިޓީ ރެގިއުލޭޓަރީ އޮތޯރިޓީގެ ގާނޫނަށް ގެނައި 1 ވަނަ އިސްލާހު ރައީސް އިބްރާހިމް މުހައްމަދު ސޯލިހު ތަސްދީގުކުރައްވައިފިއެވެ.
މި ބިލަކީ މި މަހުގެ 17 ވަނަ ދުވަހު ރައްޔިތުންގެ މަޖިލީހުގެ 2022 ވަނަ އަހަރުގެ ތިންވަނަ ދައުރުގެ 24 ވަނަ ޖަލްސާއިން ފާސްކުރި ބިލެކެވެ.
ރައީސް އޮފީހުން ބުނީ އެ ގާނޫނަށް ގެނެވުނު މައިގަނޑު އިސްލާހަކީ އެ ގާނޫނުގެ 34 ވަނަ މާއްދާގެ ފަހަތަށް އާންމު ބޭނުންތަކުގެ ހިދުމަތްތަކުން ބިލުކުރުމާގުޅޭ ގަވާއިދު ހެދުމާ ގުޅޭ މާއްދާއެއް އިތުރުކުރުން ކަމަށެވެ.
ކުއްޔަށް ދޫކުރާ އެޕާޓްމަންޓުގެ ކަރަންޓާއި ފެނަށް ބިލުކުރާއިރު ތަނުގެ ވެރިފަރާތަށް ބިލު ކުރުމުގެ ބަދަލުގައި އެ ތަނެއްގައި އުޅޭ ފަރާތަކަށް ސީދާ ބިލުކުރެވޭ ގޮތަށް ހަދަން ވަނީ އިސްލާހުކޮށްފައެވެ. މިހާރު އޮންނަ ގޮތުން ނަމަ ކަރަންޓާއި ފެނުގެ ބިލު ފޮނުވަނީ އެ ތަނެއްގެ ވެރިފަރާތަށް ކަމަށްވާއިރު ކުއްޔަށް ދިރިއުޅޭ މީހުން ބައެއް ފަހަރު ތަން ދޫކޮށްފައި ދާއިރު ބިލު ނުދައްކާތީ އޭގެ ޒިންމާ ނަގަން ޖެހެނީ ވެރިފަރާތުންނެވެ.
އެގޮތުން ހުށަހެޅި އިސްލާހުތަކުގެ ތެރޭގައި ޔޫޓިލިޓީ ހިދުމަތްތަކުގެ ތެރެއިން މީޓަރު ކުރެވިފައިވާ ހިދުމަތްތައް ރަޖިސްޓްރީ ކުރެވިފައި ހުންނަން ވާނީ ތަނެއްގެ ވެރިފަރާތުގެ ނަމުގައި ކަމަށާއި، ނަމަވެސް ހިދުމަތް ބޭނުންކުރަނީ އެހެން ފަރާތަކުން ކަމަށް ވާ ނަމަ އެ ހިދުމަތެއް ބޭނުންކުރާ ފަރާތެއްގެ ނަމުގައި ރަޖިސްޓްރީ ކުރެވިދާނެ ކަމަށް ހިމެނެއެވެ. އަދި ހިދުމަތް ރަޖިސްޓްރީކުރި މުއްދަތުގައި އެ ހިދުމަތަކަށް ހިނގާ ހަރަދުތަކުގެ ޒިންމާ ނަގަން ޖެހޭނީ އެ ހިދުމަތެއް ބޭނުންކުރާ ފަރާތަކުން ކަމަށް ވެސް، ހުށަހެޅި އިސްލާހުތަކުގައިވެއެވެ.
އޭގެ އިތުރުން، އެކަން ކުރުމުގެ އުސޫލެއް ޔޫޓިލިޓީ ހިދުމަތްތައް ފޯރުކޮށްދޭ ފަރާތްތަކުގެ މަޝްވަރާގެ މަތިން އެކުލަވާލަން ޖެހޭ ގޮތަށް އިސްލާހެއް ހިމަނާފައިވެއެވެ. އަދި ބިލު ނުދެއްކުމުގެ ސަބަބުން ހިނގާ ޖޫރިމަނާ ކަނޑައެޅުމުގެ އުސޫލުތަކާއި ބިލު ނުދެއްކުމުގެ ސަބަބުން ހިދުމަތް މެދުކަނޑާލަންޖެހޭ ހާލަތުތަކަކީ ކޮބައިކަން ކަނޑައެޅުމާއި އެފަދަ ހާލަތެއް މެދުވެރިވެއްޖެނަމަ އެ ހާލަތުތަކުގައި ކޮންމެހެން އަމަލުކުރަންޖެހޭ އިޖުރާއަތުތައް ކަނޑައެޅުމަށް ވަނީ ހިމަނާފައެވެ.
