މިދިޔަ ސެޕްޓެމްބަރު މަހު ކުޑަކުދިންގެ 219 މައްސަލައެއް ޖެންޑާ މިނިސްޓްރީއަށް ހުށައަޅާފައިވާ ކަމަށް މިނިސްޓްރީގެ ތަފާސްހިސާބުތަކުން ދައްކައިފިއެވެ.
ޖެންޑާ މިނިސްޓްރީގެ ތަފާސް ހިސާބުތަކުން ދައްކާ ގޮތުގައި މިދިޔަ ސެޕްޓެމްބަރު މަހު ޖުމްލަ 219 މައްސަލަ އެ މިނިސްޓްރީއަށް ހުށަހަޅާފައި ވާއިރު އޭގެ ތެރެއިން ކުޑަކުދިންނަށް ކުރާ އަނިޔާގެ 92 މައްސަލައެއް ވަނީ ހުށަހަޅާފައެވެ.
މި ބާވަތުގެ މައްސަލަތަކުގެ ތެރެއިން އެންމެ ގިނައިން ރިޕޯޓުކޮށްފައިވާ މައްސަލަތަކުގެ ތެރޭގައި އިހުމާލުވުމުގެ މައްސަލަ، ޖިންސީ ހާނިއްކައިގެ މައްސަލަ، އަދި ޖިސްމާނީ ހާނިއްކައިގެ މައްސަލަ ހިމެނެއެވެ.
އެގޮތުން މިއިން ކޮންމެ ދާއިރާއެއްގެ 19 މައްސަލަ ރިޕޯޓުކޮށްފައި ވާއިރު ނަފްސާނީ ހާނިއްކައިގެ 18 މައްސަލަ، ގެވެށި އަނިޔާގެ އަމަލެއް ކުރާތަން ކުއްޖަކަށް ދެއްކުން ނުވަތަ ފެނުމުގެ 10 މައްސަލަ، އެހެން ކުދިންގެ ފަރާތުން ގަނާ ލިބުމުގެ 3 މައްސަލަ، ބްލެކްމެއިލް ކުރުމުގެ 2 މައްސަލަ އަދި ފުރައްސާރައިގެ ޝިކާރަކައަކަށް ވުމުގެ 2 މައްސަލަ ވަނީ ހުށަހަޅާފައެވެ.
ވަކި ޖިންސަކަށް ވީތީ ކުރާ އަނިޔާ އަދި ގެވެށި އަނިޔާގެ 36 މައްސަލަ ސެޕްޓެންބަރު މަހު މިނިސްޓްރީ އަށް ވަނީ ހުށަހަޅާފައެވެ. މި ފަދަ މައްސަލަތަކުގެ ތެރެއިން އެންމެ ގިނައިން ރިޕޯޓުކޮށްފައި ވަނީ ނަފްސާނީ އަނިޔާކުރުން/ އަނގަބަހުން ކުރެވޭ އަނިޔާކުރުމުގެ 19 މައްސަލަތަކެވެ.
މިބާވަތުގެ މައްސަލަތަކުގެ ގޮތުގައި ޖިސްމާނީ އަނިޔާކުރުމުގެ 10 މައްސަލަ، ޖިންސީ ހާނިއްކަ ކުރުމުގެ 2 މައްސަލަ، ހިފެހެއްޓުމުގެ އަމަލުގެ 2 މައްސަލަ، ގަދަކަމުން ޖިންސީ ގޯނާކުރުމުގެ 2 މައްސަލަ އަދި ބިރުދެއްކުމުގެ ގޮތުން ކުރެވޭ ކަންކަމުގެ 1 މައްސަލަ ވަނީ ހުށަހެޅިފައެވެ.
އާއިލީ މައްސަލަތަކާއި ގުޅުންހުރި 30 މައްސަލައެއް ސެޕްޓެންބަރު މަހު މިނިސްޓްރީއަށް ވަނީ ހުށަހަޅައިފައެވެ. މި ފަދަ މައްސަލަތަކުގެ ތެރޭގައި ކުދިންނާއި ބައްދަލުކުރުމުގައި ޖެހޭ 16 މައްސަލަ، ކުދިން ބެލުމުގައި ޖެހޭ 9 މައްސަލަ އަދި ހަޟާނާތުގެ 5 މައްސަލަ ހިމެނެއެވެ.
މިނިސްޓްރީއިން ބުނީ ސެޕްޓެމްބަރު މަހުގެ ނިޔަލަށް ދައުލަތުގެ ބެލުމުގެ ދަށުގައި ތިބި ކުދިންގެ ޖުމުލަ އަދަދަކީ 186 ކަމަށާއި ސެޕްޓެމްބަރު ގައި 4 ކުއްޖަކު ދައުލަތުގެ ބެލުމުގެ ދަށަށް ނަގައި، 3 ކުއްޖެއް ރީއިންޓާގްރޭޓް ކޮށް، 2 ކުއްޖަކު ފޯސްޓާކޮށް، އަދި 18 އަހަރު ފުރުމާއި ގުޅިގެން 1 ކުއްޖަކަށް ވަޒީފާ ހޯދާދައިވާ ކަމަށެވެ.
