ހީނާމާގެ ޕާކިން ޒޯނުގެ ކައިރީގައި އޮތް ކާނުގަނޑަކަށް ވެއްޓި، ކުޑަކުއްޖަކު ވަރަށް ބޮޑަށް ޒަހަމްވެއްޖެއެވެ.
ރޭ ހިނގި އެ ހާދިސާގައި ޒަހަމްވެފައިވަނީ ހަތަރު އަހަރުގެ ފިރިހެން ކުއްޖެކެވެ. އެގޮތުން އެ ކުއްޖާ ކާނުގަނޑަށް ވެއްޓުނުއިރު، އެ ތަނުގެ ދެ ފަރާތުގައި އިން ދެ ދަގަނޑުކޮޅު ހެރި، ވާތުފައި ވަނީ ވަރަށް ބޮޑަށް ޒަހަމްވެފައެވެ.
އިތުރު ފަރުވާ ދިނުމަށްޓަކައި އެ ކުއްޖާ އޭޑީކޭ ހޮސްޕިޓަލަށް ވަގުތުން ގެންގޮސް ދެ ގަޑިއިރުގެ އޮޕަރޭޝަނެއް ކުރުމަށް ފަހު މިހާރު އަންނަނީ ފަރުވާ ދެމުންނެވެ.
އެ ހާދިސާ އާ ގުޅިގެން ކުރި ޓްވީޓަކަށް ރައްދު ދެއްވައި މޭޔަރު ޑރ. މުހައްމަދު މުއިއްޒު ވިދާޅުވީ، މިފަދަ ހާދިސާ އެއް ހިނގިކަން އެނގިވަޑައިގަތުމުން ހިތާމަކުރައްވާ ކަމަށެވެ. އަދި ގަޑިއިރެއްތެރޭ ކާނުގަނޑު ބަދަލުކޮށްފައިވާ ކަމަށް މޭޔަރު ވިދާޅުވިއެވެ.
މީގެ ކުރިން ވެސް މާލޭގައި އެފަދަ ހާދިސާތައް ހިނގާފައި އެބަ ހުއްޓެވެ.
