މި ފެށޭ އޮކްޓޯބަރު މަހުގެ ހަވަނަ ދުވަހު އާ ރަންވޭ ހުޅުވުމަށްޓަކައި ވެލާނާ އެއާޕޯޓުގެ ހުރިހާ އޮޕަރޭޝަންތަކެއް އަށް ގަޑިއިރަށް މެދުކަނޑާލާނެ ކަމަށް، އެމްއޭސީއެލުން މިއަދު ބުނެފިއެވެ.
"ރާއްޖެ ޓީވީ"ގެ "ފަށާއިރު" ޕްރޮގްރާމުގައި ވާހަކަ ދައްކަވަމުން ވެލާނާ އެއާޕޯޓުގެ ޓާމިނަލް އޮޕަރޭޝަންސްގެ ޖެނެރަލް މެނޭޖަރު އިބްރާހީމް ހުސައިން ވިދާޅުވީ، އަންނަ ބުރާސްފަތި ދުވަހު އާ ރަންވޭ ހުޅުވުމުގެ މަސައްކަތް ކުރަމުންދާ ކަމަށެވެ.
އެގޮތުން އާ ރަންވޭ ހުޅުވުމަށްޓަކައި އަންނަ ބުދަ ދުވަހުގެރޭ ރޭގަނޑު 11 އިން ފެށިގެން އެއާޕޯޓުގެ ހުރިހާ އޮޕަރޭޝަންތަކެއް މެދުކަނޑާލާނެ ކަމަށް އޭނާ ވިދާޅުވިއެވެ.
ހަވަނަ ދުވަހު ރަންވޭ ހުޅުވުމަށް ތައްޔާރުވުމަށްޓަކައި 5 ވަނަ ދުވަހުގެރޭ 11 ޖަހާއިރު ހުރިހާ މޫވްމަންޓެއް ހުއްޓާލާނަން. ޑޮމެސްޓިކް އާއި އިންޓަނޭޝަނަލް ވެސް." އިބްރާހީމް ވިދާޅުވިއެވެ.
އޭނާ ވިދާޅުވި ގޮތުގައި، އާ ރަންވޭ ހުޅުވުމަށް ފަހު، އެއާޕޯޓުގެ ހުރިހާ އޮޕަރޭޝަނެއް ބުރާސްފަތި ދުވަހުގެ ހެނދުނު 7 ޖަހާއިރު ފަށާނެއެވެ
އާ ރަންވޭގެ މަސައްކަތް ނިންމާލީ ކުރީގެ ރައީސް އަބްދުﷲ ޔާމީންގެ ފަސް އަހަރުގެ ދައުރު ނިމެން ކައިރިވެފައި ވަނިކޮށް 2018 ގައެވެ. އެ ރަންވޭ ތަރައްގީކޮށްފައި ވަނީ 373 މިލިއަން ޑޮލަރުގެ ލޯނެއް ޗައިނާގެ އެގްޒިމް ބޭންކުން ނަގައިގެން އެ ގައުމުގެ ބެއިޖިން އާބަން ކޮންސްޓްރަކްޝަން ގްރޫޕާ ހަވާލުކޮށްގެންނެވެ.
އަންނަ މަހުގެ 6 ގައި ހުޅުވާ ރަންވޭ އަކީ 3.4 ކިލޯމީޓަރު ދިގު، 60 މީޓަރު ފުޅާ ރަންވޭއެކެވެ. އާ ރަންވޭ އާ އެއްކޮށް އާ ސީޕްލޭން ޓާމިނަލް ހުޅުވުމަށް ވެސް ވަނީ ހަމަޖެހިފައެވެ.
