އޭނާ އަކީ އެއްވެސް ހިނދެއްގައި ސިޔާސީ ބޭފުޅެއް ނޫން ކަމަށާއި ނަމަވެސް، އިސްލާހަށް މަސައްކަތްކުރައްވާ ބޭފުޅެއް ކަމަށް، ޖުމްހޫރީ ޕާޓީގެ ލީޑަރު ގާސިމް އިބްރާހީމް ވިދާޅުވެއްޖެއެވެ.

ރާއްޖެ ޓީވީގެ "ފަށާއިރު" ޕްރޮގްރާމަށް ދެއްވި އިންޓަވިއުއެއްގައި ގާސިމް ވިދާޅުވީ، އޭނާ އަކީ ސިޔާސީ ބޭފުޅެއް ނަމަ، ގައުމު އިސްލާހުކޮށް ހަމަ މަގަށް އެޅުވުމަށްޓަކައި އެއްވެސް މަސައްކަތެއް ނުކުރައްވާނެ ކަމަށެވެ.

"އަޅުގަނޑަކީ އަބަދުވެސް ސިޔާސީ މީހެއް ނޫން. އަޅުގަނޑަކީ އިސްލާހަށް މަސައްކަތްކުރާ މީހެއް. މިގައުމު އިސްލާހުކުރުމަށްޓަކައި އަޅުގަނޑު މަސައްކަތް ކުރި މީހެއް. ސިޔާސީ މީހެއް ނަމަކަ އެހެނެއް ނޫޅޭނެ."
ގާސިމް އިބްރާހީމް | ޖުމްހޫރީ ޕާޓީގެ ލީޑަރު

"ސިޔާސީ މީހުން އުޅޭ ގޮތަށް އަޅުގަނޑު އުޅެލައިފިއްޔާ އަޅުގަނޑުގެ ހުރިހާ ޒިންދަގީ އެއް ދުއްވާލާނެ ކަން އެނގޭ. އެއީ މިހާރު ވެސް އެކަން އޮތް ގޮތް. ކުރިން ވެސް އޮތް ގޮތް." ގާސިމް ވިދާޅުވިއެވެ.

މާމިގިލި ދާއިރާގެ މެންބަރު ކަން ވެސް ކުރައްވާ ގާސިމް ވިދާޅުވި ގޮތުގައި، ޖުމްހޫރީ ޕާޓީގެ ފަރާތުން ރިޔާސީ ކެންޑިޑޭޓުގެ ގޮތުގައި އޭނާ ނިކުމެވަޑައިގަންނަވާނެ ކަން ނުވަތަ ނޫންކަން އަދި ދަންނަވަން ދައްޗެވެ. އެ މޭރުމުން ވާހަކަ ދައްކަވަމުން އޭނާ ވިދާޅުވީ ސިޔާސީ މީހެއް ނަމަ، މިހާރު ހުންނަވާނީ ރައީސުލްޖުމްހޫރިއްޔާގެ ގޮތުގައި ކަމަށެވެ.

އެކަމަކު ވަކި ސަބަބުތަކާ ހެދި ސިޔާސީ ބޭފުޅަކަށް ވާން ބޭނުން ނުވާ ކަމަށް ގާސިމް ވިދާޅުވި ނަމަވެސް، އެކަމުގެ ތަފްސީލެއް ނުދެއްވައެވެ.

"އަޅުގަނޑު ސިޔާސީ މީހެއް ނަމަ، އަޅުގަނޑު ހުންނާނީ ވެރިކަމުގަ މިއަދު ވެސް އިއްޔެ ވެސް. އިނގޭތޯ. އެކަމަކު އަޅުގަނޑު ސިޔާސީ މީހަކަށް ވާން ބޭނުން ނުވަނީ ސަަބަބުތަކެއް ހުރީމަ."
ގާސިމް އިބްރާހީމް | ޖުމްހޫރީ ޕާޓީގެ ލީޑަރު

"އެ ސަބަބުތައް އަޅުގަނޑު ކޮންމެހެން މިއަދު ދަންނަވާކަށް ބޭނުމެއް ނެތް. އެހެންވެ އަޅުގަނޑު މިހާ ފަހަތަށް ޖެހިފަ ވެސް މި އޮންނަނީ." ގާސިމް ވިދާޅުވިއެވެ.

އިސްލާހަށްޓަކައި ކުރައްވަން ޖެހޭ ކޮންމެ ފަދަ މަސައްކަތެއް ކުރައްވާނެ ކަމަށް ވެސް ވިދާޅުވިއެވެ. އޭގެ އިތުރުން، ގާސިމް ވަނީ އޭނާ އަށް ލިބިވަޑައިގަތް އާމްދަނީ ހޭދަކުރެއްވި ގޮތް ވެސް ކިޔައިދެއްވައިފައެވެ.

"އަޅުގަނޑަށް ލިބުނު އާމްދަނީއެއްގެ ގާތްގަނޑަކަށް 60 ޕަސެންޓު އަޅުގަނޑު ހޭދަކުރީ މި ދިވެހި ގައުމުގެ ކުރިއެރުމާއި ދިވެހި ރައްޔިތުންނަށް ކިޔަވައިދިނުމާއި އެހީތެރިވެދިނުމާއި އެކިއެކި ކަންތައްތަކާ ﷲ ގެ މަގުގައި ހޭދަކުރުމާއި މި ކަންތައްތަކަށް ހޭދަކުރީ. އަޅުގަނޑަށް ލިބުނު އަނެއް 40 ޕަސެންޓު އެއީ އިންވެސްޓްމެންޓްތަކަށް."
ގާސިމް އިބްރާހީމް | ޖުމްހޫރީ ޕާޓީގެ ލީޑަރު

އޭނާ ގަބޫލުކުރައްވާ ގޮތުގައި ރާއްޖެ އަށް ގިނަގުނަ ހިދުމަތްތައް އޭނާގެ ފަރާތުން ކޮށްދެވިއްޖެއެވެ.