އެއް މިލިއަން ޑޮލަރަށްވާ ރުފިޔާގެ އަދަދު ޔަގީންކުރުމަށް ގުނީ ބައިލައްކަ ރުފިޔާގެ އެއް ބޮނޑި ކަމަށް، ޔާމީންގެ މައްސަލައިގައި ހެކިބަސް ދިން އެމަނިކުފާނުގެ ކުރީގެ ޑްރައިވަރު އަބްދުﷲ ރަޝީދު ބުނެފިއެވެ.
ވ. އާރަށް ކުއްޔަށް ދިން މައްސަލައިގައި ކުރީގެ ރައީސް އަބްދުﷲ ޔާމީންގެ މައްޗަށް އުފުލާފައިވާ ދައުވާތަކާ ގުޅިގެން ބާއްވާ ޝަރީއަތުގެ މިއަދުގެ އަޑުއެހުމުގައި ތިން ހެއްކެއްގެ ހެކިބަސް ނަގަން އޮތީ ތާވަލުކޮށްފައެވެ. އޭގެ ތެރެއިން ދެ ހެއްކެއްގެ ހެކިބަސް ނަގާފައިވާއިރު، އެންމެ ފުރަތަމަ ނަގާފައި ވަނީ އަބްދުﷲ ރަޝީދު ނަމަކަށް ކިޔާ މީހެއްގެ ހެކިބަހެވެ.
މިދިޔަ ބުދަ ބޭއްވި އަޑުއެހުމުގައި މާލޭގެ ޑެޕިއުޓީ މޭޔަރު އަހްމަދު ނަރީޝް ވަނީ، ޔާމީން ހަވާލުކުރެއްވި ފައިސާ، ފެލިދޫ ދާއިރާގެ ކުރީގެ މެންބަރު ޔޫސުފް ނައީމަށް ހަވާލުކުރެއްވުމަށް އޭނާ އާ އެކު އަބްދުﷲ ރަޝީދު ދިޔަ ކަމަށް ހެކިބަސް ދީފައެވެ. މިއަދުގެ އަޑުއެހުމުގައި އެކަމަށް އެއްބަސްވެ، އަބްދުﷲ ރަޝީދު ބުނީ، ޔާމީން އޭރު ދިރިއުޅުއްވި ގ. ދޫވެއްސަށް ދިޔައިރު، އެ ގޭގެ ސިޓިން ރޫމުގައި ބަހައްޓާފައި ހުރި ދެ ދަބަހެއްގައި އެ ފައިސާ ހުރިކަމަށެވެ.
އޭނާ ބުނި ގޮތުގައި، އޭނާ އަކީ ޔާމީން ހަވާލުކުރެއްވި އެއް މިލިއަން ރުފިޔާ ޔޫސުފް ނައީމާ ހަވާލުކުރި މީހުންގެ ތެރެއިން އެކަކެވެ. އެ ފައިސާ ހަވާލުކުރުމުން، ފައިސާ ލިބުނު ކަމުގެ ލިޔުމުގައި ޔޫސުފް ނައީމް ވަގުތުން ސޮއިކުރެއްވި ކަމަށެވެ. އެ ފައިސާ ހަވާލުކުރީ ކަޅު ދަބަހެއްގައި ކަމަށާއި، އެ ފައިސާ އުފުލީ ނަރީޝް އާ އެއްކޮށް ކަމަށް ވެސް އަބްދުﷲ ބުންޏެވެ.
ހަމަ އެއާއެކު އޭނާ ބުނީ، އެ ފައިސާ ގެންދިއުމުގެ ކުރިން ފައިސާ ގުނީ ވެސް އެ ދެ މީހުން ކަމަށާއި، ގުނާފައި ވަނީ ބައިލައްކަ ރުފިޔާގެ 500ރ ގެ އެންމެ ބޮނޑިއެއް ކަމަށާއި، ވަކިވަކިން ހުރިހާ ބޮނޑި އެއް ނުގުނާ ކަމަށެވެ.
އަބްދުﷲ ބުނި ގޮތުގައި، އެއް މިލިއަން ޑޮލަރަށްވާ ދިވެހި ރުފިޔާ ހުރިކަން ޔަގީންކުރީ އެއް ބޮނޑި ގުނާފައި، ބާކީ ބޮނޑިތަކުގައި ވެސް އެ އަދަދަށް ފައިސާ ހުންނާނެ ކަމަށް ގަބޫލުކުރެވޭތީއެވެ. އަދި އެ އަދަދަށް ފައިސާ ހުންނާނެ ކަމަށް ޔާމީން ވިދާޅުވުމުން އޭގައި ހުންނާނީ އެވަރު ހުންނާނެ ކަމަށް ގަބޫލު ކުރީ ކަމަށް ވެސް ބުންޏެވެ.
އޭނާ ބުނީ، ޔޫސުފް ނައީމް ދަންނަނީ ކުރިން މެންބަރުކަން ކުރެއްވި މެންބަރެއްގެ ހައިސިއްޔަތުން ކަމަށާއި، ބައްދަލުވީ އެންމެ ދެ ފަހަރު ކަމަށެވެ. އަބްދުﷲ ބުނި ގޮތުގައި، ޔާމީން ޕީއޭ ހިންގެވި ދުވަސްވަރުން ފެށިގެން އެމަނިކުފާނުގެ ފައިސާގެ ބައެއް މުއާމަލާތްތަކުގައި އުޅެފައިވާނެއެވެ. އެގޮތުން ބޭންކަށް ޖަމާކުރަން ޖެހޭ ބައެއް ފައިސާގެ ކަންކަން ހަމަޖައްސާކަމަށް ވެސް ބުންޏެވެ.
އެ މައްސަލައިގައި ނަރީޝް ވެސް ހެއްކެއްގެ ގޮތުގައި ހާޒިރުކޮށް ހެކިބަސް ނެގިއެވެ. ނަރީޝް ވެސް ވިދާޅުވީ ޔާމީން ހަވާލުކުރެއްވި އެއް މިލިއަން ޑޮލަރަށް ވާ ދިވެހި ފައިސާ ދޫވެހީގައި ތިބެގެން ގުނައި ޔޫސުފް ނައީމާ ހަވާލުކޮށްފައިވާނެ ކަމަށެވެ. އެ މުއާމަލާތް ހިނގި ތާރީހު ސީދާ ހަނދުމަފުޅު ނެތްނަމަވެސް އެއީ 2015 ވަނަ އަހަރުގެ ސެޕްޓެންބަރު މަހުގެ ދުވަހެއް ކަމަށް ނަރީޝް ވިދާޅުވިއެވެ.
