ހުސްވި ޖޫން މަހުން ފެށިގެން ޕާކިސްތާނުގެ އެކި ސަރަހައްދުތަކަށް ކުރަމުންދާ ވިއްސާރައިގައި ފެންބޮޑުވެ މިއަދާ ހަމައަށް 1265 މީހަކު މަރުވެއްޖެއެވެ. އިދާރާތަކުން ބުނާ ގޮތުން ޕާކިސްތާނުގެ ތިންބައިކުޅަ އެއްބައި މިހާރު ވަނީ ފެންބޮޑުވެ ފެނު އަޑީގައެވެ. ކޯރުތައް ފުރި، އުސް ސަރަހައްދުތަކުން ތިރި ސަރަހައްދުތަކަށް ފެންގަނޑު ފައިބައިގެން ދާ އިރު އުފެދޭ ޕްރެޝަރުގައި މުދަލާއި، ގޯތިގެދޮރާއި ބޮޑެތި އިމާރާތްތަކާއި ނައަމްސޫއްޕާއި ގޮވާމާއި، މޭވާގެ ދަނޑުތަކާއި އެނޫންވެސް އެތައް އެއްޗެއް ހަލާކުވެ ދަނީ ޣަރަގުވަމުންނެވެ.
ވާރޭވެހި ފެންބޮޑުވަމުން ދާ މިހާދާގައި އަދިވެސް އެ ގައުމުގެ ބައެއް ސަރަހައްދުތަކަށް ދަނީ ވާރޭ ވެހެމުންނެވެ. އެއާއެކު އަދިވެސް ފެންބޮޑުވާނެ ކަމުގެ އިންޒާރު ކަމާބެހޭ އިދާރާތަކުން ދަނީ ދެމުންނެވެ.
ފެންބޮޑުވުމުގެ މިހާދިސާގައި، ޕާކިސްތާނުގެ އުމްރާނީ ތަރައްގީގެ ބޮޑު ބައެއް ހަލާކުވެ ފަނާވެ ހިނގައްޖެއެވެ. އޭގެ ތެރޭގައި ބްރިޖް ތަކާއި، މަގުތަކާއި، ކަރަންޓް އުފައްދާ ފެސިލިޓީތައްވެސް ހިމެނެއެވެ.
ޕާކިސްތާނުގެ އިދާރާތަކުން ބުނާ ގޮތުން، މަރުވި މީހުންގެ އިތުރުން 33 މިލިއަން މީހަކަށް ވަނީ މި ހާދިސާގެ އަސަރު ކޮށްފައެވެ. އަދި އިދާރާތަކުގެ މަސައްކަތުން ހާލުގައި ޖެހިފައި ތިބި 83،000 މީހުން ރައްކާތެރި ސަރަހައްދުތަކަށް މިހާރުވެސް ގެންދެވިފައި ވާކަމަށް ބުނެއެވެ.
ޕާކިސްތާނަށް އެހީވުމުގައި އެމެރިކާއާއި، ތުރުކީ، ޗައިނާ، ގަތަރު، އުޒުބަކިސްތާން، ޖޯޑަން އަދި ތުރުކުމަނިސްތާން ފަދަ ގައުމުތަކުން ދަނީ ހަރަކާތްތެރި ވަމުންނެވެ. އެ ގޮތުން މިހާރު ކާބޯތަކެއްޗާއި އެހީގެ ސާމާނު ބަރުކޮށްގެން ފުރި 29 ބޯޓެއް މިހާރު ވަނީ ޕާކިސްތާނަށް ޖައްސާފައެވެ.
ޕާކިސްތާނުގެ އިދާރާތަކުން ބުނާގޮތުން، އެ ގައުމަށް ލިބެމުންދާ މޫސުމީ އެ ގެއްލުމުން އަރައިގަތުމަށް 10 ބިލިއަން ޑޮލަރު ބޭނުންވާނެއެވެ. އަދި އެކަމުގައި ބައިނަލްއަގުވާމީ އެހީތެރިކަމަށް ޕާކިސްތާނު ވަނީ ގޮވާލާފައެވެ. އަދި މިވަގުތުން ވަގުތަށް 160 މިލިއަން ޑޮލަރުގެ އެހީ ބޭނުންވާ ކަމަށާއި އެކަމަށް ފަންޑެއް އުފައްދާ އދ އާއި ޕާކިސްތާން ގުޅިގެން ވަނީ އިއުލާން ކޮށްފައެވެ.
ޕާކިސްތާނުގައި މަރުވި 1265 މީހުންގެ ތެރެއިން 441 އަކީ ކުޑަކުދިންނެވެ.
