ތަކުރާރުކޮށް ވައްކަން ކުރާ މީހަކު ހައްޔަރުކޮށް، ބަންދުގެ މުއްދަތު ހަމަވުމުން ނޫނީ އޭނާ ކޯޓަށް ހާޒިރުކޮށްގެން ދޫނުކުރަން މިއަދު އަމުރުކޮފިއެވެ.

ކްރިމިނަލް ކޯޓުން މިފަދަ އަމުރެއް ކުރީ ފިހާރައަކުން ސެންޓު ފުޅިއެއް ވަގަށް ނެގި މައްސަލައެއްގައި ހައްޔަރުކުރި ހުސައިން ރިޔާޒްގެ ޝަރީއަތުގައެވެ. އޭނާ މަސް ދުވަހަށް ބަންދުކުރުމަށް ކްރިމިނަލް ކޯޓުން ވަނީ އަމުރުކޮށްފައެވެ.

ބަންދު އަމުރުގައިވާ ގޮތުން، 43 އަހަރުގެ ރިޔާޒަކީ ވައްކަމުގެ މައްސަލަތަކުގައި އެކި ފަހަރު މަތިން ހައްޔަރުކޮށް ބަންދުކޮށްފައިވާ މީހެކެވެ. އާންމު ގޮތެއްގައި އެފަދަ މައްސަލަތަކުގައި ހައްޔަރުކުރާ މީހުން ބަންދުކުރަނީ ކުރު މުއްދަތަކަށް ކަން ފާހަގަކުރައްވައި ގާޒީ ސަފްއަތު ހަބީބުގެ އަމުރުގައި ވިދާޅުވީ، އެ މުއްދަތު ހަމަވުމުގެ ކުރިން ދޫކޮށްލާ ގިނަ މީހުންނަކީ މަސްތުވާތަކެއްޗާ ގުޅުން ހުންނަ މީހުންނެވެ.

އެ އަމުރުގައި ގާޒީ ވިދާޅުވީ، އެފަދަ މީހުންގެ ފަރާތުން މުޖުތަމައަށް ނުރައްކާ ބޮޑުވާ ކަމަށެވެ.

"މިފަދަ ފަރާތެއް ބަންދުން ދޫކޮށްލުމުން ކުށް ތަކުރާރުކުރާނަމަ އެފަދަ ފަރާތެއްގެ ކިބައިން މުޖުތަމައުގެ ސަލާމަށް ނުރައްކާވާ ސަބަބު ބޮޑުވެދޭ." އެހެންކަމުން، ރިޔާޒް މަސް ދުވަހަށް ބަންދުކުރަން ވަނީ އަމުރުކޮށްފައެވެ.

އެ މުއްދަތު ހަމަވުމުގެ ކުރިން ފަނޑިޔާރެއްގެ ކުރިމައްޗަށް ހާޒިރުކޮށް، ބަންދުން ދޫކޮށްލައިގެން ނުވާނެ ކަމުގައި ވެސް، އަމުރުގައިވެއެވެ.

ހަބަރު ކްރިމިނަލް ކޯޓް