އިމާރާތްކުރުމަށާއި ސިނާއީ އެހެނިހެން މަޝްރޫއުތަކަށް ބިމުން ފެން ނަގައި އެ ފެން ބޭރުކުރާނަމަ ބޮޑު ޖޫރިމަނާ ކުރާ ގޮތަށް ގަވާއިދު އިސްލާހު ގެނެސްފިއެވެ.
މި ގަވައިދުގައި ބުނާ ގޮތުން، އެއްވެސް ފަރާތަކުން ހުއްދަ ނެގުމަކާ ނުލައި ބިމުން ފެން ނަގައި ފެންބޭރުކުރުމަށްފަހު ހުއްދައަށް އެދި ހުށަހަޅައިފިނަމަ ހުއްދަ ދެވޭނީ، ހުއްދަ ނެގުމަކާ ނުލައި ބިމުން ފެން ނަގައި ފެން ބޭރުކުރި މުއްދަތަށްވާ ޖޫރިމަނާ އޮތޯރިޓީއަށް ދެއްކުމުންނެވެ.
ބިމުން ފެން ނަގައި ފެން ބޭރުކުރުމުގެ މަސައްކަތްކުރާ ފަރާތްތަކުން ހުއްދަ ނެގުމަކާނުލައި ނުވަތަ ދީފައިވާ ހުއްދައިގެ މުއްދަތު އިތުރުކުރުމަކާ ނުލައި ބިމުން ފެންނަގައި ފެން ބޭރުކޮށްފިނަމަ، އެފަދަ ފަރާތެއްގެ އަދަބަކީ އެ މަސައްކަތް ކުރި ކޮންމެދުވަހަށް 40،000 ރުފިޔާއިން ޖޫރިމަނާ ކުރުން ކަމަށް ގަވައިދުގައި ބުނެއެވެ.
މިގޮތުން، އެންމެ ގިނަވެގެން ޖޫރިމަނާ ކުރެވޭނީ އެއް މިލިއަން ރުފިޔާއާ ހަމައަށް ކަމަށް ވެސް އެގަވައިދުގައި ބަޔާންކޮށްފައިވެއެވެ.
މީގެ އިތުރުން ބިމުން ފެން ނަގައި ފެން ބޭރުކުރުމުގެ މަސައްކަތްކުރާ ފަރާތްތަކުން މި ގަވާއިދާ ހިލާފަށް އެއްވެސް އަމަލެއް ކޮށްފިނަމަ، އެފަދަ ފަރާތެއްގެ އަދަބަކީ އެ އަމަލެއްގެ ކުޑަބޮޑުމިނަށް ބަލައި އެކަން ކުރި ފަރާތެއް، 5000 ރުފިޔާ އާއި އެއް މިލިއަން ރުފިޔާއާ ދެމެދުގެ އަ ދަދަކުން ޖޫރިމަނާ ކުރާނެ ކަމަށް ވެސް މިގަވައިދުގައި ބުނެއެވެ.
