މާލޭގައި ހުރި 5 މިސްކިތެއްގައި ޖަހުރިއްޔަ ނަމާދު (އަޑުހަރުކޮށް ކިޔަވާ ނަމާދު) ތަކުގައި އަޑު މަޑުކުރަން އަންގާފައިވާ ކަމަށް އިސްލާމިކް މިނިސްޓްރީން ބުނެފިއެވެ.

މާލޭގެ ބައެއް މިސްކިތްތަކުގައި ނަމާދު ކުރާ އަޑު ބޭރަށް ނުދާނެ ހެން ހެދުމަށް އަންގާފައިވާ ކަމަށް ބުނެ ނޫސްތަކުން ރިޕޯޓް ކުރުމުން އެކަމާ ގުޅޭ ތަފްސީލް ހާމަ ކުރުމަށް އިސްލާމިކް މިނިސްޓްރިން ވަނީ ނޫސް ބަޔާނެއް ނެރެފައެވެ. އެ ބަޔާނުގައި އެ މިނިސްޓްރިން ބުނީ، މިސްކިތުގައި ނަމާދު ކުރާ އަޑު ބޭރަށް ނީވޭ ގޮތަށް ހަދަން އެ މިނިސްޓްރީން އެއްވެސް އިރަކު އެއްވެސް ފަރާތަކަށް އަންގާފައި ނުވާނެ ކަމަށެވެ. ކުރިން ވެސް އަމަލު ކުރަމުން އަންނަ އުސޫލާ އެއްގޮތަށް މިހާރުވެސް މިސްކިތްތަކުގައި ހުންނާނީ ނަމާދު ކުރާ އަޑު ބޭރަށް އިވޭ ގޮތަށް ކަމަށް އެ މިނިސްޓްރީން ބުނެއެވެ.

ނަމަވެސް އަޑު ބާރުކަމަށް ބުނެ ލިބުނު ޝަކުވާތަކާ ގުޅިގެން ބެލިބެލުމުން މާލޭގެ ފަސް މިސްކިތެއްގައި ޖަހުރިއްޔަ ނަމާދުތަކުގައި ބޭރަށް އަޑު ޖައްސާފައި ހުންނަ މިންވަރު މަޑުކުރުން އެއީ ދީނީ ގޮތުން އެންމެ މަސްލަހަތު ރަނގަޅު ގޮތް ކަމުގައި ފެންނަ ކަމަށް އިސްލާމިކް މިނިސްޓްރީން ބުނެއެވެ. އެހެންކަމުން އެ ފަސް މިސްކިތުގެ އިމާމުންނަށް ޖަހުރިއްޔަ ނަމާޑދުތައް ކުރާއިރު ބޭރަށް އަޑު ޖައްސާފައި ހުންނަ މިންވަރު މަޑު ކުރުމަށް ވަނީ އިރުޝަޑު ދީފައި ކަމަށް އިސްލާމިކް މިނިސްޓްރީން ބުނެއެވެ.

މީގެ އިތުރުން މާލޭގައި ބައެއް މިސްކިތްތަކަކީ ކައިރިކައިރީގައި ހުންނަ މިސްކިތްތަތަކަކށް ވެފައި އެއް މިސްކިތުން އަނެއް މިސްކިތަށް ނަމާދުކުރާ އަޑު ބާރަށް އިވި ނަމާދު ކުރާ އިރު ދަތިވާ ކަމަށް ވެސް ވަނީ ފާހަގަ ކުރެވިފައި ކަމަށް އެ މިނިސްޓްރީން ބުނެއެވެ. ހަމައެއާއެކު މިސްކިތް ހުންނަ ސަރަހއްދުގެ ގޮތުން ތުއްތު ކުދިން ތިބޭ ކައިރި ގޭގެއިން ވެސް ދަތިވާ ކަމަށް ވަނީ ފާޙަގަ ކުރެވިފައި ކަމަށް އެ މިނިސްޓްރީން ބުނެއެވެ.

5 މިސްކިތަކަށް ޖަހުރިއްޔަ ނަމާދު ކުރާއިރު އަޑު މަޑު ކުރަން އިމާމުންނަށް އަންގާފައިވާ ކަމަށް އިސްލާމިކް މިނިސްޓްރީން ބުނެފައި ވީ ނަމަވެސް އެ މިސްކިތްތަކުގެ ނަން އެ މިނިސްޓްރީން ހާމައެއް ކުނުރެއެވެ.

ހަބަރު އިސްލާމިކް މިނިސްޓްރީ މިސްކިތް