ކުށްތަކުގައި ތުހުމަތުކުރެވޭ މީހުންނަށް އަނިޔާކުރާ މައްސަލާގައި ފިޔަވަޅުއަޅާނެ ކަމަށް ބުނެ ފުލުހުންގެ އިންޒާރެއް ދީފިއެވެ.
ފުލުހުން މިހެން ބުނެފައިމިވަނީ ފިރިހެން ޓީޗަރަކު އޭނާގެ ފިރިހެން ދަރިވަރަކަށް ބަދުއަހްލާގީ ވީޑިއޯ ދެއްކި މައްސަލައެއް ފެންމަތިވެ، އެ ފިރިހެން ޓީޗަރަކަށް ހުޅުމާލޭގައި ރޭ ބަޔަކު އަނިޔާކޮށްފައިވާ ދަނޑިވަޅެއްގައެވެ.
ފުލުހުން ބުނީ ކުށްކުށަށް އަރައިގަންނަ ފަރާތްތަކާއި މައްސަލަތަކުގައި ތުހުމަތު ކުރެވޭ ފަރާތްތަކުގެ މައްސަލަތައް ތަހުގީގުކޮށް އެ ފަރާތްތަކަށް އަދަބު ދެވޭނެ ގޮތްތައް ރާއްޖޭގެ ގާނޫނުތަކާއި ގަވާއިދުތަކުގައި ކަނޑައެޅިގެން ބަޔާންކޮށްފައި ވާ ކަމަށެވެ. އެހެންނަމަވެސް އިންސާފު ހޯދުމަށްކަމަށް ބުނެ ޖިނާއީ މައްސަލަތަކުގައި ތުހުމަތު ކުރެވޭ މީހުންނާމެދު ރާއްޖޭގެ ގާނޫނުތަކާ ހިލާފު އަނިޔާވެރި އަމަލުތައް ހިނގުމަކީ ކަންބޮޑުވާ ކަމެއް ކަމަށެވެ.
އެފަދަ ކަންކަމަކީ މުޖުތަމައުގެ މަސްލަހަތު ގެއްލިގެން ހިނގާދާނެ ފަދަ އަމަލުތަކެއް ކަމަށްވެސް ފުލުހުން ވަނީ ފާހަގަކޮށްފައެވެ.
ފުލުހުން އިތުރަށް ބުނީ އެ ފަދަ ކަންތައްތައް ތަކުރާ ނުކުރުމަށް އިލްތިމާސްކުރާ ކަމަށާއި އެފަދަ ކުށްތައް ހިންގާ ފަރާތްތަކުގެ މައްސަލަ ތަހުގީގުކޮށް ގަނޫނީ ފިޔަވަޅު އަޅާނެ ކަމަށެވެ.
އެޑިއުކޭޝަން މިނިސްޓްރީއިން ބުނެފައިވަނީ އެ މައްސަލަ މި މަހުގެ 17 ވަނަ ދުވަހު ހުށަހަޅާފައިވާ ކަމަށެވެ. އެ މައްސަލަ އެޑިއުކޭޝަން މިނިސްޓްރީއަށް ހުށަހެޅުމާ އެކު އެ ދުވަހު އެ ޓީޗަރު ވަނީ ސަސްޕެންޑް ކޮށްފައި ކަމަށް ވެސް އެޑިއުކޭޝަން އިން ބުނެއެވެ.
އެމީހާއަށް އަނިޔާ ކުރި މައްސަލަ ރޭ 10:00 ގައި ފުލުހުންނަށް ރިޕޯޓްކޮށްފައި ވުމުން، އަނިޔާ ލިބުނު މީހާ ވަނީ ފުލުހުންގެ ބެލުމުގެ ދަށަށް ރޭ ގެންގޮސްފައެވެ. އެމީހާ އަކީ އުމުރުން 29 އަހަރުގެ ފިރިހެނެއް ކަަމަށް ފުލުހުން ބުނެއެވެ.
ސީޕީހަމީދަކީ ކުއްވެރިއްނައް ހިމާޔައްދޭމީހެއް މިގައުމު ހަލާކުކުރާމީހެއް