ތިމާވެއްޓާ ބެހޭ ވުޒާރާގެ ސްޓޭޓް މިނިސްޓަރު އަދި ޖުމްހޫރީ ޕާޓީގެ ޗީފް ސްޕޯކްސްޕާސަން އަލީ ސޯލިހަށް ތޫނު އެއްޗަކުން ހަމަލަދީ ޒަހަމްކޮށްލައިފިއެވެ.
އަލީ ސޯލިހަށް ހަމަލަދީފައި ވަނީ ހުޅުމާލޭގައި ހުންނަ ސޮނީ ހާޑްވެއާ ފިހާރަ ހުރި ސަރަހައްދުގައެވެ.
ފުލުހުން ބުނީ، އަލީ ސޯލިހަށް ހަމަލަދިން މައްސަލަ ރިޕޯޓްކޮށްފައި ވަނީ މިއަދު މެންދުރުފަހު 1:30 ވާން ކައިރިވެފައި ވަނިކޮށް ކަމަށެވެ. އަދި އޭނާ އަށް ހުޅުމާލެ ހޮސްޕިޓަލްގައި ފަރުވާ ދެމުންދާ ކަމަށް ވެސް ބުންޏެވެ.
މި ނޫހުން ގުޅުމުން ޖަވާބު ނުދެއްވި ނަމަވެސް، ބައެއް މީޑިއާ އަށް މައުލޫމާތު ދެއްވަމުން އަލީ ވިދާޅުވީ، އޭނާ ސައިކަލުގައި ދަނިކޮށް، ކައިރިއަށް ޖެހި ކަރުގައި ކަޓަރު އަޅަން މީހަކު މަސައްކަތްކުރި ކަމަށެވެ. ނަމަވެސް، އޭނާ ވިދާޅުވި ގޮތުގައި، އެ މީހާ ކަޓަރު ނެގުމާ އެކު ސައިކަލް ދުއްވަން ހިފާލުމުން ކަޓަރު އެޅިފައި ވަނީ އޭނާގެ އަތުގައެވެ.
ފުލުހުން ބުނީ، އެ މައްސަލައިގައި ދިވެހި ފިރިހެނަކު ހައްޔަރުކޮށްފައިވާ ކަމަށެވެ.
އެ މައްސަލަ ތަހްގީގުކުރަމުން ދާ ކަމަށް ވެސް ފުލުހުން ބުންޏެވެ.
