މާލޭގައި ފިހާރައަކުން ވައްކަންކޮށް ރޯކޮށްލި ކަމުގެ ތުހުމަތުގައި ހައްޔަރުކުރި މީހެއްގެ މައްޗަށް، އެނގިހުރެ ހުއްދަނޫން ތަނަކަށް ވަނުމުގެ ދައުވާ ސާބިތުވެ، ތިން މަހާއި ނުވަ ދުވަހަށް ޖަލަށްލާން ހުކުމްކޮށްފިއެވެ.
އެނގިހުރެ ހުއްދަނޫން ތަނަކަށް ވަނުމުގެ ދައުވާ ދައުލަތުން ކޮށްފައި ވަނީ މުހައްމަދު އިއުޖާޒް ހަލީމް ނަމަކަށް ކިޔާ މީހެއްގެ މައްޗަށެވެ. އޭނާގެ މައްޗަށް ދައުލަތުން ދައުވާކޮށްފައި ވަނީ، މާލޭގެ ޗާންދަނީމަގުގައި އޭރު ހުރި ކޮމްޝޮޕް ފިހާރައިގެ ވެރިފަރާތުގެ ހުއްދަނެތި، 13 ސެޕްޓެމްބަރު 2018 ގައި މެންދަމު 2 ޖަހާ އަލިވި ފަހުން އެ ފިހާރަ އަށް ވަދެފައިވާތީއެވެ.
ކްރިމިނަލް ކޯޓުން ކުރި ހުކުމްގައިވާ ގޮތުން، ކޮމްޝޮޕް ފިހާރައިން ވައްކަން ކުރިކަން އެނގުނީ މެންދަމު 3:20 ހާއިރު ރިޕޯޓް ކުރުމުން ފުލުހުން އެތަނަށް ގޮސް ބެލި ބެލުމުންނެވެ. އެ ހާދިސާގައި ފިހާރައަށާއި މުދަލަށް ގެއްލުންވެފައިވާއިރު، ފިހާރައިގެ ސީސީޓީވީ ފުޓޭޖުން ފެންނަ ގޮތުގައި އިއުޖާޒް ފިހާރައަށް ވަދެގެން އުޅޭ މަންޒަރު ފެނެއެވެ. އޭނާ ހައްޔަރުކޮށް ދިރިއުޅޭ ތަން ފާސްކުރުމުން، އެ ފިހާރައިން ގެއްލުނު މުދާ ވަނީ ފެނިފައެވެ.
ނަމަވެސް އެ ދައުވާތަކަށް އިއުޖާޒު އިންކާރުކުރިއެވެ. އޭނާ ބުނި ގޮތުގައި އޭނާގެ ގެއިން ފެނުނު މުދަލަކީ ގަނެގެން ގެންގުޅޭ ތަކެއްޗެވެ.
އެކަމަކު ދައުލަތުން ހުށަހެޅި ހެކިން ކުށް ސާބިތުވާ ކަމަށް ކަނޑައަޅައި އަދަބެއްގެ ގޮތުން އިއުޖާޒަށް އިއްވީ ހަތަރު މަހާއި 24 ދުވަހުގެ ޖަލު ހުކުމެވެ. ނަމަވެސް އޭނާ ދޮޅު މަސް ދުވަހު ބަންދުގައި ހުރުމުން، އެ މުއްދަތު ހުކުމުން އުނިކޮށް، ޖަލުގައި ހުންނަން ޖެހޭނީ ތިން މަހާއި ނުވަ ދުވަސް ވަންދެނެވެ.
