ރޭ ދަންވަރުގެ ވަގުތެއްގައި އަނިޔާވެރިގޮތަކަށް މަރާލާފައިވާ އުމުރުން 22 އަހަރުގެ ޝިއާއު މުހައްމަދު ސައީދުގެ މަރުގެ މައްސަލައިގައި ހައްޔަރުކުރި 23 އަހަރުގެ އަލީ ޝާހިލް ޝަރީއަތް ނިމެންދެން ބަންދުކޮށްފިއެވެ.
އެ މައްސަލައިގައި ޝާހިލް ހައްޔަރުކޮށްފައި ވަނީ ރޭ ދަންވަރުގެ ވަގުތެއްގައި، އެ ހާދިސާ ހިނގި ސަރަހައްދުންނެވެ.
ޝާހިލްގެ ބަންދާ މެދު ގޮތެއް ނިންމި ޝަރީއަތް ފުލުހުން އެދިގެން ސިއްރުކޮށްފައިވާއިރު އެ އަޑުއެހުން ސިއްރުކުރަން ފުލުހުން އެދުނު ސަބަބެއް ހާމައެއް ނުކުރެއެވެ.
ޝާހިލް ހައްޔަރުކޮށްގެން ފުލުހުންގެ ވެހިކަލަށް އެރުވިއިރު ހުރީ ހަޒްމެޓް ސޫޓް ލައްވާފައެވެ. ބެލެވޭ ގޮތުގައި އެ ސޫޓް ލައްވާފައިވަނީ ޝާހިލްގެ ގައިގައި ލޭ ހުރުމުން ހެކި ރައްކާތެރި ކުރުމަށެވެ.
މިހާތަނަށް އެނގިފައިވާ ގޮތުގައި ޝިއާއުގެ ބޮލާއި ދެ އަތް އަދި ދެ ފައި ބުރިކޮށްފައިވާއިރު ޝިއާއު މަރާލުމުގެ ކުރިންވެސް ދެމީހުން ޒުވާބު ކުރާ އަޑު އެ ގޭތެރެއިން ވަނީ އިވިފައެވެ.
