ރައްޔިތުން މަޖިލީހުގެ ވަފުދެއް އިންޑިއާއަށް!

ރައްޔިތުންގެ މަޖިލީހުގެ އިދާރާގެ 10 މުވައްޒަފުންގެ ވަފްދެއް ރޭ އިންޑިއާގެ ނިއުދިއްލީއަށް ހިނގައްޖެއެވެ.

އެ އިދާރާއިން ބުނީ އެ ދަތުރަކީ 2019 ވަނަ އަހަރު ރައްޔިތުންގެ މަޖިލީހާއި އިންޑިއާގެ ގާނޫނު ހަދާ މަޖިލީސް ލޯކް ސަބާއާ ދެމެދު ވެފައިވާ އެއްބަސްވުމުގެ ދަށުން ތަޖުރިބާ ބަދަލުކޮށް ދެ ގައުމުގެ ގާނޫނު ހަދާ މަޖިލީހުގެ މަސައްކަތް ދެނެގަނެ މައުލޫމާތު ހޯދުމުގެ ގޮތުން ކުރާ ދަތުރެއް ކަމަށެވެ.

މި ދަތުރުގައި މަޖިލީހުގެ އިދާރާގައި މަސައްކަތް ކުރައްވާ ޕާލިމެންޓަރީ ސާވިސްގެ 10 މުވައްޒަފުން ކަމަށާއި އޭގެ ތެރޭގައި އެކި ސެކްޝަންތަކުގައި މަސައްކަތް ކުރާ މުވައްޒަފުން ހިމެނޭ ކަމަށް އެ އިދާރާއިން ބުނެއެވެ.

މި މަހުގެ 1 އިން 6 އަށް މަޖިލީހުގެ ވަފްދުން ނިއުދިއްލީއަށް ކުރާ ދަތުރުގައި އެ ގައުމުގެ ގާނޫނު ހަދާ މަޖިލީހަށް ޒިޔާރަތްކޮށް މަސައްކަތް ކުރާގޮތް ބަލާ މައުލޫމާތު ހޯދަން ހަމަޖެހިފައި ވާއިރު މިއީ 2019 ވަނަ އަހަރު ސޮއިކުރި އެއްބަސްވުމުގެ ދަށުން އިންޑިއާއަށް ދަތުރުކުރާ 2 ވަނަ ވަފްދެވެ. ފުރަތަމަ ވަފްދު ނިއުދިއްލީއަށް ދިޔައީ މިދިޔަ 2020 ވަނަ އަހަރުގައެވެ.