އެމެރިކާ އިން ރާއްޖެއަށް ހާއްސަކޮށް ފުރަތަމަ ފަހަރަށް ސަފީރަކު އައްޔަންކުރަން ހުށަހަޅައިފިއެވެ.
އެމެރިކާގެ އެމްބަސީއެއް ރާއްޖޭގައި ހުޅުވަން ނިންމިކަން އެ ގައުމުން އިއުލާންކުރީ 2020 ގެ ސެޕްޓެމްބަރު މަހުއެވެ. އެމެރިކާގެ ރައީސް ޖޯ ބައިޑެން އިއްޔެ ވަނީ އެމެރިކާ އިން ރާއްޖެ ސަފީރެއްގެ ގޮތުގައި ހޫގޯ ޔޫ-ހޯ ޔޮން އައްޔަންކުރައްވަން ނަން ހުށަހަޅުއްވާފައެވެ.
އޭނަގެ ނަން އެމެރިކާގެ ގާނޫނު ހަދާ މަޖިލީހުގެ ރުހުން ހޯދުމަށް ބައިޑެން ނިންމަވާފައިވާކަން ވައިޓް ހައުސް އިން އިއްޔެ ވަނީ ބުނެފައެވެ.
އުމުރުން 54 އަހަރުގެ ހޫގޯ މިހާރު ހުންނެވީ އެމެރިކާގެ ސްޓޭޓް ޑިޕާޓްމަންޓުގެ އޮފީސް އޮފް ދަ އަންޑަސެކްރެޓަރީ އޮފް އިކޮނޮމިކް ގްރޯތު، އެނާޖީ އެންޑް އެނަވަޔަރަމަންޓުގެ އިސް މުޝީރުގެ މަގާމުގައެވެ.
ހޫގޯ، ސްޓޭޓް ޑިޕާޓްމަންޓުގެ ބިއުރޯ އޮފް އިންޓަނޭޝަނަލް އޮގަނައިޒޭޝަން އެފެއާޒްގެ ޕްރިންސިޕަލް ޑެޕިއުޓީ އެސިސްޓެންޓް ސެކްރެޓަރީގެ މަގާމުގައި މީގެ ކުރިން ވަގުތީ ގޮތުން ހުންނެވިއެވެ.
އޭނާ ވަނީ އެމެރިކާގެ ނެޝެނަލް ސެކިއުރިޓީ ކައުންސިލްގައި އިންޑިއާ ކަނޑުގެ ސަރަހައްދުގެ ކަންކަން ބެލެހެއްޓުމުގައި އޭނާ ވަނީ ކުރިން އިސް ދައުރެެއް އަދާކުރައްވާފައެވެ.
އޭނާއަކީ އެމެރިކާގެ ފޮރިން ސާވިސްގެ އިސް މެންބަރެއް ވެސް މެއެވެ. އަދި އިންޑިއާ، ޗައިނާ އަދި އިންޑޮނީޝިއާގައި ހުންނަ އެމެރިކާގެ އެމްބަސީގެ އިސް މަގާމުތަކެއް ވެސް ކުރިން އޭނާ ވަނީ ފުރުއްވާފައެވެ.
ހޫގޯ އަކީ ކެލިފޯނިއާ ޔުނިވަސިޓީން ޕޮލިޓިކަލް އިކޮނޮމީން ބީއޭ ހާސިލުކޮށްފައިވާ ފަރާތެކެވެ.
