އިގުތިސޯދީ އަދި މާލީ ހީނަރުކަމާ ކުރިމަތިލާންޖެހިފައިވާ އަވަށްޓެރި ސްރީލަންކާގެ ތަރައްގީވެފައި ހިސާބުތަކުގައި ހުންނަ ސްކޫލްތަކުގައި ކިޔަވާދޭ މުއްދަތު އަނެއްކާވެސް ކުރު ކޮށްފިއެވެ.
އަންނަ ހަފުތާއިން ފަށައިގެން، ސްރީލަންކާގެ ތަރައްގީ ހިސާބުތަކުގެ ސްކޫލްތަކުގައި ދެން ކިޔަވާދޭނީ ހަފުތާއަކު 3 ދުވަހު ކަމަށް އެ ގައުމުގެ ތައުލީމާ ބެހޭ ވުޒާރާއިން އާންމު ކުރި ބަޔާނެއްގައިވެއެވެ.
ކުރިއަށް އޮތް ހަފުތާގައި ކިއެވުން ކުރިއަށް ގެންދާނީ އަންގާރަ، ބުދަ އަދި ބުރާސްފަތި ދުވަހު ކަމަށް ތައުލިމާ ބެހޭ ވުޒާރާއިން އާންމު ކުރި ބަޔާނުގައި ފާހަގަ ކޮށްފައި ވާ އިރު، އެ ސްކޫލްތަކުގައި ޕްރައިމަރީ ކުލާސްތަކަށް ކިޔަވާދޭނެ އުސޫލެއް ކަނޑައެޅުމުގެ ބާރު، ޕްރިންސިޕަލުންނަށް ވަނީ ދޫކޮށްލާފައެވެ.
ސްރީލަންކާއިން މީގެ ކުރިންވެސް ވަނީ ސްކޫލްތަކުގައި ކިޔަވާދޭ ދުވަހުގެ އަދަދު މަދު ކޮށްފައެވެ. އަދި ސަރުކާރުގެ މުވައްޒަފުން ވަޒީފާ އަދާ ކުރާނީ ހަފުތާއަކު 4 ދުވަހު ކަމުގައިވެސް އޮތީ ހަމަޖައްސާފައެވެ. މި ފިޔަވަޅުތަކަކީ ހަރަދުތައް ކުޑަކުރުމުގެ ގޮތުން އަޅާ ފިޔަވަޅުތަކެއް ކަމަށް މައުލޫމާތު ލިބެއެވެ. އަދި ތެޔޮ ލިބުން ދަތިވުމުގެ ސަބަބުން، އެއްގަމު ދަތުރުފަތުރު ކޮންޓްރޯލް ކުރުމުގެ ފިޔަވަޅެއްގެ ގޮތުން ތަންފީޒު ކުރާ ބަދަލެއް ކަމަށްވެސް މައުލުމާތު ލިބެއެވެ. ސަރުކާރު މުވައްޒަފުންނަށް 1 ދުވަހުގެ ޗުއްޓީއެއް ދިނީ، ދަނޑުވެރިކަމުގެ މަސައްކަތުގައި ޝާމިލުވެ، ކާބޯތަކެތީގެ ކަށަވަރުކަން ހޯދުމަށް ކަމަށް ހަބަރު ލިބެއެވެ.
ސްރީލަންކާގެ ތަރައްގީ ހިސާބުތަކުގެ ސްކޫލްތަކުގައި ކިޔަވައިދޭ ދުވަހުގެ އަދަދު 3 އަށް މަދު ކުރި ކަމުގައި ވީ ނަމަވެސް، ރަށްފުށުގެ ސްކޫލްތަކުގައި ހަފުތާއަކު 5 ދުވަހު ކިޔަވައިދިނުން ކުރިއަށް ދާނެ ކަމަށް މައުލޫމާތު ލިބެއެވެ.
