މުޖުތަމައު އަމާންކޮށް ބޭއްވުމަށް އިލްމުވެރިންގެ ދައުރު ބޮޑު ކަމަށާއި އިލްމުވެރިންނަކީ ރިވެތި ނަމޫނާ ދައްކަން ޖެހޭނެ ކަމަށް އިސްލާމިކް މިނިސްޓަރު އަހްމަދު ޑރ. ޒާހިރު ވިދާޅުވެއްޖެއެވެ.
މިނިސްޓަރު މިހެން ވިދާޅުވީ، ސައުދީ އަރަބިއްޔާއިން މިސަރަހައްދުގައި ގާއިމްވެފައިވާ ސައުދީ އިސްލާމިކް އެފެއާޒްގެ ދީނީ ކަންކަމާ ބެހޭ މުއައްސަސާއާއި، އިސްލާމިކް މިނިސްޓްރީއާ ގުޅިގެން ކުރިއަށްގެންދާ ދައުރާ ޕްރޮގްރާމް ފެށުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
މިނިސްޓަރުގެ ވާހަކަގައި އިސްލާމްދީން ފެށިގެން އައިސްފައިވަނީ ޖަހާލަތުގެ އަނދިރިކަމުގެ ތެރޭގައި އޮއްވާކަން ފާހަގަކުރައްވާ ރަސޫލާ ވަޑައިގެން އިސްލާމްކަމުގެ ނޫރުން އުންމަތް އަލިކޮށްދެއްވިކަމަށް ވިދާޅުވިއެވެ.
މީގެ އިތުރުން އިސްލާމްދީން އައުމުން މުޅި ދުނިޔެއަށް ލިބުނު އެންމެ ބޮޑު ހިތްހަމަ ޖެހުމަކީ އަމަން އަމާންކަން ކަމަށް މިނިސްޓަރު ވިދާޅުވިއެވެ. އަދި މުޖުތަމައު އަމާންކޮށް ބޭއްވުމުގައި ޢިލްމުވެރިންގެ ދައުރު ބޮޑުކަން ފާހަގަކުރައްވާ އިލްމުވެރިންނަކީ މުޖުތަމައުގެ ގަދަރުވެރި ބައެއްކަމާއި ރިވެތި ނަމޫނާ ދައްކަވަން ޖެހޭނެކަމަށް ވެސް މިނިސްޓަރު ވިދާޅުވިއެވެ.
މި ރަސްމިއްޔާތުގައި ސައުދީ އަރަބިއްޔާއިން މިސަރަހައްދުގައި ދީނީ ކަންކަން ރާވާ ހިންގުމުގައި އުޅުއްވާ ފަސީލަތުއް ޝައިހް ބަދްރު ބިން ނާސިރް އަލްއިންޒީއާއި ދިވެހިރާއްޖެއަށް ސައުދީ އަރަބިއްޔާއިން ކަނޑައަޅުއްވާފައިވާ ސަފީރު މަތްރިކް އައްދައުސަރީވެސް ބައިވެރިވެ ވަޑައިގެންނެވިއެވެ.
މި ޕްރޮގްރާމްގެ މައިގަނޑު ސުރުހީއަކީ “އިންސާނީ މުޖުތަމަޢުގައި ސިލްމާ، ސަލާމަތާއި އަމާންކަން ގާއިމުކުރުމުގައި ކީރިތި ރަސޫލާ صلى ﷲ عليه وسلم ގެންގުޅުއްވި ގޮތް” އެވެ.
މި ދައުރާ ޕްރޮގްރާމްގައި ބައިވެރިވަނީ ދިވެހިރާއްޖާގެ އިލްމުވެރިންނާއި، ހަޠީބުންނާއި އިމާމުން އަދި ދާއީން ކަމަށް މިނިސްޓްރީން ބުނެއެވެ.
