މިއަދު ހެނދުނު އިންޑިއާ ހައިކޮމިޝަނާއި ޔޫތް މިނިސްޓްރީން ޔޯގާ ދުވަސް ފާހަގަ ކުރަން ގަލޮޅު ދަނޑުގައި ތިއްބާ، ދިވެހި ޒުވާނުންގެ ބަޔަކު ދަނޑަށް ވަދެ ހިންގި ހަމަނުޖެހުމާ ގުޅިގެން 6 މީހަކު ހައްޔަރު ކޮށްފިއެވެ.
ފުލުހުން ބުނީ ސީރިއަސް މައްސަލައެއްގެ ގޮތުގައި އެ މައްސަލަ ބަލަމުން ދާ ކަށެވެ.
ހެނދުނު 6:30 ގައި ޔޯގާ ހަރަކާތް ފަށަން ތައްޔާރުވެފައި އޮއްވާ، ޒުވާނުންގެ ގިނަ ބަޔަކު "ﷲ އަކްބަރު" ގޮވަމުން ވަދެ ދަނޑުން "ނުކުތުމަށް" ގޮވާ ހަޅޭ ލަވާ، ދަނޑުގެ އެ މައިދާނުގައި ޖަހާފައި ހުރި ދިދަ ދަނޑިތައް އުފުރާ، ޔޯގާ ހަދާ މީހުން އަޅައިގެން ތިބި މެޓްތައް ނަގާ ހަދާފައިވެއެވެ. އަދި ފެންފުޅިއާއި، ޕޭމަންޓް ގާވެސް އުކާފައިވެއެވެ.
މިހާދިސާގައި ބައެއް މީހުންނަށް އަނިޔާވި ކަމަށް "ދަ ޕްރެސް" އަށް ވަނީ މައުލޫމާތު ލިބިފައެވެ.
ދަނޑަށް ވަދެގަތް މީހުން މައިތިރިކުރަން ގިނަ އަދަދެއްގެ ފުލުހުން ދަނޑަށް ވަނެވެ. އަދި ޕެޕާ ސްޕްރޭ ޖަހާ އެމީހުން ދަނޑުން ނެރެގެން މަޖީދީ މަގުން ފަހާ ވަނީ ދުރަށް ފޮނުވާލާފައެވެ. އެ ކުރިމަތި ލުމުގައި އިހުތިޖާޖުގެ ބައެއް ބައިވެރިންނަށްވެސް ވަނީ އނަިޔާވެފައެވެ.
މިއަދު ހިނގި ހަމަނުޖެހުމާ ގުޅިގެން ޔޫތު މިނިސްޓަރު އަހުމަދު މަހުލޫފް ވިދާޅުވީ، ޔޯގާ ދުވަހަކީ އަލަށް ފާހަގަ ކުރާ ދުވަހެއް ނޫން ކަމަށާއި، މީގެ ކުރީގެ ވެރިކަންތަކުގައިވެސް އެތައް ސަތޭކަ ބަޔަކު ބައިވެރިވެގެން ޔޯގާ ދުވަސް ފާހަގަ ކުރި ކަމަށެވެ. މަހުލޫފް ވިދާޅުވީ، މިއަދުގެ ހާދިސާއަކީ ބިރުވެރި ހާދިސާއެއް ކަމަށާއި، ބަޔަކު ވަދެ ހަމަލާ ދިން އިރު ގަލޮޅު ދަނޑުގައި އިންޑިއާ ހައިކޮމިޝަނަރުވެސް ހުންނެވި ކަމަށެވެ.
ޔޯގާ ދުވަސް ފާހަގަ ކުރުމާ، ދިވެހިންގެ ތެރެއިން ބަޔަކު ދެކޮޅެވެ. ޔޯގާ އަކީ ޝިރުކުރެގެ ތެރޭގައި ހިމެނޭ ކަމެއް ކަމަށް އެ ހަރަކާތާ ދެކޮޅު ފަރަތާތްތަކުން ބުނެ އިންޒާރު ދެމުން ދިޔަ އިރު، ކުރިން ޔޯގާ ދުވަސް ފާހަގަ ކުރަން އޮތީ ރަސްފަންނުގައެވެ. ނަމަވެސް ސިޓީ ކައުންސިލުން ރަސްފަންނު ނުދިނުމުން ޔޫތު މިނިސްޓްރީން އެ ހަރަކާތް ދަނޑަށް ބަދަލު ކުރީއެވެ.
މިއަދުގެ ހަމަނުޖެހުމަށް ފަހު، މިހާރު އަލުން މެޓް އަތުރައިގެން ޔޯގާ ދުވަސް ދަނޑުގައި ފާހަގަ ކޮށްފިއެވެ.
