ކ. ގުރައިދޫ ސިއްހީ މަރުކަޒަށް މިއަދު ދެއްކި މީހަކު "މަންކީޕޮކްސް" ޖެހިފައިވާ ކަމަށް ދެކެވުނު ވާހަކަ ކ. ގުރައިދޫ ސިއްހީ މަރުކަޒުން ދޮގުކޮށްފިއެވެ.

އެކަމާ ގުޅިގެން ކ.ގުރައިދޫ ސިއްހީ މަރުކަޒުން ނެރުނު ބަޔާނެއްގައި ބުނީ އެރަށު ސިއްހީމަރުކަޒަށް މިއަދު ޑޮކްޓަރަށް ދެއްކި ފަތުރުވެރިއެއްގެ ގައިން މަންކީޕޮކްސް އަށް ޝައްކުކުރެވޭ އަލާމަތްތައް ފެނުމާ ގުޅިގެން އެ މަރުކަޒުން ވަގުތުން މިކަމުގެ މައުލޫމާތު އެޗްޕީއޭއަށް ހިއްސާކޮށްފައިވާ ކަމަށެވެ.

އަދި އެޗްޕީއޭއިން މިކޭސް ބެލުމަށް ފަހު އެއީ މަންކީޕޮކްސް ނޫންކަން އަންގާފައިވާ ކަމަށް ކ. ގުރައިދޫ ސިއްހީ މަރުކަޒުން ވަނީ ބުނެފައެވެ.

ކ. ގުރައިދޫ ސިއްހީ މަރުކަޒުން އިތުރަށް ބުނީ ރަށުގެ ސިއްހީ ކަންކަމާ ގުޅޭ އެންމެ ފަހުގެ މައުލޫމާތު ސިއްހީ މަރުކަޒުން ރައްޔިތުންނަށް އަބަދުވެސް ހިއްސާކުރަމުންދާ ކަމަށެވެ. އަދި އާއްމު ރައްޔިތުންގެ ހިތުގައި ބިރުވެރިކަން އުފެދޭގޮތަށް މިފަދަ ވާހަކަތައް ނުފެތުރެމަށެވެ.

އެޗްޕީއޭއިން މީގެ ކުރިން ނެރުނު ބަޔާނެއްގައި ވެސް ބުނީ މިއަދާ ހަމައަށް ރާއްޖެއިން މަންކީޕޮކްސްގެ ކޭސް އެއް ފެނިފައި ނުވާ ކަމަށެވެ. އަދި މަންކީޕޮކްސް އަކީ ބަލި ޖެހިފައިވާ މީހަކާއެކު ގިނައިރު ކޮންޓެކްޓް ވުމުން ފެތުރޭ ބައްޔަކަށް ވުމާއެކު، މިވަގުތު ރާއްޖޭގައި މިބަލި ފެތުރުމުގެ ރިސްކް ކުޑަކަމަށް ލަފާކުރެވޭ ކަމަށް އެޗްޕީއޭއިން ވަނީ ބުނެފައެވެ.

އެހެންނަމަވެސް ގިނަ ގައުމުތަކުން ބަލި އުޅޭތީ ދެނެގަތުމަށް ކުރާ މަސައްކަތްތައް އިތުރުވުމާއެކު، އިތުރު ގައުމުތަކުން ކޭސްތައް ފެނިދާނެ ކަމަށް ބެލެވޭ ކަމަށް އެޗްޕީއޭއިން ބުނެއެވެ. އަދި އެއާ ގުޅިގެން ރާއްޖެއަށްވެސް ކޭސްއެއް އައުމަކީ އެކަށީގެންވާ ކަމެއް ކަމަށް އެޗްޕީއޭއިން ވަނީ ފާހަގަކޮށްފައެވެ. އެހެން ކަމުން އާއްމު ރައްކާތެރިކަމުގެ ފިޔަވަޅުތަކަށް އިސްކަންދިނުމަށް އެޗްޕީއޭއިން ވަނީ އިލްތިމާސްކޮށްފައެވެ.

މަންކީޕޮކްސްއަ ކީ އާއްމުކޮށް މިބަލީގެ ވައިރަސް ހުންނަ ޖަނަވާރުގެ ފަރާތުން ފެތުރޭ ބައްޔެކެވެ. ނޭވާލާ ނިޒާމުގެ ޒަރީއާއިން ފެތުރޭ އެހެން ގިނަ ބަލިތަކާ ތަފާތުކޮށް، އިންސާނުންގެ ތެރޭގައި މަންކީޕޮކްސް އާއްމުކޮށް ފެތުރެނީ ބަލިޖެހިފައިވާ މީހަކާ ގިނައިރު ކޮންޓެކްޓް ވެގެންނެވެ. އިންސާނުންގެ ތެރޭގައި އެކެއްގެ ގައިން އަނެކެއްގެ ގަޔަށް މިބަލީގެ ވައިރަސް ފެތުރެނީ ބަލިޖެހިފައިވާ މީހެއްގެ ކުޅުގައި ހުންނަ ޖަރާސީމު ނޭވާލުމުގެ ނިޒާމަށް ގޮސްގެންނާއި، ބަލި މީހާގެ ހަމުގައިވާ ބިހިތަކުގައި ނުވަތަ އެއިން ނުކުންނަ ދިޔައިގައި ޖެހުމުންނާއި، ބަލިމީހާގެ ހެދުމާއި، ބެޑްޝީޓް، ތުވާލި ފަދަ ތަކެތީގައި ޖެހުމުންނެވެ.

މަންކީޕޮކްސްއާއި މިފަދަ އެހެނިހެން ގައިންގަޔަށް އަރާ ބަލިތަކުން ރައްކާތެރިވުމަށް ގިނަގިނައިން އަތް ސާފު ކުރުމާއި މާސްކް އެޅުމުން އަދި އެއްވެސް އަލާމާތެއް ހުރިނަމަ އެހެން މީހުންނާއި ބައްދަލުވެ ގައިގޯޅިވެ ނޫޅުން މުހިންމު ކަމަށް އެޗްޕީއޭއިން ބުނެއެވެ.

މީގެ އިތުރުން ހުން އައުމާއި، ގައިގައި ރިހުންފަދަ އަލާމާތްތަކާއެކު، ގޮށްލާ، ހަމުގައި ބިހި ނަގައިފި ނަމަ އަވަހަށް ޑޮކްޓަރަކަށް ދެއްކުމަށް އެޗްޕީއޭއިން ވަނީ އިލްތިމާސްކޮށްފައެވެ.

ހަބަރު ހެލްތު މިނިސްޓްރީ މަންކީޕޮކްސް ސިއްހަތު