ރަޝިއާއިން ޔޫކްރައިންގައި ފެށި ހަނގުރާމަ ކޮޅެއްގައި ނުޖެހި ވާ މި ދަނޑިވަޅުގައި، ރަޝިއާގެ އެންމެ ޒަމާނީ މިސައިލްތަކުގެ ތެރޭގައި ހިމެނޭ އެސް-400 އެޑްވާންސްޑް ސާފަސް ޓު އެއާ މިސައިލް ޑިފެންސް ސިސްޓަމްގެ 2 ވަނަ ސްކޮޑްރޯން، އަވަށްޓެރި އިންޑިއާއަށް ޑެލިވާ ކުރުމުގެ މަސައްކަތް ފަށައިފިއެވެ.
ރަޝިއާއާ ދެކޮޅަށް ބައިނަލްއަގުވާމީ ފެންވަރުގައި ދަތިކުރުމުގެ ފިޔަވަޅުތައްވެސް ތަންފީޒު ކުރަމުންދާ މި ދަނޑިވަޅުގައި އެ ގައުމުން އިންޑިއާއަށް މިސައިލް ޑެލިވާ ކުރަން ފަށާފައި ވާ އިރު، މިސައިލް ޑެލިވަރީގެ ހުރިހާ މަސައްކަތެއް މަސް ނިމޭ ހިސާބަށް ނިންމާލެވޭނެ ކަމަށް މައުލޫމާތު ލިބެއެވެ. އެހާ ހިސާބުން ދެން ފެށޭނީ ނިޒާމު ގާއިމު ކުރުމުގެ މަސައްކަތް ކަމަށް ހަބަރު ލިބެއެވެ.
އެސް-400 މިސައިލް ސިސްޓަމްގެ ފުރަތަމަ ސްކޮޑްރޯން އިންޑިއާއަށް ގެންދިޔައީ ޑިސެމްބަރު 2021 ގައެވެ. އަދި އެ ނިޒާމު ގާއިމު ކުރީ، ޕާކިސްތާނާއި ޗައިނާއިން ދީފާނެ ހަމަލާއެއް ހުއްޓުވާލެވޭ ގޮތަށް ޕަންޖާބު ބޯޑަރުގައެވެ.
އޮކްޓޯބަރު 2018 ގައި ސޮއިކުރި 5 ބިލިއަން ޑޮލަރުގެ އެއްބަސްވުމެއްގެ ދަށުން އިންޑިއާއިން ވަނީ، ރަޝިއާ އަތުން އެސް-400 ސިސްޓަމްގެ 5 ޔުނިޓް ގަނެފައެވެ. މި ނިޒާމަކީ އިންޑިއާއަށް ނުރައްކާ ކުރިމަތި ކުރުވާ މަތިންދާ ބޯޓެއް ނުވަތަ މިސައިލެއްވެސް 40 ކިލޯމީޓަރާއި 400 ކިލޯމީޓަރުގެ ސަރަހައްދަކުން ވައްޓާލުމުގެ ގާބިލުކަން ލިބިފައިވާ ނިޒާމެކެވެ. އަދި މި އަހަރު ނިމޭއިރު، 5 ޔުނިޓްވެސް އޮޕަރޭޓް ކުރެވޭ ވަރު ވާނެ ކަމަށް ބެލެވެއެވެ.
އިންޑިއާގެ ދިފާއީ އުމްރާނީ ބިނާވެށި ވަރުގަދަ ކުރުމުގެ މަސައްކަތް އެ ގައުމުން އެންމެ ފަހުން ފެށީ ޖުލައި 2020 ގައި، ލައިން އޮފް އެކްޗުއަލް ކޮންޓްރޯލް ސަރަހައްދުގައި ޗައިނާއާ ދެމެދު ހިންގި ކުރިމަތިލުންތަކަށް ފަހުގައެވެ.
