ރަޝިއާއިން ވަރުގަދަ ހަނގުރާމައެއް ކުރަމުން އަންނަ ޔޫކްރައިންގައި ހަރަކާތްތެރި ވަމުން ދިޔަ އެމެރިކާގެ ނޫސްވެރިޔާ، ބްރެންޓް ރެނޯޑް،50، މަރާލާފައި ވާ ކަމަށް ހަބަރު ލިބިއްޖެއެވެ.
ނޫސްވެރިއެއްގެ އިތުރުން ފިލްމުވެސް އުފައްދަމުން އަންނަ ރެނޯޑް މަރާލާފައި ވަނީ، ޔޫކްރައިންގެ ވެރިރަށް ކިއޭވްގެ ބޭރުން އޮންނަ އިރްޕިން އަވަށުގައެވެ.
ޔޫކްރައިންގައި އޭނާ މަސައްކަތް ކުރަމުންދިޔައީ "ޓައިމް"ގެ ނޫސްވެރިއެއްގެ ގޮތުގައި ކަމަށް މައުލޫމާތު ލިބެއެވެ.
ރެނޯޑް މަރާލާފައި ވަނީ އޭނާގެ ގަޔަށް ބަޑިޖަހައިގެން ކަމަށް ފުލުހުން ވަނީ ބުނެފައެވެ.
ކިއޭވް ފުލުހުންގެ އިސްވެރިޔާ އެންޑްރީ ނެބީޓޯވް އާ ހަވާލާދީ، ބީބީސީއިން ރިޕޯޓް ކޮށްފައި ވާ ގޮތުގައި، ރެނޯޑްއަށް ހަމަލާ އަމާޒު ކުރީ ރަޝިއާ ސިފައިންނެވެ. މި ހަމަލާތަކުގައި އިތުރު 2 ނޫސްވެރިއަކު ޒަހަމްވެފައި ވާ ކަމަށާ، އެ 2 ނޫސްވެރިންނަށް ހޮސްޕިޓަލުގައި ފަރުވާ ދެމުން އަންނަ ކަމަށް ހަވަރު ލިބެއެވެ. ހާދިސާ ހިނގި ސަރަހައްދުގައި ހުރި ނޫސްވެރިއަކު ބުނި ގޮތުގައި، ރެނޯޑްގެ ކަރަށް ބަޑިޖެހި މަންޒަރު އޭނާއަށް ވަނީ ފެނިފައެވެ.
ފިލްމު އުފެއްދުމާއި ނޫސްވެރި ކަމުގެ ދާއިރާއިން އެވޯޑް ހާސިލު ކޮށްފައި ވާ ރެނޯޑްއަކީ ދުނިޔޭގެ އެންމެ "ހޫނުގަދަ" މަސްރަހުތަކުން މަންޒަރާއި ހަބަރު ގެނެސްދިން ފަންނުވެރިއެކެވެ. އެގޮތުން އޭނާ ވަނީ ހައިޓީއާއި އިރާގުގެ އިތުރުން އަފްގާނިސްތާނުގެ މަސްރަހުންވެސް ރިޕޯޓް ކޮށްފައެވެ.
ރެނޯޑްއަކީ ޔޫކްރައިންގައި މިހާރު ކުރަމުން ދާ ހަނގުރާމާގައި މަރާލި ފުރަތަމަ ބިދޭސީ ނޫސްވެރިޔާއެވެ. މީގެ 2 ހަފުތާއެއްހާ ދުވަސް ކުރިން، ޔޫކްރައިންގެ ނޫސްވެރިއަކު ވަނީ މަރާލާފައެވެ.
