ރަޝިއާއިން ޔޫކްރައިންގައި ކުރަމުންދާ ހަނގުރާމާގައި ޒަހަމްވި ޔޫކްރައިންގެ އަސްކަރިއްޔާގެ މެންބަރުންގެ ގާތަށް، އެ ގައުމުގެ ރައީސް ވްލޮޑޮމީރް ޒެލެންސްކީ ޒިޔާރަތް ކުރައްވައިފިއެވެ.
ޔޫކްރައިން ސަރުކާރާ ހަވާލާދީ ބައިނަލްއަގުވާމީ މީޑިއާއިން ރިޕޯޓް ކުރާ ގޮތުގައި ޒެލެންސްކީ ވަނީ ޒަހަމްވީ ސިފައިންގެ ތެރެއިން ހޮސްޕިޓަލުގައި ފަރުވާ ހޯދަމުންދާ ސިފައިންނާ ބައްދަލު ކުރައްވާ ހިތްވަރު ދެއްވާ، އަވަސް ޝިފާއަކަށް އެދިވަޑައިގެންފައެވެ. އަދި ގައުމު ދިފާއު ކުރަން ނިކުތް ފަހުލަވާނުންގެ މެޑަލްވެސް އެ ސިފައިންނާ ހަވާލު ކުރައްވާ، ސެލްފީ ނަންގަވާ ހެއްދެވި ކަމަށްވެސް މައުލޫމާތު ލިބެއެވެ.
އެ ބައެއްގެ ގާތަށް ޒެލެންސްކީ ޒިޔާރަތް ކުރެއްވި ސިފައިންނަކީ، ޔޫކްރައިންގެ ވެރިރަށް ކިއޭވްގެ ދިފާއަށް ހަނގުރާމަ ކުރަމުން ދިޔަ ސިފައިން ކަމަށް ހަބަރު ލިބެއެވެ. އަދި އެ ސިފައިންނަށް ދެވެން އޮތް އެންމެ އަގު ބޮޑު ހަދިޔާއަކީ ނަސްރު ކަމަށް ޒެލެންސްކީ ވިދާޅުވި ކަމަށް، ޔޫކްރައިންގެ ދިފާއީ ވުޒާރާއާ ހަވާލާދީ ބައިނަލްއަގުވާމީ މީޑިއާއިން ވަނީ ރިޕޯޓް ކޮށްފައެވެ.
ފެބުރުއަރީ 24 ވަނަ ދުވަހު ރަޝިއާއިން ޔޫކްރައިންއަށް އަރާ، ކުރަމުންދާ ހަނގުރާމަ، 19 ވަނަ ދުވަހަކަށް ދިގުލާ ގޮސްފައި ވާ އިރު، މިއަދުގެ ވަގުތެއްގައި ސުލްހައިގެ މަޝްވަރާތަކުގެ އިތުރު ބުރެއް ކުރިއަށް ދާނެ ކަމަށް ހަބަރު ލިބެއެވެ. މައުލޫމާތު ލިބޭ ގޮތުގައި ސުލްހައިގެ މަޝްވަރާތައް ކުރިއަށް ދާނީ ވީޑިއޯ ކޮންފަރެންސް ޓެކްނޮލޮޖީ މެދުވެރިކޮށެވެ.
ރަޝިއާއިން ޔޫކްރައިންގައި ކުރަމުންދާ ހަނގުރާމައިގެ ސަބަބުން ބައިނަލްއަގުވާމީ މައިދާނުގައި ރަޝިއާ އިންތިހާއަށް އެކަހެރި ވަމުން ދިޔަ ކަމުގައި ވީ ނަމަވެސް، މި ހަނގުރާމާގައި ރަޝިއާއިން ދޫ ދޭ މަންޒަރެއް އަދި ނުފެނެއެވެ. ނަމަވެސް މިއަދުގެ ސުލްހައިގެ މަޝްވަރާތަކުން ކޮންމެވެސް ވަރެއްގެ ހައްލެއް ލިބުމުގެ ފުރުސަތު އެބައޮތް ކަމަށް ހަބަރު ލިބެއެވެ.
