މީގެ 18 ދުވަސް ކުރިން ފެށި ހަނގުރާމާގައި ރަޝިއާއިން ޔޫކްރައިންގެ ވެރިރަށް ކިއޭވް ހިފައިފިނަމަ ރަޝިއާއަށް ދެން ކުރިމަތިލާންޖެހޭނެ ކަމަކަށް އޮންނާނީ މަރު ކަމަށް، ޔޫކްރައިންގެ ރައީސް ވްލޮޑޯމީރް ޒެލެންސްކީ އިންޒާރު ކުރައްވައިފިއެވެ.
މުޅި ޔޫކްރައިންގެ ހުރިހާ ހިސާބަކަށް ހެން އަތްގަދަ ކުރަމުން ދާ ރަޝިއާގެ އަސްކަރިއްޔާއިން މިހާރު ވަނީ ކިއޭވްއާ އިންތިހާ ގާތަށް ޖެހިލާފައެވެ. ކިއޭވްގެ ރައްޔިތުންނަށް މިއަދު އަލިވިލުނީވެސް ރެއިޑްގެ ސައިރަން އަޑުފަށްގަނޑަށެވެ.
ރަޝިއާގެ އަސްކަރިއްޔާ މިހާރު އޮތީ ކިއޭވްއާ އެންމެ 15.5 މޭލު ދުރުގައި ކަމަށް އިނގިރޭސިވިލާތުން އިންޒާރު ކޮށްފައެވެ.
ރަޝިއާއިން ހަމަލާތައް ވަރުގަދަ ކޮށްފައިވާ ސަރަހައްދުތަކުގެ ތެރޭގައި ހަރްކީވް، މަރިއުޕޮލް، މައިކޮލާއިވް، ޗެރްނިހީވް އަދި ސޫމީ ހިމެނެއެވެ. ލިބެމުންދާ ސެޓެލައިޓް ފޮޓޯތަކަށް ބަލާއިރު، ޔޫކްރައިންގެ އެކި ހިސާބުތަކަށް ރަޝިއާއިން ވަނީ ބޮޑެތި ގެއްލުންތަކެއް ދީ، ސުންނާފަތި ކޮށްފައެވެ.
ޔޫކްރައިންގެ މަސްރަހު އިންތިހާއަށް ނުތަނަވަސްވަމުން އަންނަ އިރު ޒެލެންސްކީ، ޔޫކްރައިން އަސްކަރިއްޔާގެ 1300 އެއްހާ މެންބަރުންގެ ފުރާނަ ގެއްލިފައި ވާ ކަން ހާމަ ކުރައްވާފައެވެ. އަދި ސުލްހައިގެ މަޝްވަރާތަކުގައި ހުޅަނގުން މިހާރަށްވުރެ ބޮޑަށް ޝާމިލުވުމަށްވެސް ޒެލެންސްކީ ވަނީ ގޮވާލައްވާފައެވެ.
ކަން މިހެން އޮތް އިރު ރަޝިއާއިން ވަނީ ޔޫކްރައިންއަށް ހުޅަނގުން ފޯރުކޮށްދޭ އަސްކަރީ އެހީއަށް އަމާޒުކޮށްގެން ހަމަލާދޭނެ ކަމަށް އިންޒާރު ކޮށްފައެވެ. އެކި ގައުމުތަކުން ޔޫކްރައިންއަށް އަސްކަރީ އެހީ ފޯރުކޮށްދެމުން ދާއިރު، އެ އަމާޒުތަކަށް ހަމަލާ ދިނުމުގެ ގާނޫނީ ހައިސިއްޔަތު އެބައޮތް ކަމަށްވެސް ރަޝިއާގެ ޑެޕިއުޓީ ފޮރިން މިނިސްޓަރު ސަރްގޭއި ރިޔަބްކޯފް ވަނީ އިންޒާރު ކުރައްވާފައެވެ.
