އިޒްރޭލު މީހުންނާ ކައިވެނި ކޮށްގެން އުޅޭ ފަލަސްތީނުގެ ރައްޔިތުން، ނެޗުރަލައިޒޭޝަންގެ ދަށުން އިޒްރޭލަށް ބަލައި ނުގަތުމަށް، އިޒްރޭލުގެ ގާނޫނު ހަދާ މަޖިލީހުން ފާސްކޮށްފިއެވެ.
ފަލަސްތީނުގެ ހުޅަނގު އައްސޭރިއާއި ގައްޒާގެ ރައްޔިތުންގެ ތެރެއިން، އިޒްރޭލު މީހުންނާ އިނދެގެން އުޅޭ ރައްޔިތުން ބަލައި ނުގަތުމަށް އިޒްރޭލުގެ ގާނޫނު ހަދާ މަޖިލީހުން ފާސްކުރި ގާނޫނާއެކު، އިޒްރޭލު ދޫކޮށް ދިއުމަށް ނުބަތަ އާއިލާ ދެތަން ވުމަށް، ފަލަސްތީނުގެ ގިނަ އާއިލާތަކަކަށް ވަނީ މަޖުބޫރު ވެފައެވެ.
ފަލަސްތީނުގެ ރައްޔިތުން ބަލައި ނުގަތުމަށް އިޒްރޭލުގެ ގާނޫނު ހަދާ މަޖިލީހުން ފާސް ކުރީ 45 ވޯޓުގެ ތާއީދުންނެވެ. ރަށްވެހިކަމުގެ ގާނޫނުގެ ނަމުގައި އެކުލަވާލި އެ ގާނޫނާ ދެކޮޅަށް ވޯޓު ދީފައި ވަނީ 15 މެންބަރެކެވެ.
މި ގާނޫނަކީ 2003 ވަނަ އަހަރުގެ ހަމަނުޖެހުންތަކުގެ ތެރޭގައި އިޒްރޭލުން އެކުލަވާލި ވަގުތީ ގާނޫނެއްގެ ބަދަލުގައި އެކުލަވާލި ގާނޫނެކެވެ. ޖުލައި 2021 ގައި މުއްދަތު ހަމަވުމާ ހިސާބަށް، ކޮންމެ އަހަރަކުވެސް އެ ވަގުތީ ގާނޫނުގެ މުހުލަތު ވަނީ މުރާޖާ ކޮށްފައެވެ. ޖުލައި 2021 އަށް ފަހު މުހުލަތު އިތުރު ކުރުމަށް ފެއިލްވީ، އިޒްރޭލުގެ ގާނޫނު ހަދާ މަޖިލީހުން އެކަމަށް ބޭނުން އަގުލަބިއްޔަތު ނިލިބިގެންނެވެ.
120 މެންބަރުންގެ މައްޗަށް އެކުލެވޭ އިޒްރޭލުގެ ގާނޫނު ހަދާ މަޖިލީހުގެ ގިނަ މެންބަރުންތަކެއް މި މައްސަލާގައި ވޯޓުދީފައި ނުވާކަމަށް އަލްޖަޒީރާއިން ބުނެއެވެ.
އިޒްރޭލުގެ ރަށްވެހިކަމުގެ ގާނޫނު ބުނާ ގޮތުގައި އިޒްރޭލު މީހުންނާ އިނދެގެން އުޅޭ ފަލަސްތީނުގެ މީހުންނަށް 2 އަހަރު ދުވަހުގެ ވަގުތީ ރަށްވެހި ކަމުގެ ހުއްދައެއް ހޯދިދާނެއެވެ. ނަމަވެސް އެއީ ސަލާމަތީ ސަބަބުތަކަށްޓަކާ ކޮންމެ ދަނޑިވަޅެއްގައިވެސް ބާތިލު ކުރެވިދާނެ ހުއްދައެއް ކަމަށް ބުނެފައިވެއެވެ.
މި ގާނޫނަކީ އިޒްރޭލުގެ ޔަހޫދީ ވަންތަކަން ދެމެހެއްޓުމަށް ފާސްކުރި ބިލެއް ކަމަށް މައުލޫމާތު ލިބެއެވެ.
ހަބަރު ލިބޭ ގޮތުގައި އިޒްރޭލުން މިހާރު ދަނީ ރަޝިއާއިން އަރާ ހަނގުރާމަ ކުރަމުންދާ ޔޫކްރައިންގެ ރެފިއުޖީން ބަލައިގަތުމަށް ތައްޔާރު ވަމުންނެވެ. ޔޫކްރައިންގެ ރައީސް ވްލޮޑޮމީރް ޒެލެންސްކީއަކީ ޔަހޫދީ ދީނުގެ މީހެކެވެ.
