ފުރިހަމަ އަސްކަރީ ބާރާއެކު ރަޝިއާއިން އަރާ، ވަރުގަދަ ހަނގުރާމައެއް ކުރަމުން ގެންދާ ޔޫކްރައިންގެ ވެރިރަށް ކިއޭވްގެ ރަށްފުށުގެ ސަރަހައްދުތައް ސުންނާފަތި ކޮށްލާފައި ވާ މަންޒަރު، މެކްސާ ޓެކްނޮލޮޖީޒްގެ ސެޓެލައިޓް ފޮޓޯތަކުން ހާމަވެއްޖެއެވެ.
ކިއޭވްގެ ހުޅަނގު-އުތުރުގެ ރަށްފުށު ސަރަހައްދާއި އުތުރުގެ ސިޓީއެއް ކަމަށް ވާ ޗެރްނިހީވްގެ ބައިތަކަށް ބޮޑެތި ގެއްލުންތަކެއް ލިބިފައިވާތީ މި ފޮޓޯޓަކުން ފެނެއެވެ. ޗެރްނިހީވްގެ ސިނާއީ ސަރަހައްދުތަކަށްވެސް ބޮޑެތި ގެއްލުންތަކެއް ދީފައި ވާއިރު، ސުޕާމާޓެއްވެސް ސުންނާފަތި ކޮށްލާފައި ވާކަމަށް މައުލޫމާތު ލިބެއެވެ.
ބުރާސްފަތި ދުވަހު ނަގާފައިވާ ސެޓެލައިޓް ފޮޓޯތަކުން، ރަޝިއާއިން ކޮންޓްރޯލް ކުރަމުން އަންނަ އެންޓޯނޯވް އެއާބޭސްގައި ހުންނަ ތެޔޮ ރައްކާކުރާ ޓޭންކުތަކުގައި ރޯވެފައިވާ މަންޒަރު ފެނެއެވެ. އެ ސަރަހައްދުން ކަޅު، ބޯ ދުން އަރާ މަންޒަރު ފެނެއެވެ.
މީގެ އިތުރުން ކިއޭވްގެ ހުޅަނގު-އިތުރުގައި އޮންނަ އަވަށެއް ކަމަށް ވާ ބޮރޮޑްޔަންކާގައި އާންމުން ދިރިއުޅެމުން ދިޔަ އިމާރާތްތަކެއް ސުންނާފަތި ކޮށްލާފައި ވާ މަންޒަރުވެސް ސެޓެލައިޓް ފޮޓޯތަކުން ހާމަވެއެވެ. މި އިމާރާތްތަކަކީ ރަޝިއާގެ އުދުވާންތަކުގައި ސުންނާފަތި ކޮށްލި އިމާރާތްތަކެއް ކަމަށް، ސީއެންއެންއިން މީގެ ކުރިން ވަނީ ރިޕޯޓް ކޮށްފައެވެ.
ކިއޭވްގެ ރަށްބޭރުގައި އޮންނަ ސްޓޮޔަންކާއޭ ކިއުނު ސަރަހައްދުގައި ހުންނަ ގުދަނެއްވެސް އަލިފާނުގެ ހާދިސާއެއްގައި މުޅިން ހަލާކު ވެފައި ވާ ކަމަށް ސެޓެލައިޓް ފޮޓޯތަކުން ހާމަވެއެވެ.
ފެބުރުއަރީ 24 ވަނަ ދުވަހު ރަޝިއާއިން ޔޫކްރައިންއަށް އަރާ، ހަނގުރާމަ ކުރަމުން ބުނެފައި ވަނީ ހަމަލާ ދޭނީ އަސްކަރީ އަމާޒުތަކަށް ކަމަށެވެ. ނަމަވެސް ޔޫކްރައިނުން އޭރުވެސް ވަނީ، އާންމުންގެ މުދަލާ ތަކެއްޗަށް ރަޝިއާގެ ހަމަލާ އަމާޒު ވާ ކަމަށް ބުނެފައެވެ. ރަޝިއާއިން ކުރަމުންދާ ހަނގުރާމާގައި ޔޫކްރައިންގެ އާންމުންގެ ގިނަ ބައެއްގެ ފުރާނަ ގެއްލިފައި ވާ އިރު، އެތައް ސަތޭކަ ހާސް ބައެއްގެ ގެދޮރު ވަނީ ގެއްލިފައެވެ.
